ەڭ سوڭعى رەت مەملەكەتتىك ەمحاناعا قاشان قارالعانىم ەستە جوق. اسكەردەن كەيىن (1987-88 جج.) ستۋدەنتتىك ەمحانادا كوميسسيادان وتكەنىم بار ەدى. سول سوڭعىسى عوي دەيمىن. كەيىن ايىندا-جىلىندا "سۇڭقارعا" باس سۇعاتىنمىن. ول كەزدە قىزمەت اقىسى ليبەرالدى ەدى. ءقازىر اسپانداپ كەتىپتى. ەندى كوپتەن ويدا جۇرگەن دەنساۋلىعىمداعى ءبىر ماسەلەنى شەشپەك بولعام. ول ءۇشىن ەكى رەت پىشاققا ءتۇسۋىم كەرەك. وتكەن اپتادا مەملەكەتتىك ەمحاناعا تىركەلىپ، دارىگەرلەردىڭ قاراۋىنا جازىلعام. قۇداي ساقتاسىن! ءبىرىنشى قابىلداعان دارىگەر ۋزي-گە، ونكولوگيالىق ورتالىققا بيوپسيا الۋعا جانە توموگرافياعا جىبەردى.

سونىمەن قوسا، الماتى قالالىق №20 اۋرۋحاناداعى حيرۋرگتەن دە كەڭەس الۋىم كەرەك ەكەن. ۋزي №20 ەمحانادا بار. ءبىراق مامانى جوق كورىنەدى. سوندىقتان جەكەمەنشىك ەمحانانىڭ ۋزي-ىنەن وتۋگە ۇسىنىس جاسادى. ءدال سول سياقتى ەمحانادا توموگرافيا اپپاراتى دا بار. ءبىراق سەبەبىن بىلمەيمىن، ول دا جۇمىس ىستەمەيدى. قالالىق دياگنوستيكالىق ورتالىقتا توموگرافيانىڭ كەزەگىنە ءبىر اي بۇرىن جازىلادى ەكەنسىڭ. سوندىقتان توموگرافيانى دا جەكەمەنشىك كلينيكادان وتۋگە ۇسىنىس جاسادى. ەڭ قىزىعى - جەكەمەنشىك كلينيكانى تاڭداي المايسىڭ. دارىگەردىڭ بەرگەن ۆيزيتكاسى بويىنشا باراسىڭ. ءتىپتى، ءبىر جەكەمەنشىك كلينيكاعا 20 مىڭ تەڭگە تولەسەڭ، ۇيدەن ماشينەمەن اكەتىپ، ۋزي-گە وزدەرى ءتۇسىرىپ بەرەدى ەكەن. 

كەشە ءبىر كۇنىم تۇتاستاي №4 اۋرۋحانا مەن №20 ەمحانا اراسىندا ءوتتى. بىتىرگەن تۇگىم جوق. ءبىراق وزىمشە مىنانداي جاڭالىق اشتىم: №4 اۋرۋحانا ىشىندە دياگنوستيكالىق ورتالىق بار ەكەن. تۇگەلدەي اقىلى قىزمەت كورسەتەدى. دالىزگە كىرگەننەن كىلەم توسەلگەن، پرەيسكۋرانتىنا كوزىم ءتۇسىپ ەدى، تەرىس اينالدىم. باعا دەگەن بوي بەرمەي كەتكەن. ال تەگىن مەديسينالىق قىزمەت كورسەتەتىن بولىمدە شۇعىل جاعدايمەن تۇسكەن ادامدا ەسەپ جوق. دارىگەرلەردىڭ ولارعا قاراۋعا ساعاتتاپ ۋاقىتى جەتپەي جاتىر نەمەسە قاساقانا قارامايدى. ساۋساعى جۇلىنىپ كەتكەن بالا ەكى ساعاتتان استام كومەك الا الماي ىڭىرسىپ وتىرعانىن كوزبەن كوردىم.

وسىندا جاريالادىم. سوندا، ءبىزدىڭ "سالاماتتى قازاقستان" باعدارلاماسى بويىنشا ءبولىپ جاتقان ميللياردتار قايدا كەتىپ جاتىر؟ "مىندەتتى مەديسينالىق ساقتاندىرۋ" بويىنشا جينالعان پالەنباي تريلليون تەڭگە قايدا؟ بۇگىن تاعى دا وسى سحەما بويىنشا جۇگىرىپ ءجۇرمىن. "وپەراسيا جاساتىپ، ەمدەلىپ بولعانىمشا، مەديسينا سالاسىنداعى ءبىرشاما بىلىقتارمەن ارپالىساتىن بولدىم-اۋ" دەپ جىنىم كەلىپ وتىر! ەندى ماعان جەتپەگەنى وسى ەدى!

توقتار جاقاش-تىڭ Facebook-تەگى پاراقشاسىنان الىندى