"قوس ءسابيىمىزدى ولتىرگەن دارىگەرلەر جاۋاپقا تارتىلسىن!" الماتى وبلىسىندا ءبىر جىلدا ەكى بىردەي پەرزەنتىنەن ايرىلعان اتا-انا كومەك سۇرايدى. ولاردىڭ ايتۋىنشا، اۋداننىڭ باس دارىگەرى باستاعان اق حالاتتىلار  قۇرساقتاعى ساپ-ساۋ نارەستەنى بوساندىرۋدىڭ ورنىنا  ءولتىرىپ تىنعان. الايدا، ولار ءوز كىناسىن مويىنداپ، كەشىرىم سۇراۋدىڭ ورنىنا بارلىعىن نارەستەنىڭ اناسىنا جاپقان كورىنەدى. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنىڭ دەرەگىنە سۇيەنىپ حابارلايدى.

سارىوزەك اۋىلىنىڭ تۇرعىنى نۇرجان ماحانوۆ بۇل كۇندە 2 بالانى قۇشاعىندا الپەشتەۋى ءتيىس بولعان. الايدا، قوس قۇلىنىنان ءبىر-اق  جىلدا ايرىلىپ، ءوز قولىمەن جەر قوينىنا تاپسىرىپتى. سوڭعى رەت 8 ايلىق شاقالاقتى  4 كۇن بۇرىن عانا ۇلكەنىنىڭ جانىنا جايعاستىرعان ەكەن. قايعىدان قان جۇتقان ازامات بۇعان اۋدانداعى دارىگەرلەردىڭ سالعىرتتىعى سەبەپ بولدى، دەيدى.

«ءبىرىنشى پەرزەنتىمنەن ايرىلدىم، مىنە. قىز بالا بولاتىن، 9 اي تولعاعى كەپ سودان ءولى تۋىلىپ وتىر. ءبىرىنشى پەرزەنتىم وسى دارىگەرلەردىڭ سالعىرتتىعىنىڭ ارقاسىندا. ودان مىنە، 4 كۇن بولدى ۇل بالامنان ايرىلىپ وتىرمىن، ارالارى 1 جىل 2-اق اي. اللا، ەشكىمنىڭ باسىنا بەرمەسىن دەيمىن. وسى كەربۇلاق اۋدانى سارىوزەك كەنتىنىڭ مىنا دارىگەرلەرىنىڭ كەسىرىنەن دەپ ايتۋعا تۋرا كەلىپ تۇر. بۇدان كەيىنگى بالالار ولمەسىنشى» - دەيدى سارىوزەك اۋىلىنىڭ تۇرعىنى نۇرجان ماحانوۆ.

ماحانوۆتار وتباسى تۇڭعىشتارىنان 2017 جىلى ايرىلعان ەكەن. 9 اي تولىپ، تولعاعى قىسقان ساتتە اۋدان دارىگەرلەرى ەم-دوم جاساۋدىڭ ورنىنا تالدىقورعان قالاسىنا جىبەرگەن كورىنەدى. الايدا، 90 شاقىرىمداعى وبلىس ورتالىعىنا جەتكەنشە شاقالاق كىندىككە وراتىلىپ، جان تاپسىرعان. ارادا 5 اي وتكەندە جۇبايى كەزەكتى رەت بالا كوتەرىپ، دۇنيەگە قىز كەلەدى دەپ قۋانعان جاس وتباسى تاعى دا قايعىدان قان جۇتادى. 

«23-شىلدە ايىندا ءوز اياعىممەن وسى كەربۇلاق اۋدانى سارىوزەك كەنتىندەگى بولنيساعا باردىم. ول
جاقتا مەنى سوحرانەنيەگە جاتقىزدى، وتەك اياعىمدا، كىشىگىرىم وتەك بولعان سوڭ جاتقىزدى. ودان كەيىن ەكى كۇن مەن امپەسيلين ۋكولىن الدىم، تاڭەرتەڭ، كەشكە. ودان كەيىن سرەدا 25-كۇنى تەراپيەۆت ايداروۆا كەلىپ، نازناچەنيە قالدىرىپ كەتتى، كەشكە سەفازالين سالىنادى دەپ» - دەيدى سارىوزەك اۋىلىنىڭ تۇرعىنى مادينا جاقسىلىقبايەۆا.

ءبارى دە دارىگەرلەردىڭ سيەۆازالين انتيبيوتيگىن سالعان ساتتەن باستالعان. ارادا جارتى ساعات وتكەن سوڭ، جۇكتى ايەلدىڭ ءىشى اۋىرىپ، جاتىرىنان قان كەتەدى. ءىس ناسىرعا شاپپاسىن دەپ جۇبايى وتا جاساۋعا كەلىسىم بەرەدى. الايدا، ونى جاساۋعا ءتيىس دارىگەرلەر جارتى ساعات بويى ناۋقاستىڭ جانىنا كەلمەگەن ەكەن. دەگەنمەن، اۋداننىڭ باس دارىگەرى ءوز قاراماعىنداعىلارعا شاڭ جۋىتپاي وتىر. سوزىنە سەنسەك، گيپپوكراتقا انت بەرگەن ابزال جاندار وزىنە مىندەتتەلگەن ءىستى ادال اتقارىپ، قولدان كەلگەنىن جاساعان.   

«1 كيلو 900 گراممدىق بالا دۇنيەگە كەلەدى. بالا، جاڭاعى ەشقانداي ءتىرى دەگەن بەلگىسى جوق دەيدى. ءبىراق وعان رەانيماسيالىق بارلىق شارالار جاسالادى. ول جاقتا رەانيماتولوگىمىز بار، پەدياتورىمىز بار، ميكروپەدياتورىمىز بار. سولار بارلىعى رەانيماسيالىق ەم-شارا جاساعاننان كەيىن، وكىنىشكە قاراي، بالا تىرىلمەدى» - دەيدى كەربۇلاق اۋداندىق اۋرۋحاناسىنىڭ ديرەكتورى قانات قالدىبايەۆ.

قانسىراپ جاتقان جۇبايىن وتا جاساۋ بولىمىنە دارىگەرلەر ەمەس ءوزى جەتكىزگەن نۇرجان ماحانوۆتىڭ سوزىنشە، وتادان كەيىن شاقالاقتىڭ جىلاعان داۋسى ەستىلگەن. ءسابيدىڭ ءتىرى تۋىلعانىن پەرزەنتحاناداعى مەدبيكەلەر دە راستاعان كورىنەدى. الايدا، بۇل تۋرالى ءتىس جارماۋدى وتىنگەن، سەبەبى، جۇمىستارىنان ايرىلىپ قالامىز دەپ قورقىپ وتىر، دەيدى اشىنعان اكە.  

«ءسىز وتىرىك ايتىپ وتىرسىز، ءسىز قۇدايدان قورىقپايتىن ادام ەكەنسىز. مەن سىزگە سەنۋدەن قالدىم. 10
مينۋتتا كەلدىك كەسەروۆا دەپ، ول جارتى ساعات وپەراسيوننىيدا جاتقان. ايەلىمنىڭ دە ەسى دۇرىس قوي، ول بالاسىنان ايرىلعانمەن، مىنا پسيحولوگيادان قۋىپ كەتكەن جوق، ول ەرتەڭ دە ايتىپ بەرە الادى. ال، انا سەفازالين سالعانىن ايەلىمنىڭ ءوزى ايتىپ وتىر» - دەيدى سارىوزەك اۋىلىنىڭ تۇرعىنى نۇرجان ماحانوۆ.

قوس پەرزەنتىنەن قاپىدا ايرىلعان ەرلى-زايىپتىلار مەن ونىڭ تۋىستارى ەندى سوت-مەديسينالىق ساراپتامانىڭ قورىتىندىسىن كۇتەتىن بولادى. الايدا، ونداعى ماماندار شىندىقتىڭ بەتىن اشىپ بەرەدى دەگەنگە سەنبەيتىندەرىن دە جاسىرمايدى. ءبىر بەلگىلىسى - قۇرساققا بىتكەن كەلەسى ءسابيدى جاس جۇبايلار كەربۇلاق اۋدانىنداعى پەرزەنتحاناعا بوساندىرمايمىز دەپ بەكىنىپ وتىر.