ادامي كاپيتال ەكونوميكانى قوزعايتىن كۇش. ول كەز كەلگەن كومپانيانىڭ دامۋىنا اسەر ەتىپ، تابىستى ارتتىرادى. بۇل تۋرالى «ادامي كاپيتالدىڭ» دامۋى جونىندەگى ەكسپەرت ۆەرا سولوماتينا ايتتى دەپ جازادى Qamshy.kz اقپارات اگەنتتىگى «زەردە» حولدينگىنىڭ دەرەگىن نەگىزگە الىپ.
«كوپتەگەن كومپانيالار «ادامي كاپيتال» تۇجىرىمداماسىن وڭتايلى قولدانىپ ءجۇر. ويتكەنى، قاتتى دامىپ، باسەكەگە قابىلەتتى بولۋ ءۇشىن «ادامي كاپيتال» قوزعاۋشى كۇش بولىپ تابىلادى. وسىنداي كومپانياداعى ادامدار كاسىپورىننىڭ دامۋى ءۇشىن قىزمەت ەتەدى. سايكەسىنشە، بۇدان تابىس ونىمدىلىگى ارتادى»، - دەدى ۆ. سولوماتينا.
ونىڭ ايتۋىنشا، ادامي كاپيتال ەكونوميكا مەن ءبىلىم سالاسىن ۇلكەن وزگەرىسكە اكەلەدى. ول ەكونوميكانىڭ قۇرىلعىسى ەمەس، كەرىسىنشە ەكونوميكانى قوزعايتىن كۇش سانالادى.
سۇحبات بارىسىندا ەكسپەرت «ادامي كاپيتالدىڭ» ەلىمىزدە قالاي ءجۇرىپ جاتقاندىعىنا توقتالىپ ءوتىپ، وزىندىك باعاسىن بەردى.
«مەن بۇل ەلگە كەلۋ ارقىلى، ەلدە جانە شەتەلدە ءبىلىم العان جوعارى بىلىكتى كوپ ادامدارمەن ارالاستىم.ولار ءوز كەزەگىندە قازىرگى زامانعى جاڭا تاسىلدەردى جاقسى مەڭگەرگەن. وسىعان قاراپ، مەن قازاقستان بۇل ماسەلەدە الدىڭعى قاتاردا كەلە جاتىر دەپ ايتا الامىن»، – دەپ اتاپ ءوتتى ساراپشى.
ۆەرا سولوماتينانىڭ پىكىرىنشە، ادامي كاپيتال مەملەكەتتى دامىتاتىن درايۆەر دەسە دە بولادى. ول داميتىن بولسا الدىڭعى قاتارداعى ەلدەردىڭ قاتارىنان كورىنۋ مۇمكىن بولماق.
«ادامي كاپيتال مەملەكەت ءۇشىن رەسۋرس قانا ەمەس، ەلدى العا قاراي جىلجىتاتىن قوزعاۋشى درايۆەر. نەگە دەسەڭىز، ءبىز ادامي كاپيتال ارقىلى ينۆەستيسيانىڭ دامۋىنا، ءبىلىم ساپاسىنىڭ ارتۋىنا، وسى ارقىلى مەملەكەتتىڭ دامىعان ەلدەردىڭ قاتارىنان كورىنۋىنە جاعداي جاسايمىز. ۇنەمى جاقسى جاققا وزگەرۋ، دامۋعا ۇمتىلۋ كەز كەلگەن مەملەكەتتى العا جەتەلەيدى»، - دەپ تۇيىندەدى ول.
ادامي كاپيتال - جۇمىسشىنىڭ ەڭبەك ەتۋ مۇمكىندىگىن، ەڭبەك ونىمدىلىگى مەن ساپاسىن كوتەرۋ ماقساتىندا ادامدارعا سالىناتىن كاپيتال. وسىنىڭ ناتيجەسىندە قىزمەتكەردىڭ ەڭبەگى جەمىستى بولىپ، جۇمىس ساپاسى ارتادى. «ادام كاپيتالى» تەرمينى العاش رەت نوبەل سىيلىعىنىڭ يەگەرلەرى، امەريكالىق ماكروەكونوميستەر تەودور شۋلس پەن گارري بەككەردىڭ حح عاسىردىڭ 80-جىلدارىنداعى ەڭبەكتەرىندە پايدا بولدى. ت.شۋلس ناشار دامىعان ەلدەردىڭ قيىن جاعدايىن زەرتتەي كەلە، كەدەي ادامداردىڭ ءال-اۋقاتىن جاقسارتۋ جەرگە، تەحنيكا نەمەسە ولاردىڭ كۇش-جىگەر جۇمساۋىنا ەمەس، بارىنەن دە بىلىمگە بايلانىستى دەگەن قورىتىندىعا كەلدى. ول ەكونوميكانىڭ مۇنداي ساپالىق قىرىن ادام كاپيتالى دەپ اتادى. گ.بەككەرگە كەلەتىن بولساق، ول ادام كاپيتالىنىڭ تەوريالىق مودەلىن جاساپ، وسى ماسەلە بويىنشا «ادام كاپيتالى» كىتابىن جارىققا شىعاردى.
