«مەن ادامدارمەن الىسىپ كەلدىم، ءبىراق كەرىسىنشە قوعام مۇددەسى ءۇشىن كۇرەسۋىم كەرەك ەدى». بۇل امەريكالىق بالۋان دجاستين رەنۋدىڭ ءسوزى. ءبىر كەزدەرى سپورتشى دەپرەسسياعا ءتۇسىپ، ومىردەن ءتۇڭىلىپ، ەسىرتكى قابىلداي باستادى. ونىڭ افريكاداعى ارەكەتى قيىندىقتان قۇتىلۋعا تۇرتكى بولدى. ول پيگمەي تايپاسىن قۇلدىقتان قۇتقارعان. دجاستين رەن جاۋلاسقان ەكى تاراپتىڭ ماسەلەسىن ەش سوعىسسىز شەشىپ بەردى.

ءدجاستيننىڭ وقيعاسى ادامدار شىن قالاسا جاقسى جاققا قاراي وزگەرە الاتىنىن جانە الەمنىڭ كىشكەنە بولىگىن بولسىن وزگەرتە الاتىنىن دالەلدەي تۇسەدى.

دجاستين رەن بالا كەزىنەن سپورتقا جاقىن بولدى. باستاپقى كەزدە ول رەستلينگ پەن گرەك-ريم كۇرەسىنە قىزىقتى. كۇرەسپەن اينالىسقاننان كەيىن تانىلدى. 18 جاسىنان باستاپ كۇرەسپەن كاسىبي تۇردە اينالىسا باستادى. 22 جاسىندا The Ultimate Fighter رەالتي شوۋىنا قاتىستى. وعان ءتۇرلى ۇسىنىستار تۇسە باستادى. الايدا كوپ ۋاقىت وتپەي سپورتشى ەسىرتكى قابىلداپ، ىشىمدىككە اۋەستەنە باستادى. بىرنەشە مارتە وزىنە قول جۇمساماق بولعان. باسىنا تۇسكەن وسىنداي قيىن جاعدايدان قالاي شىعۋ كەرەكتىگىن بىلمەدى. كونگونىڭ تروپيكالىق ورمانىندا ءجۇرىپ، ءبۇتىن ءبىر تايپانى قۇلدىقتان قۇتقارىپ العاننان كەيىن ومىرگە قۇشتارلىعى ويانعان.