جاڭا وقۋ جىلىنان باستاپ 5-7 سىنىپتاردا وقىتىلاتىن وقۋ قۇرالى جارىق كوردى. "ولكەتانۋ" وقۋلىعىنا استانا اكىمى اسەت يسەكەشوۆ، تەلەجۇرگىزۋشى ماييا بەكبايەۆا مەن دينارا ساتجان تۋرالى اقپارات ەنگىزىلگەن، دەپ حابارلايدى Qamshy.kz اقپارات اگەنتتىگى. 

وقۋلىققا اكىم مەن شوۋ-بيزنەس وكىلدەرى تۋرالى اقپاراتتىڭ ەنگىزىلۋىنە قاتىستى اقپارات الۋ ءۇشىن الماتى كىتاپ باسپاسى" جشس-نىڭ باس رەداكتورىنىڭ ورىنباسارى الميرا سۋجيكوۆاعا حابارلاستىق. ول اتالمىش اقپاراتتىڭ قاي بولىمدە ورنالاستىرىلعانىن بىلمەي جانە نە ءۇشىن تەلەجۇرگىزۋشى ماييا بەكبايەۆا تۋرالى اقپارات وقۋلىققا ەنگىزىلگەنىن تۇسىندىرە الماي، ۋاقىت كەرەك ەكەنىن ايتتى. الميرا حانىم وقۋلىقتىڭ مازمۇنىمەن تانىسۋعا بىرنەشە ساعات نەمەسە بىرنەشە كۇن جۇمساسا دا Qamshy.kz اقپارات اگەنتتىگى ونىڭ پىكىرىن سول ۋاقىتتا نازارلارىڭىزعا ۇسىناتىن بولادى. 

Sputniknews.kzء-تىڭ مالىمەتىنە سايكەس "ولكەتانۋ" وقۋلىعىن ءبىلىم جانە عىلىم مينيسترلىگىنىڭ تاپسىرىسى بويىنشا "الماتى كىتاپ باسپاسى" باسىپ شىعاردى. ەكى تىلدە شىققان وقۋلىق 5-7 سىنىپ وقۋشىلارىنا ارنالعان. جاڭا وقۋ قۇرالىنداعى ماتەريالدار قازاقستان تاريحى، قازاق ادەبيەتى، گەوگرافيا بويىنشا نەگىزگى مەكتەپ باعدارلاماسىن قايتالاماي، تولىقتىرادى، دەيدى كىتاپ اۆتورلارى.  

وقۋ باعدارلاماسى نۇرسۇلتان نازاربايەۆتىڭ ۇسىنىسىمەن «تۋعان جەر» مەملەكەتتىك باعدارلاماسىنىڭ نەگىزىندە جازىلعان. باعدارلامانىڭ ماقساتى —  وسكەلەڭ ۇرپاقتىڭ بويىندا پوتريوتتىق سەزىمدى قالىپتاستىرىپ، وتانعا دەگەن سۇيىسپەنشىلىكتى وياتۋ. 

"ءبىزدىڭ باسپانىڭ قازاقستاننىڭ ءسالت-داستۇرى، مادەنيەتى، تاريحى بويىنشا كىتاپ باسىپ شىعارۋدان ۇلكەن تاجىريبەسى بار. وسى باسپادان شىققان "مەنىڭ قازاقستانىم" توپتاماسى كوپشىلىككە بەلگىلى. ەلىمىز تاريحىنىڭ جارقىن بەتتەرى، ونىڭ مادەنيەتى، ءسالت-داستۇرى مەن تۇرمىسى، بىرەگەي گەوگرافيالىق نىساندارى جانە باسقالارى تۋرالى مالىمەتتەردى ءبىزدىڭ كوركەم بەزەندىرىلگەن البومداردان تابۋعا بولادى. ءبىزدىڭ وسى تاجىريبەمىز "ولكەتانۋ" سياقتى جاڭا قىزىقتى ءپاندى قالىپتاستىرۋعا ۇلكەن كومەگىن تيگىزدى. وسى وقۋلىقتى بىزبەن بىرگە جاساپ شىعارعان عالىمدارعا، اۆتورلارعا، ەكسپەرتتەرگە ۇلكەن العىسىمىزدى بىلدىرەمىز"، – دەدى "الماتى كىتاپ باسپاسى" جشس-نىڭ باس رەداكتورىنىڭ ورىنباسارى الميرا سۋجيكوۆا.

وقۋلىققا ءتورت ءپان كىرىكتىرىلگەن

وقۋلىق قازاقستاننىڭ بارلىق وبلىسى مەن ءىرى قالالارىنىڭ تاريحى مەن مادەنيەتى، ادەبيەتى نەگىزىندە جازىلعان. سونىمەن قاتار، ءار وبلىستا دۇنيەگە كەلگەن تانىمال تۇلعالار جايلى دا اقپارات بار.  

وقۋلىقتا ءتورت ءپان كىرىكتىرىلگەن: قازاقستان تاريحى، قازاق ادەبيەتى، مۋزىكا جانە گەوگرافيا. 

كىتاپ اۆتورلارىنىڭ ايتۋىنشا، "ولكەتانۋدى" مەكتەپتە وقىتۋعا ءبىر جىلعا 20 ساعات ءبولىنىپ وتىر. ارنايى جاڭا مامان دايارلاۋدىڭ قاجەتى جوق. 20 cاعاتتىڭ 12ء-سىن تاريح ءپانىنىڭ ماماندارى جۇرگىزەدى. جيىرما ساعاتتىڭ 5-ەۋى  5-سىنىپقا، 7 ساعات 6-سىنىپ وقۋشىلارىنا، ال قالعان 8 ساعات جەتىنشى سىنىپ وقۋشىلارىنا ارنالعان. 

اۆتورلاردىڭ پىكىرىنشە، وقۋلىق وقۋشىنىڭ ءوز بەتىنشە ىزدەنىپ، تەرەڭ ءبىلىم الۋىنا كومەكتەسەدى. 

وقۋلىقتى سەگىز ءمۇعالىم جازعان

الماتى قالاسى بويىنشا جازىلعان "ولكەتانۋ" وقۋلىعىن 8 اۆتور ءبىر جىلدا جازعان. 

"وقۋلىقتىڭ قۇرىلىمدىق جاعىن "وي" سوزىمەن بايلانىستىرىپ الدىق. كىتاپ "وي سەرپىن"، "وي قازىنا"، "وي قازىق"، "ءبىلىپ ءجۇر" ايدارىنان تۇرادى. "وي سەرپىن" وقۋشىلرادىڭ قىزىعۋشىلىعىن ارتتىراتىن ايدار بولسا، "وي قازىقتا" ساباققا قاتىستى جالپى مالىمەت، "وي قازىنا" ايدارىندا تەرەڭدەتىلگەن دەرەك بەرىلسە، "ءبىلىپ ءجۇر" بولىگىندە تاقىرىپقا بايلانىستى تىڭ مالىمەت كەلتىرىلگەن"، — دەيدى وقۋلىق اۆتورلارىنىڭ ءبىرى گۇلميرا رىسكەلدييەۆا.

اسەت يسەكەشيەۆ بلوگەرلەر قاتارىندا

ال استانا قالاسى جايىندا جازىلعان وقۋلىقتىڭ ىشىندە تانىمال بلوگەرلەر دە ءجۇر. ولاردىڭ اراسىندا استانا قالاسىنىڭ اكىمى – اسەت يسەكەشيەۆ، تەلەجۇرگىزۋشى ماييا بەكبايەۆا، جۋرناليست دينارا ءساتجان بار. 

جالپى، وقۋلىق قازاق تىلىندە جازىلعان. ورىس تىلىنە اۋدارما جاسالىپتى. 

ال وقۋلىقتىڭ تارالىمى تاپسىرىس بەرۋشى وبلىستارعا بايلانىستى. الايدا اۆتورلاردىڭ ايتۋىنشا، الداعى ۋاقىتتا ەلىمىزدىڭ مەكتەپتەرىندەگى 5-7 سىنىپ وقۋشىلارىنىڭ بارلىعى جاڭا وقۋلىقپەن قامتىلادى.