ج.تۇيمەبايەۆتىڭ اكەسى قانسەيىت تۇيمەبايەۆ كەزىندە العاباس جانە سوزاق اۋداندارىندا پارتيا ۇيىمىنىڭ حاتشىسى قىزمەتىن اتقارعان. ول كىسى قۇداي قوسقان قوساعى ۇلمەكەن جامان­قۇلقىزىمەن وتباسىندا 4 ۇل، 8 قىز تاربيەلەپ وسىرگەن.

قانسەيىت تۇيمەبايەۆتىڭ ۇلكەن ۇلى بايسەيىت كەزىندە ماڭعىستاۋ وبلىسىندا جاۋاپتى قىزمەتتەر اتقارعان، كەيىن شىمكەنت وبلىستىق، وڭتۇستىك قازاقستان وبلىستىق اكىمدىكتەرىندە ەڭبەك ەتكەن. وڭتۇستىك قازاقستان جانە الماتى وبلىس­تارىندا تابيعي مونوپوليالاردى رەتتەۋ، باسە­كەلەستىكتى قورعاۋ جانە شاعىن بيزنەستى قولداۋ دەپارتامەنتىن باسقارعان. بايدىبەك اۋدانىنىڭ اكىمى بولعان.

ج.تۇيمەبايەۆتىڭ تۋعان ءىنىسى يمانگەلدى بۇگىندە ايماقتىق باسقارمالاردىڭ بىرىندە جاۋاپتى قىزمەت اتقارادى. وعان دەيىن بايدىبەك اۋدانى اكىمىنىڭ ورىنباسارى بولعان.

جانسەيىت تۇيمەبايەۆ جۇبايى جانات ەڭسەبايەۆامەن بىرگە ەلدانا جانە ەلنار ەسىمدى ۇل-قىزدار وسىرگەن. كەي دەرەكتەرگە قاراعاندا، ج.ەڭسەبايەۆا ونەر گالەرەياسىنىڭ ديرەكتورى بولىپ ىستەيدى، كەزىندە ول تۇركياداعى ەلشىلىكپەن بىرىگىپ، قازاقستاندىق ۇزدىك سۋرەتشىلەردىڭ «زاماناۋي قازاق ونەرى» اتتى كورمەسىن وتكىزگەن.

ج.تۇيمەبايەۆ بالا كەزىندە شىمكەنتتەگى №12 مەكتەپ-ينتەرناتتا وقىعان. ونى التىن مەدالمەن بىتىرگەن. ونىڭ ماتەماتيكا پانىنە قابىلەتى جوعارى بولىپتى. ول كەيىن قازاق مەملەكەتتىك ۋنيۆەرسيتەتىن، ماسكەۋ مەملەكەتتىك الەۋمەتتىك ۋنيۆەرسيتەتىن بىتىرگەن. بۇگىندە فيلولوگيا عىلىمدارىنىڭ دوكتورى، پروفەسسور، 2-سىنىپتى ەلشى ديپلوماتيالىق دارەجەسىنىڭ يەگەرى. ول كىسى – 30-دان استام عىلىمي-تانىمدىق كىتاپتاردىڭ اۆتورى.

ج.تۇيمەبايەۆ كەزىندە قازاق مەملەكەتتىك ۋنيۆەرسيتەتىندە ەڭبەك ەتكەن. 1993-جىلدان باس­تاپ سىرتقى ىستەر مينيسترلىگىندە جاۋاپتى قىزمەتتەر اتقارعان، قازاقستاننىڭ ستامبۋل قالاسىنداعى كونسۋلدىعىن، قازاقستان پرەزي­دەنتىنىڭ پروتوكولىن باسقارعان، پرەزيدەنتتىڭ كەڭەسشىسى بولعان. ءبىلىم جانە عىلىم ءمينيسترى بولعان. رەسەيدەگى، تۇركياداعى، البانياداعى توتەنشە جانە وكىلەتتى ەلشى قىزمەتتەرىن ات­قارعان.

ول وڭتۇستىك قازاقستان وبلىسىنىڭ اكىمى قىزمەتىنە 2016-جىلى قازان ايىندا تاعايىندالعان بولاتىن. بيىلعى 20-ماۋسىمدا جاڭادان قۇرىلعان تۇركىستان وبلىسىنىڭ اكىمى قىزمەتىنە تاعايىندالدى.

د. نۇرپەيىس

"زامانا" گازەتى