فەيسبۋكتى اشىپ قالساق، سامات نۇرتازانىڭ «دوستىق. انگولا. مۇناي. قارۋ» دەگەن جازباسى كوزگە وتتاي باسىلىپ شىعا كەلدى. كەشە عانا ەلباسىنىڭ پارمەنىمەن ق ر قورعانىس ءمينيسترى اتانعان نۇرلان ەرمەكبايەۆ تۋرالى قىزىقتى اقپاراتقا تولى جازبانى وقىرمان نازارىنا ۇسىنامىز.
«سوناۋ 1985 جىلى جاس تا بولسا، باس بولىپ جۇرگەن كەڭەستىك بارلاۋشى يگور سەچين تۇركىمەنستاننان انگولاعا اسكەري اۋدارماشىلاردى باسقارۋ ءۇشىن اۋدارىلادى. انگولادا ول كەزدە ازاماتتىق سوعىس ءورشىپ تۇرعان بولاتىن. يگور ءيۆانوۆيچتىڭ پورتۋگال جانە فرانسۋز تىلدەرىن جەتىك ءبىلۋى نۇر ۇستىنە نۇر بولادى. سول جىلدارى ونىڭ قاراماعىنا قازاق كسرو-دان نۇرلان ەرمەكبايەۆ كەلىپ قوسىلادى. پورتۋگال تىلىنە سۋداي ەرمەكبايەۆ سەچينگە بىردەن ۇناي كەتەدى. سودان بەرى ەكەۋىنىڭ ارالاس-قۇرالاستىعى دوستىققا ۇلاسقان. ءتىپتى وتباسىمەن ارالاسادى. انگولادان كەيىن 1989 جىلى يگور سەچين لەنمۋ-دە شەت ءتىلى كافەدراسىندا ساباق بەرىپ جۇرگەندە ۆلاديمير پۋتين وقۋ ءىسى جونىندەگى پرورەكتور بولادى. ءدال سول ۋاقىتتا ەكەۋىنىڭ اڭگىمەسى جاراسا كەتكەن دەسەدى. قىسقاسى، يگور يۆانوۆيچ سەچين رەسەي مۇنايىنىڭ پاديشاحى بولسا، ەرمەكبايەۆ قورعانىس ءمينيسترى بولىپ شىعا كەلدى. مۇناي مەن قارۋ دوستىعىنان ارتىق نە بار... »
ق ر ءدىن ىستەرى جانە ازاماتتىق قوعام مينيسترلىگىن باسقارعان نۇرلان ەرمەكبايەۆتىڭ قورعانىس مينيستر بولىپ شىعا كەلۋى ءبىزدى دە تاڭ قالدىرماي قويمادى. ەلباسى نە ىستەسە دە حالىق يگىلىگى ءۇشىن جاسايتىنى انىق قوي. سوندىقتان «ءبىسمىللا» دەپ ءبارىن ءبىرىنشى كەزەكتە جاراتقانعا جانە نۇرسۇلتانعا تاپسىردىق.
