ەلباسى بەسىنشى كاسپيي سامميتىنە دايىندىق ماسەلەلەرى جونىندە كەڭەس وتكىزدى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.
باسقوسۋدا كاسپيي تەڭىزىنىڭ قۇقىقتىق مارتەبەسى تۋرالى كونۆەنسياعا جانە وزگە دە كەلىسىمدەرگە قول قويۋعا ازىرلىك بارىسى تالقىلاندى، سونداي-اق مەملەكەت باسشىسىنىڭ قاتىسۋىمەن وتەتىن الداعى حالىقارالىق ءىس-شارالار كەستەسى قاراستىرىلدى.
– ءبىز كاسپيي سامميتىنە كوپ جىلدار بويى دايىندالدىق. ساراپشىلارىمىز شەتەلدىك ارىپتەستەرىمەن بىرلەسىپ، اۋقىمدى جۇمىس اتقاردى. سونىمەن قاتار، تۇرىكمەنستاندا حالىقارالىق ارالدى قۇتقارۋ قورىن قۇرۋشى مەملەكەتتەر باسشىلارىنىڭ كەزدەسۋى وتەدى. ءبىز سوعان قاتىسۋىمىز كەرەك، – دەدى قازاقستان پرەزيدەنتى.
كەڭەستە سىرتقى ىستەر ءمينيسترى ق.ءابدىراحمانوۆتىڭ بەسىنشى كاسپيي سامميتىنە دايىندىق بارىسى جونىندەگى ەسەبى تىڭدالدى.
– بەسىنشى كاسپيي ءسامميتىنىڭ اياسىندا كاسپيي تەڭىزىنىڭ قۇقىقتىق رەجىمىن انىقتاۋ ءۇشىن كوپ جىلعى كەلىسسوزدەردى اياقتاۋ جوسپارلانۋدا. كاسپيي جاعاسىنداعى ەلدەردىڭ تەڭىزدى پايدالانۋ جونىندەگى قۇقىقتارى مەن مىندەتتەرىنە بايلانىستى بۇكىل ماسەلەلەردى رەتتەۋگە مۇمكىندىك بەرەتىن كاسپيي تەڭىزىنىڭ قۇقىقتىق مارتەبەسى تۋرالى كونۆەنسيا ءسامميتتىڭ نەگىزگى قۇجاتى بولىپ سانالادى، – دەدى ق.ءابدىراحمانوۆ.
نۇرسۇلتان نازاربايەۆ كاسپيي ماڭى ەلدەرى اراسىنداعى ءوزارا ءتيىمدى ەكونوميكالىق قارىم-قاتىناستاردى نىعايتۋعا باعىتتالعان كونۆەنسياعا قول قويۋدىڭ ماڭىزدىلىعىن ەرەكشە اتاپ ءوتتى.
جيىن سوڭىندا مەملەكەت باسشىسى بەسىنشى كاسپيي ءسامميتىن وتكىزۋگە دايىندىق جونىندەگى جۇمىستاردى جالعاستىرۋدى تاپسىردى.
پىكىر قالدىرۋ