2018 جىلدىڭ ءبىرىنشى توقسانىندا «ازاماتتارعا ارنالعان ۇكىمەت» مەملەكەتتىك كورپوراسيسىنىڭ جامبىل وبلىستىق فيليالىندا 900 مىڭ مەملەكەتتىك قىزمەت كورسەتىلگەن. ونىڭ 450 مىڭى ەلەكتروندىق فورماتتا ورىندالدى، - دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.  

«ازاماتتارعا ارنالعان ۇكىمەت» مەملەكەتتىك كورپوراسيسىنىڭ جامبىل وبلىستىق فيليالىنىڭ ديرەكتورى دانيار مەدەتبەكوۆتىڭ ايتۋىنشا، جامبىلداعى فيليال العاشقى جارتىجىلدىقتىڭ ىشىندە 900 مىڭ مەملەكەتتىك قىزمەتتى كورسەتىپ ۇلگەردى، ونداعى 450 مىڭ قىزمەت ەلەكتروندىق فورماتتا ورىندالدى. الەۋمەتتىك قامسىزداندىرۋ بويىنشا 35 مىڭ مەملەكەتتىك قىزمەت كورسەتىلدى.

سونداي-اق، ول وڭىردەگى مەملەكەتتىك كورپوراسيا كەڭسەلەرىندە وز-وزىنە قىزمەت كورسەتۋ ءبولىمى جۇمىس ىستەيتىنىن ايتتى.

«ءاربىر فرونت-كەڭسەلەردە «Connection point» وزىنە-وزى قىزمەت كورسەتۋ سەكتورى جۇمىس جاسايدى. مەمكورپوراسيا ماماندارى ءتۇسىندىرۋ جۇمىستارىن وتكىزىپ، ەلەكتروندىق ۇكىمەت پورتالى ارقىلى قىزمەت الۋدىڭ امالدارىن كورسەتەدى. ولار جىلدىڭ باسىنان بەرى ءوڭىردىڭ 480 مەكەمەسى مەن ۇيىمىنا بارىپ، 87 مىڭ ادامعا قىزمەت كورسەتكەن. وسىنداي 19 سەكتور جۇمىس جاسايدى. جارتى جىلدىڭ ىشىندە جامبىلدىقتارعا 330 مىڭ قىزمەت كورسەتىلگەن»، - دەدى د. مەدەتبەكوۆ.

ونىڭ ايتۋىنشا، بۇدان بىلاي جاڭا تۋعان سابيلەردى تىركەۋ ءۇشىن ءوتىنىش اۆتوماتتى تۇردە جازىلادى.

«ازاماتتارعا ارنالعان ۇكىمەت» «ۇات» اق-مەن بىرلەسىپ بالانىڭ دۇنيەگە كەلۋىنە قاتىستى قىزمەت كورسەتۋ بويىنشا سىنامالى جوبانى ۇسىندى. ەندى دۇنيەگە كەلگەن سابيلەردى تىركەۋ ءۇشىن ءوتىنىش اۆتوماتتى تۇردە تۇسەتىن بولادى. بارلىق ماعلۇماتتار ءارتۇرلى مەملەكەتتىك ورگانداردىڭ اقپاراتتىق جۇيەلەرىنەن تۇسەتىن بولادى. مالىمەتتەر جەتپەي جاتقان جاعدايدا قىزمەت الۋشى ادامنان سمس-حابارلاما ارقىلى سۇراتىلادى»، - دەدى ول.

تاعى دا ايتا كەتەرلىگى، جاقىندا eGov.kz پورتالىندا «انىقتاماسىز قىزمەتتەر» ءبولىمى ءوز جۇمىسىنا كىرىسكەن بولاتىن.

«ەندى ازاماتتارعا مەملەكەتتىك ورگاندارعا مەكەنجاي مەن جىلجىمايتىن مۇلىككە قۇقىعى جونىندە تىركەلگەن انىقتاما اكەلۋدىڭ قاجەتى جوق. مەملەكەتتىك ورگاندار قاجەت ماعلۇماتتاردى ەلەكتروندىق ۇكىمەت پورتالى ارقىلى سۇراتاتىن بولادى. سونداي-اق، مەكەنجاي بويىنشا ونلاين-تىركەۋ ءتارتىبى وزگەردى. ەندى تىركەلۋ ءۇشىن نەبارى 20 مينۋت قاجەت»، - دەپ تۇيىندەدى ديرەكتور.

ايتا كەتەيىك، «ەلەكتروندىق ۇكىمەت» – بۇل مەملەكەتتىك قىزمەت كورسەتۋلەردى اۆتوماتتاندىرۋ جانە وڭتايلاندىرۋ، قوعامدى مەملەكەتتىك باسقارۋ ماسەلەلەرىنە تارتۋدى ارتتىرۋ بولىپ تابىلادى. «ەلەكتروندىق ۇكىمەتتى» قۇرۋ يدەياسىن ق ر پرەزيدەنتى ن. ءا. نازاربايەۆ 1997 جىلى «قازاقستان-2030» مەملەكەتتىك باعدارلاماسىندا كوتەرگەن بولاتىن.