تاراز قالاسىندا جاڭا وقۋ جىلىندا 320 ورىندىق IT-ليسەيى اشىلادى.

جامبىلدىق وقۋشىلارعا 1 قىركۇيەكتەن باستاپ جاڭا IT-ليسەيىندە اقپاراتتىق تەحنولوگيالار وقىتىلاتىن بولادى.

وبلىس اكىمى اسقار مىرزاحمەتوۆ «2018-2020 جىلدارعا ارنالعان سيفرلىق ەكونوميكا ءۇشىن ادام كاپيتالىن دامىتۋ جول كارتاسىنا» سايكەس جامبىلدىق جاستاردىڭ ءبىلىم ساپاسىن جاقسارتۋعا اسا قاتتى كوڭىل ءبولىپ وتىر.

«اعىمداعى جىلى، تاراز قالاسىندا قازاقستان رەسپۋبليكاسى ءبىلىم جانە عىلىم مينيسترلىگى 7-11 سىنىپتا ءبىلىم الاتىن وقۋشىلار ءۇشىن وبلىستىق مامانداندىرىلعان IT-ليسەي-ينتەرناتىن اشۋدى جوسپارلاپ وتىر. ول جەردە وقۋشىلار جاراتىلىستانۋ باعىتىنداعى ماتەماتيكالىق پاندەردى، روبوتوتەحنيكانى، اقپاراتتىق تەحنولوگيالار مەن ديزاين جانە باعدارلامالاۋدى تەرەڭدەتىپ وقيتىن بولادى. ءبىلىم الۋشىلار مەن مۇعالىمدەردى ىرىكتەۋ كونكۋرستىق نەگىزدە جۇرگىزىلەدى. مەكتەپ 320 وقۋشىنىڭ ءبىلىمىن اقپاراتتىق تەحنولوگيالار سالاسىندا تەرەڭدەتۋگە باعىتتالعان»، – دەدى جامبىل وبلىسىنىڭ ءبىلىم باسقارماسىنىڭ باسشىسى راحيا تۇرماحانبەتوۆا.

وبلىستىق ءبىلىم باسقارماسىندا حابارلانعانداي، اقپاراتتىق تەحنولوگيالاردى وقىتۋ وبلىستىڭ كوپتەگەن قالالارىندا، اۋداندارىندا دا بەلسەندى تۇردە جۇرگىزىلۋدە. روبوتوتەحنيكا سىنىپتارى بار مەكتەپتەردىڭ 30% -ىن قامتاماسىز ەتۋ ءۇشىن جەرگىلىكتى بيۋدجەتتەن 353،4 ملن. تەڭگە كولەمىندە قاراجات بولىنگەن.

وڭىردە ورتا جانە جوعارى سىنىپ وقۋشىلارىنىڭ روبوتوتەحنيكا داعدىلارىن دامىتىپ، تەرەڭ ءبىلىم الۋى ءۇشىن كوپتەگەن مۇمكىندىكتەر جاسالعان.

«نۇر وتان» پارتياسى، STEM اكادەمياسى جانە ءبىلىم بەرۋ ءبولىمى بىرلەسىپ روبوتوتەحنيكانىڭ 120 سىنىبىن اشۋدا. ول ءۇشىن وبلىستىق بيۋدجەتتەن 404 ملن. تەڭگە ءبولىنىپ وتىر. جاڭا سىنىپتاردا وقۋشىلار ۆەب-باعدارلامالاۋ تۋرالى نەگىزگى ءبىلىمدى عانا ەمەس، سونىمەن قاتار ۆەب-ديزاين مەن 3D-مودەلدەۋدىڭ سىرىن جەتىك تۇسىنۋگە قابىلەتتى بولادى. وبلىستىڭ بارلىق اۋدان ورتالىقتارىندا، سونداي-اق تاراز قالاسىندا مەكتەپ باعدارلاماسىنان تىس IT-سىنىپتارى بار»، – دەپ اتاپ ءوتتى ر. تۇرماحانبەتوۆا. سونداي-اق، جامبىل وبلىسىنىڭ باسشىلىعى تاراپىنان مەكتەپتەردە روبوتوتەحنيكا ۇيىرمەلەرىنىڭ اشىلۋىنا كوپ كوڭىل بولىنگەن. وندا قاتىسۋشىلار وزدەرىنىڭ عىلىمي-تەحنيكالىق، شىعارماشىلىق قابىلەتتەرىن، ينجەنەرلىك ويلاۋ قابىلەتتەرىن، 3D-مودەلدەۋ داعدىلارىن دامىتادى. وبلىستىڭ التى وقۋ ورتالىعىندا روبوتوتەحنيكا بويىنشا ۇيىرمەلەر جۇمىس جاساپ تۇر.بايزاق، جۋالى جانە جامبىل اۋداندارىندا جاس جەتكەنشەكتەردىڭ ءوي-ورىسىن نىعايتۋ ماقساتىندا ارنايى جوبا ىسكە اسىرىلدى. ءوز كەزەگىندە مۇنداي ۇيىرمەلەر مەكتەپ جاسىنداعى جەتكەنشەكتەردىڭ باعدارلامالاۋدى ۇيرەنۋگە قىزىعۋشىلىقتارىن ارتتىرادى.