بىشكەك ماڭىنداعى تاۋدا تاس كوشكىنىنەن قازا تاپقاندار عىلىمي-زەرتتەۋ ينستيتۋتىنىڭ قىزمەتكەرى ەكەنى انىقتالدى. ودان بولەك 3 قازاقستاندىق ازامات ءتۇرلى جاراقات العان. تاۋ تاستارىنىڭ قۇلاۋىنان زارداپ شەككەندەردى قۇتقارۋ وپەراسياسىنا «قازاۆياقۇتقارۋدىڭ» تىكۇشاعى جونەلتىلگەن ەدى. ءقازىر ولاردى ەلگە جەتكىزۋ شارالارى قولعا الىنعان. قۇتقارۋ وپەراسياسى جونىندە ەۋرازيا ءبىرىنشى ارناسى حابارلايدى.

بىشكەك قالاسىنان 40 شاقىرىمداي جەردەگى سكريابين مۇزدىعى. وسى جەردە ءبىر توپ ساياحاتشى تاۋدان قۇلاعان تاستاردىڭ استىندا قالىپ قويعان. سالدارىنان 3 قازاقستاندىق ازامات جاراقات الىپ، ءبىر ادام قازا تاپتى. مارقۇم 42 جاستاعى الماتى قالاسىنىڭ تۇرعىنى ۆيتاليي دۆورەسكيي بولىپ شىقتى. ول عىلىمي-زەرتتەۋ ينستيتۋتىندا جۇمىس ىستەگەن ەكەن. 

ال جاراقات العان تاعى ءبىر قازاقستاندىق 50 جاستاعى ماقسات ىرگەبايەۆ ەكەنى انىقتالدى. ول سپورت جانە تۋريزم اكادەمياسىندا وقىتۋشىسى. ولار قىرعىزستان جانە رەسەيلىك ارىپتەستەرىمەن  6 مىڭ شاقىرىم بيىكتىكتەگى تاۋعا كوتەرىلۋ كەرەك بولىپتى. جۋىردا عانا بولگاريادا دوكتورلىق ديسەرتاسياسىن قورعاعان ول شەت ەلدەن كەلگەن سوڭ ۇيىندە ەكى-ۇش كۇن عانا بولىپ، وسى ساپارعا اتتانعان ەكەن.

«مەنىڭ اكەم جاڭا عانا زۆونداعان. ەرتەڭ نەمەسە بۇرسىگۇنى كەلەم دەپ. ءبىراق، اكەم باسقا نومەرمەن زۆونداعان. ونى باسقا بىرەۋ دەپ ويلادىم» - دەيدى ماقسات ىرگەبايەۆتىڭ 12 جاستاعى ۇلى جاندوس يسلاموۆ.

«بيىلعى جىلى 6 مىڭ كم باعىندىرۋ كەرەك بولاتىن. ول تاۋ  قىرعىزستاننىڭ اۋماعىندا. ول ايتتى بىزگە پروگرامما بويىنشا، 15ء-شى تامىزعا دەيىن كەلۋى كەرەك. ءبىراق، بۇگىن تاڭەرتەڭ بىزگە قوڭىراۋ شالىپ، ەرتەڭ نەمەسە بۇرسىگۇنى كەلەمىز دەدى» - دەيدى ماقسات ىرگەبايەۆتىڭ اكەسى يسلام.

سكريابين مۇزدىعىنا شىعىپ، زەرتتەۋ جۇمىستارىنا كىرىسپەك بولعان عالىمدارعا تاس كوشكىنى كەدەرگى بولعان. الدىن الا دەرەك بويىنشا، تاستاردىڭ قۇلاۋىنا جەر ءدۇمپۋى سەبەپ بولۋى مۇمكىن. دەرەۋ وقيعا ورنىنا جەتكەن «قازاۆياقۇتقارۋ» تىكۇشاعى تاۋدا قالىپ قويعان ازاماتتارعا كومەك كورسەتكەن. 

«بۇگىن ساعات وندا تىكۇشاق بارىپ، تاس كوشكىنىنىڭ استىندا قالعان مارقۇمنىڭ دەنەسىن الىپ كەتتى.  زارداپ شەككەندەردەن  جاۋاپ الىنىپ، قاجەتتى شارالار جاسالىندى.  شامامەن تۇسكى ءبىر جارىم شاماسىندا ۇشاق الماتىعا قونىپ، قايتىس بولعان ازاماتتىڭ  دەنەسى الماتى قالاسىنىڭ ىشكى ىستەر دەپارتامەنتىنە بەرىلدى» - دەيدى ق ر ىشكى ىستەر ءمينيسترىنىڭ ورىنباسارى يۋريي يلين.

ەۆاكۋاسيا باراسىندا مۇزدىقتان رەسەيدىڭ ءۇش ازاماتى مەن قازاقستاننىڭ ءۇش ازاماتى، سونداي-اق قازا بولعان ءبىر قازاقستاندىق شىعارىلعان. زارداپ شەككەن ەكى كىسى الماتى قالاسىنان بولسا، تاعى ءبىرى وسكەمەن قالاسىنىڭ تۇرعىنى. ىشكى ىستەر ءمينيستىرىنىڭ ورىنباسارىنىڭ ايتۋىنشا، ءقازىر جاراقات العان تۋريستەردىڭ ومىرىنە ءقاۋىپ ءتونىپ تۇرعان جوق.