اقش بيلىگى قىتايدا وندىرىلگەن تاۋارعا 50 ميلليارد دوللارلىق كەدەن سالىعىن جۇزەگە اسىرۋ جۇمىسىنىڭ 16 ميلليارد دوللارلىق ەكىنشى ءبولىمىن 23 تامىزدا جۇزەگە اسىرماق. باتىس باسىلىمدارىنىڭ حابارلاۋىنشا، پرەزيدەنت ترامپتىڭ «تەحنولوگيالاردى ۇرلاۋ مەن ادىلەتسىز ساۋدا جۇرگىزۋ» سەبەبىمەن قىتايدا شىعارىلعان تەحنولوگيالىق ونىمدەرگە باج سالىعىن سالۋىنىڭ ەكىنشى كەزەڭى ناقتىلادى.

امەريكا قۇراما شتاتتارىنىڭ ساۋدا وكىلى (USTR) 23 تامىزدان باستاپ تاۋار قۇنىنا 25 پايىز كولەمدە سالىناتىن كەدەن سالىعى 16 ميلليارد دوللار بولاتىن تاۋارلار ءتىزىمىن جاريالادى. بۇل تىزىمدە موتو مايى،  ەتيلەن، ۆينيلحلوريد، اكريل پوليمەرلەرى جانە جارتىلاي وتكىزگىشتەرگە قاتىستى 279 ءتۇرلى تاۋار بار.

قىتايدىڭ قورعانىس، اۆياسيا جانە وڭدەۋشى سەكتورلارىنا باعىتتالعان كەدەن سالىعىنىڭ 7 شىلدەدە قولدانىسقا ەنگەن العاشقى بولىمىندە بولسا يادرولىق رەاكتورلار، گاز تۋربينالارى، اۋا جانە گاز سۇيىلتقىشتارى، پەشتەر جانە كوممەرسيالىق ىدىس-اياق جۋعىشتار سياقتى 34 ميلليارد دوللار شاماسىنداعى 818 تاۋار بار بولاتىن.

اقش-تىڭ قىتايدى 50 ميلليارد دوللار سالىق تولەۋگە جىعاتىن جاڭا ارەكەتى ترامپتىڭ سايلاۋالدى باعدارلاماسىندا ايتىلعان. بىرتىندەپ جۇزەگە اسىرا باستاعان اقش بيلىگى بۇل قادامىن ەلدەگى تاۋار وندىرۋشىلەردى دەمەۋگە دە سەپتىگىن تيگىزەدى دەپ سانايدى. ال، الەمدەگى ارزان ەڭبەك كۇشى سانالاتىن جۇڭگو بۇعان جاۋاپ رەتىندە اقش-تى دسۇ تالاپتارىن بۇزىپ وتىر، - دەپ ايىپتادى. «اقش ۇكىمەتىنىڭ بۇل شاراسى قحر-دىڭ زاڭدى قۇقىقتارى مەن مۇددەلەرىنە قول سۇعۋ جانە قىتايدىڭ دامۋىنا قاتەر توندىرەدى»، - دەگەن بولاتىن جۇڭگو بيلىگى. جۇڭگو دا امەريكالىق اۆتوموبيل مەن اۋىل شارۋاشىلىعى ونىمدەرىنىڭ سالىعىن ءىشىنارا ارتتىرعان.

ساۋدا سوعىسى – ساۋدا قاتىناسىنداعى ەكى ەلدىڭ بىر-بىرىمەن ساۋدا شارتتارى ارقىلى كۇرەسۋى. بۇل سوعىستىڭ باستى قارۋى كەدەن سالىعى مەن يمپورت-ەكسپورت كۆوتالارى. ايتالىق، ءبىر ەل ساۋدا تاريفتەرىن كوتەرەدى، ەكىنشىسى وسىعان ۇقساس جاۋاپ قايتارادى. ساۋداداعى كەدەن سالىعى ارقىلى جاسالعان سوققىلارى ءبىر-بىرىنىڭ ەكونوميكاسىنا زيان كەلتىرۋى، ءتىپتى ەكى ەل اراسىنداعى ساياسي شيەلەنىستى كۇشەيتۋى مۇمكىن.