بريتانيا پاتشايىمى قازاقستاندىق قىزبەن كەزدەسە المايتىنىن جەتكىزدى، دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساي وتىرىپ. 

اقتوبە تۇرعىنى زارينا احمەتجان II ەليزاۆەتاعا حات جازىپ، ودان بىرنەشە ايدان كەيىن جاۋاپ الدى. پاتشايىم قازاقستاندىقپەن جەكە كەزدەسۋدەن باس تارتقانىنا قاراماستان، ول انگليادا وقۋدى ارمانداۋىن جالعاستىرا بەرمەك. 

II ەليزاۆەتاعا حات جازۋ يدەياسى زارينا احمەتجانعا كەزدەيسوق كەلگەن. بالا كۇنىنەن اعىلشىن مادەنيەتىنە قىزىعۋشىلىق تانىتقان قىز، مەكتەپتە جۇرگەندە-اق انگلياعا بارۋدى الدىنا ماقسات ەتىپ قويىپتى.  

ول بىرنەشە جىل بويى اعىلشىن ءتىلىن ۇيرەنىپ، مەملەكەتتىڭ تاريحى مەن حالىقتىڭ داستۇرىمەن تانىسقان. ءتىلدى ەركىن مەڭگەرگەنىن تۇسىنگەن كەزدە پاتشايىمنىڭ وزىنە حات جازىپ، جەكە كەزدەسۋ وتكىزۋدى وتىنەدى. 

"ءبىر اي جازسام با، جازباسام با دەپ ويلانىپ ءجۇردىم"، — دەدى زارينا. 

سونىمەن بىرگە، زارينانىڭ ءوزىنىڭ ايتۋىنشا، بۋكينگەم سارايىنان جاۋاپ الامىن دەپ ۇمىتتەنبەگەن. الايدا پاتشايىمنىڭ ءاتى-جونىنىڭ باس ارىپتەرى جازىلعان كونۆەرتتى العاندا قاتتى تاڭعالىپتى.    

"ول (II ەليزاۆەتا) مەنىڭ حاتىمدى باعالايتىنىن، الايدا كەزدەسكىسى كەلەتىن ادامداردىڭ بارلىعىمەن كەزدەسۋگە مۇمكىندىگى جوق ەكەنىن جازدى"، — دەيدى زارينا.

سوعان قاراماستان ۇلىبريتانيا پاتشايىمى حاتپەن بىرگە ەستەلىكە ءوزىنىڭ سۋرەتىن سالىپ جىبەرىپتى. 

ەندى زارينا احمەتجاننىڭ انگليادا وقۋعا دەگەن ىقىلاسى ودان سايىن ارتا ءتۇستى. ءقازىردىڭ وزىندە ەمتيحانعا تياناقتى دايىندالىپ جاتىر، بالا كۇنىنەن ارمانداعان ەلدە وقۋ ءۇشىن قولدان كەلگەننىڭ ءبارىن جاساپ كورمەك.