«رەپورتەر» سايتىندا «نادو سروچنو ۆاليت: رۋسسكيە بەگۋت يز كازاحستانا» اتتى ماقالا جارىق كوردى. ادەيى ارانداتۋ ءۇشىن جازىلعان ماقالا ەكەنى كوزگە ۇرىپ تۇر. بۇعان دەيىن دە كورشى ەلدىڭ جۋرناليستەرى ارانداتۋ ماقساتىندا ءتۇرلى ماقالا مەن باعدارلامالار شىعارعان. ەڭ قىزىعى، اتالعان سايتتىڭ بايلانىس تەلەفوندارى، مەكەن-جايى مەن قىزمەتكەرلەرى تۋرالى اقپارات مۇلدەم كورسەتىلمەگەن. 

وزگە ەلدىڭ ساياساتىنا، ىشكى ماسەلەلەرىنە قول سۇعۋعا، ءبۇتىن ءبىر ۇلتتىڭ نامىسىنا تيۋگە، قورلاۋعا ەشكىمنىڭ دە قۇقىعى جوق. الايدا بۇل قۇقىقتى بەلشەسىنەن باسىپ جۇرگەن كورشى ەلدىڭ جۋرناليستەرى بۇل ادەتىنەن تىيىلار ەمەس. مۇنداي ارەكەت جۋرناليستىك ەتيكاعا دا جات ەكەندىگىن ەسكەرتكىمىز كەلەدى.

ساراپشىلاردىڭ ايتۋىنشا، كورشى ەلدىڭ ارانداتۋشىلىق ماندەگى ۇلتارالىق قاقتىعىستى تۋعىزاتىن اقپاراتتىق شابۋىلىنا ءمان بەرمەۋ قاجەت. «ءاربىر ۇرگەن يتكە تاس الىپ جۇگىرۋدىڭ قاجەت جوق» دەگەن پىكىردى ۇستانۋ كەرەك دەيدى ولار.

دەسە دە ماقالا استىندا جازىلعان پىكىرلەر قازاقستاندىقتاردىڭ شامبايىنا تيمەي قويمايدى. "قازاقستانداعى ورىستار مەن ورىس ءتىلىنىڭ قۇقىعى شەكتەلىپ جاتىر" دەپ دابىل قاققان شايانوۆ اندرەي ۆيكتوروۆيچ دەگەن ەسىممەن سايتقا تىركەلگەن جەلى قولدانۋشىسى سەپاراتيستىك ماندەگى پىكىر قالدىرعان. قازاقتاردى جەك كورەتىنىن جازىپ، كىشكەنتاي قازاق بالالارىن قورلاعىسى كەلەتىنىن اشىق تۇردە ايتادى.

الەۋمەتتىك جەلىدە اتالمىش ماقالا مەن جوعارىداعى پىكىر قىزۋ تالقىلانىپ جاتىر. سەبەبى شايانوۆ اندرەي ۆيكتوروۆيچ قازاقستانداعى «بارىس» حوككەي كلۋبىنىڭ جاتتىقتىرۋشىسى. شىعىس قازاقستان وبلىسىنىڭ تۋماسى. ونىمەن قويماي فوتوسى دا جۇكتەلگەن.

ءمان-جايدى ءبىلۋ ءۇشىن «بارىس» حوككەي كلۋبىنىڭ باسپا ءسوز قىزمەتىنە حابارلاستىق. ەۆگەنيي اكمانوۆ ەسىمدى باسپا ءسوز حاتشىسى اندرەي ۆيكتوروۆيچتىڭ كلۋبپەن بىرگە جارىسقا نوۆوسيبيرسكىگە كەتىپ بارا جاتقانىن جانە تەك 7 تامىزدا عانا ەلگە قايتاتىنىن جەتكىزدى. ەلدى دۇرلىكتىرمەي ماسەلەنىڭ توق ەتەرىن ايتۋىن سۇراپ، شايانوۆتىڭ وزىمەن سويلەسپەك ەدىك، سۇحباتتى ءبىر اپتاعا شەگەردى. وندا دا جۋرناليستەرگە ماقالادا جازىلعان پىكىرگە قاتىستى ءلام-ميم دەيتىنى بەلگىسىز. حالىق قىزۋ تالقىلاپ جاتقاندا شەتكەرى قالعانى تاڭعالدىردى. جول ءجۇرىپ بارا جاتسا دا بىرنەشە مينۋتىن ءبولىپ ماسەلەنىڭ انىق-قانىعىن ايتسا ەل دە تىنىشتالار ەدى. 

باسپا ءسوز حاتشىنىڭ ايتۋىنشا، ارانداتۋشى مازمۇنداعى پىكىر قالدىرعان شايانوۆ ەمەس، وزگە بىرەۋ.

- بۇل پىكىردى قالدىرعان اندرەي ۆيكتوروۆيچ ەمەس. الدەبىر قاسكويلەر ونىڭ اتىنان جازىپ وتىر. مۇنداي جاعداي ءبىرىنشى ورىن الىپ جاتقان جوق. اندرەي ۆيكتوروۆيچ قۇقىق قورعاۋ ورگاندارىنا شاعىم تۇسىرگەن بولاتىن. ول قازاقستاننىڭ پاتريوتى. «بارىس» كلۋبى ءۇشىن تالماي ەڭبەك ەتىپ جۇرگەن ازامات. ونىڭ اتىنان جازىلعان پىكىرلەرگە ونىڭ جەكە باسىنىڭ قاتىسى جوق. ءوزىمىزدىڭ الەۋمەتتىك جەلىدە دە ونىڭ اتىنان بىرەۋلەر وسىنداي پىكىر قالدىرعان ەكەن. ءبىز بىردەن اندرەي ۆيكتوروۆيچكە حابار بەردىك. ول قۇقىق قورعاۋ ورگاندارىنا حابارلاستى. ول ادامدى تاپتى ما، تاپپادى ما حابارسىزبىن. سەبەبى ەڭبەك دەمالىسىنا شىعىپ كەتتىم ، - دەيدى «بارىس» حوككەي كلۋبىنىڭ باسپا ءسوز قىزمەتكەرى. 

جاتتىقتىرۋشى راسىمەن دە شاعىم ءتۇسىردى مە، ول شاعىمى بويىنشا ءىس جۇرگىزىلىپ جاتىر ما، ونىڭ ناتيجەسى قانداي بولعانىن ءبىلۋ ءۇشىن ق ر باس پروكۋراتۋرانىڭ باسپا ءسوز قىزمەتىنە حابارلاستىق. ولار بۇگىن سۇراقتارىمىزعا جاۋاپ بەرە المايتىنىن ايتادى.