زامانىڭ تۇلكى بولسا، تازى بولىپ شال دەگەننىڭ كەرىسى مە الدە جاڭا زاماننىڭ ءسىز بەن ءبىز بىلمەيتىن موداسى ما بەلگىسىز. كەيىنگى ۋاقىتتا ەستىر قۇلاققا تۇرپىدەي تيەتىن ماعىناسىز ەسىمدەر كوبەيىپ كەتتى. ستاتيستيكا كوميتەتىنىڭ مالىمەتىنە سايكەس ەلىمىزدە ەكى نۇرپرەزيدەنت، ءتورت اقوردا، ون نۇروتان جانە ون ءۇش نۇرلىجول اتتى بالا بار ەكەن. ماماندار بولسا مۇنداي ءۇردىس دۇرىس ەمەس دەگەن پىكىردە. بالاعا ات قوياردا الدىمەن نەنى ءبىلۋ كەرەك؟ بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ حابارلايدى. 
 
العاشقى كەيىپكەرىمىزدىڭ ەسىمى - فەستيۆال. استانا قالاسىنىڭ تۇرعىنى. «اتىمدى مەكتەپ جاسىندا قاتارلاستارىم كەلەكە قىلىپ مازاقتايتىن كەزدەر بولدى. ءبىراق ۋاقىت وتە كەلە ۇيرەنىسىپ كەتتىم» - دەيدى ول. ءبىر قىزىعى، فەستيۆال دۋماندى، مەرەكەلەرگە تولى ورتانى ۇناتادى ەكەن. اتىنا زاتى ساي  دەگەن تەڭەۋدە وسىندايدا ايتىلسا كەرەك.
  
«كوبىنەسە كوڭىلدى جەرلەردە جۇرەمىن. كوڭىلدى جەرلەردى جاقسى كورەمىن. جۇمىس ىستەگەندە تاربيە جۇمىستارىن كوبىنە وزىمە العىم كەلەدى. ءىس-شارالاردى كوپ العىم كەلەدى. سونداي جۇمىستارمەن اينالىسقىم كەلەدى. كونسەرت ۇيىمداستىرۋ. بولماسا ءبىر بالانىڭ ءبىر ادەمى قاسيەتىن كوردىم بە، ءانشى مە الدە ءبيشى مە وزىمە تارتىپ تۇرعىم كەلەدى. سونداي نارسەلەر ماعان قاتتى ۇنايدى» - دەيدى قالا تۇرعىنى فەستيۆال بولات قىزى.

ەرەكشە ەسىمدەردىڭ توپتاماسىنا ەلىمىزدە سوڭعى جىلدارى وتكەن ايتۋلى شارالار دا اسەر ەتپەي قويمادى. رەسمي دەرەككە سايكەس، قازاقستاندا 57 ازيادا جانە 86 سامميت ءوسىپ كەلەدى. بۇعان حالىقارالىق كورمەنىڭ ارقاسىندا بايبىبەكسپو جانە نۇرالەمدەر قوسىلدى. فيلولوگ بولات ساعىنبەك ۇلى اتالعان ءۇردىس كەڭەس زامانىنان قالعان ءبىر ادەت دەيدى. قىزىل تۋدىڭ استىندا كومسومول بولعان كەي اتا-انا بالالارىنا سوۆەت، سەز، پارتيا ءتىپتى تراكتور سىندى ات قويعان. 

«ءبارىبىر بۇل جەردە ءداستۇردىڭ زاڭدىلىعى بار. قازاقتار وسى ءداستۇردى بەرىك ساقتاپ كەلە جاتىر. قۇپتاۋ-قۇپتاماۋعا كەلگەندە ءبارىن بىردەي قۇپتاي بەرۋگە بولمايدى. سەبەبى، بالاعا ات قويۋدا ويلانۋ كەرەك. ونىڭ وسكەن ورتاسى بولادى، زامان وزگەرەدى. زامان وزگەرگەندە ارحايزمگە اينالعاندا كەي ەسىمدەر كۇلكىگە اينالادى دەگەن سياقتى. وسىنىڭ ءبارىن ەسكەرۋ كەرەك سياقتى» - دەيدى فيلولوگيا عىلىمدارىنىڭ كانديداتى بولات ساعىنبەك ۇلى.  

ادامنىڭ ەسىمى ومىرىنە ءسوزسىز اسەر ەتەدى. يمامدار بۇعان سەنىمدى. سوندىقتان ات قوياردا الدىمەن بالانىڭ بولاشاعىن ويلاۋ كەرەك دەگەنگە سايادى.  

«بۇرىنعى كەزدەردە قاسقىرباي، تۇلكىباي، يتباي دەگەن سياقتى اتتاردى قويعان. قورازباي دەپ تە اتاعان. ارينە، ول ۋاقىتتا قويىلعان ەسىمدەردى قوياردا كوڭىلدەرىندە ءبىر جاقسى نيەتتەرى بولسا كەرەك. ءبىز ولاردى ايىپتاۋدان اۋلاقپىز. ءبىراق بالاعا دۇرىس ات قويعانىمىز دۇرىس بولادى. ءبىر ماعىنالى، يسلام تالاپتارىنا كەلەتىن اتتاردى قويعان دۇرىس» - دەيدى «نۇر استانا» ورتالىق مەشىتىنىڭ نايب يمامى ءادىلحان سەرىكباي.

بوسانار الدىندا ءتۇس كورەدى

ءيا، 8 جاستاعى بايتەرەكتىڭ ەسىمىنىڭ قويىلۋى قۇددى ءبىر فانتاستيكاعا تولى وقيعا ما دەرسىڭ. كوزبەن كورىپ، ءوز قۇلاعىڭمەن ەستىمەسەڭ سەنۋ قيىن. ءبىراق، اپكەسىنىڭ ايتۋىنشا بايتەرەك ومىرگە كەلەردە ايان
بەرىلگەن. 

«انام جاڭاعى تۇسكە سەنەدى. ءيا شىنىمەن اتىن بايتەرەك دەپ قويايىن دەيدى. سولاي تۇسىندە اقساقال كەلىپ باتا بەرەدى. بايتەرەك اعاشىنىڭ جانىندا قۇستار ۇشىپ جۇرەدى بيىكتە. بيىكتەن جەرگە قارايدى انام. مۇمكىن ول بەلگى شىعار، ءبىز سولاي ويلادىق» - دەيدى بايتەرەكتىڭ اپكەسى التىناي باقىت.

جاقسىلىققا ىرىمداپ قويىلسا كەرى كەتپەس. بايتەرەكتىڭ ارمانى اسقاق. مەسسي مەن رونالدۋ سىندى بولماسا دا توپ جارىپ، تەڭبىل دوپتى قاقپاعا ءدال كوزدەيتىن فۋتبولشى بولامىن دەيدى.  

«مەنىڭ اتىم بايتەرەك. مەن سەگىز جاستامىن. ءۇشىنشى سىنىپقا كوشتىم. انام ءتۇس كورگەن ايان. مەنىڭ ارمانىم فۋتبولشى بولۋ. مەن استاناعا جانكۇيەرمىن» - دەيدى وقۋشى بايتەرەك باقىت. 

نۇرپرەزيدەنت، ەكسپوباي، نۇروتان، ازيادا، سامميتحان دەگەن بالالار ەرتەڭ-اق ەر جەتىپ، ەل قاتارىنا قوسىلادى. بۇگىندە ماقتانمەن قويىلعان اتتىڭ ەرتەڭ-اق سوۆەت، ماركس، پارتيا سياقتى ەسكىرىپ، ەل اراسىندا كۇلكىگە اينالماسىنا ەشكىم كەپىلدىك بەرمەيدى. بۇل مامانداردىڭ پىكىرى.