تاجىكستاندا تىيىم سالىنعان يسلامنىڭ جاڭعىرۋى مەن "گرۋپپا 24" توبىنىڭ جۇزگە جۋىق بۇرىنعى مۇشەلەرى ەلگە ورالىپ جاتىر دەپ حابارلادى وسى ەلدىڭ ىشكى ىستەر مينيسترلىگى (ءىىم).
ولاردىڭ دەنى 2015 جىلدىڭ قىركۇيەك ايىندا گەنەرال ابدۋحاليم نازارزودانىڭ جاساعان بۇلىگىنەن كەيىن رەسەيگە قاشىپ كەتكەن.
تاجىكستان ىشكى ىستەر مينيسترلىگى ازىرلەگەن ۆيدەوسيۋجەتتە ەلگە ورالعاندار وزدەرىنىڭ قاتەلەسكەندەرىن، ءبىراق زاڭعا قايشى قىلمىس جاساماعاندارىن، سول سەبەپتىن بيلىكتىڭ ۇندەۋىنەن كەيىن ۇيىنە قايتقاندارىن مالىمدەيدى.
ەلگە ورالعان "گرۋپپى 24" توبىنىڭ بۇرىنعى جەتى مۇشەسى ءقازىر وپپوزيسيالىق قوزعالىسپەن ەشقانداي بايلانىسى جوق ەكەنىن رەسمي مالىمدەدى. ولاردىڭ اراسىندا سوڭعى ۋاقىتقا دەيىن الەۋمەتتىك جەلىلەردە تاجىك بيلىگىن اشىق سىناپ كەلگەن ازاماتتار دا بار.
ساراپشىلار بۇرىنعى وپپوزيسيونەرلەر شەتەلدەگى ءومىردىڭ اۋىرلىعىنان، امالسىز وتانىنا ورالدى دەيدى.
تاجىكستان پرەزيدەنتى جانىنداعى ستراتەگيالىق زەرتتەۋلەر ورتالىعىنىڭ ديرەكتورى سايفۋللو سافاروۆ مەملەكەتتىڭ قۋعىنداعى وپپوزيسيونەرلەرگە قاتىستى ساياساتى وزگەرمەگەنىن ايتادى. ءبىراق ەشقانداي قىلمىس جاساماعان بۇرىنعى مۇشەلەر كەز كەلگەن ۋاقىتتا ەلگە ورالا الادى دەيدى.
