بۇگىن ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتى بارىسىندا ىشكى ىستەر ءمينيسترى قالمۇحانبەت قاسىموۆ مانەرلەپ سىرعاناۋشى دەنيس تەننىڭ ولىمىنە قاتىستى تىڭ دەرەكتەرمەن ءبولىستى.

«ناقتى دالەلدەر سوتتا ناقتىلانادى. دەنيس تەنگە شابۋىل جاساعانداردىڭ ەكەۋى دە الماتىعا كوشىپ كەلگەندەر. ەكەۋى دە ءۇش مارتە سوتتالعاندار. ولار العاشىندا كولىك جۋۋ ورتالىعىندا جۇمىس ىستەدى، كەيىن اينەك ۇرلاۋمەن اينالىسا باستادى. ءدال سول كۇندەرى اقشادان قاتتى قىسىلىپتى. پاتەرگە تولەۋ ءۇشىن كەرەك بولعان ەكەن اقشا. قۇجاتسىز، ەشتەڭەسىز قالاعا كەلەدى دە، ءبىر پاتەرگە ورنالاسادى. باسقا ەلدەردە مۇندايعا جول بەرمەيدى. ونداي قىلمىسكەرلەرگە قالانىڭ ءوزى جاعداي جاساپ وتىر. قالاعا كەلدى، ءبىر پاتەرگە ورنالاستى»، - دەپ ءتۇسىندىردى ءىىم باسشىسى. سوزىنە قاراعاندا، مۇنداي قىلمىستاردىڭ ءجيى ورىن الۋىنا قالا تۇرعىندارىنىڭ وزدەرى كىنالى. ءارى قاراي مينيستر كۇدىكتىلەردىڭ قىلمىستارىن قالاي جۇزەگە اسىرعاندارىن ايتىپ بەردى.

«تاڭ اتا كوشەگە شىعىپ، قىلمىستارىن جۇزەگە اسىراتىن نىسان ىزدەۋگە كىرىستى. دەنيس تەننىڭ كولىگىنىڭ ماڭىن اينالشىقتاپ ءجۇردى. قىمبات كولىك، تەرەزەلەرى بار، ەشقانداي جازۋى جوق. ءقازىر كوبى ساقتانىپ، نومىرلەرىن قالدىرىپ كەتەدى. ءسويتىپ الگى ەكەۋى تەرەزەنى كەسۋدى باستايدى. ءدال سول ۋاقىتتا دەنيس شىعىپ قالادى. ول سپورتشى عوي، قىلمىسكەرلەردى بىردەن ۇستادى. كۇدىكتىنىڭ ءبىرى قاشىپ ۇلگەرمەدى، دەنيستىڭ قاتتى قىسىپ ۇستاعانى سونشا ءتىپتى سپورتشىعا كۇشى جەتپەدى. سول ساتتە ەكىنشىسى سەرىكتەسىن قۇتقارىپ قالۋ ءۇشىن دەنيسكە پىشاق سۇعادى. ولتىرگىسى كەلدى مە، جوق پا، سوتتا انىقتالادى. جاعداي وسىنداي»، - دەدى.

ال دەنيسكە شابۋىل جاسالعان ۋاقىتتا قاسىموۆ اقتاۋدا بولعان ەكەن.

«ماعان حابارلاسىپ، قىلمىس جايىندا ايتتى. ءبارىن باقىلاۋدا ۇستادىق. قىلمىسكەرلەردى انىقتاپ، ءبىرىنشىسىن ۇستادىق. ەكىنشىسىن ۇستاۋ قيىنعا سوقتى، ول قاشىپ ءجۇردى. ءبىز دە بارىمىزدى سالىپ ىزدەۋگە كىرىستىك، اقىرى ول دا ۇستالدى. ءۇش ءتۇنىمىزدى ۇيقىسىز وتكىزدىك»، - دەدى قاسىموۆ.

ايتا كەتەيىك، 2018 جىلدىڭ 19 شىلدەسىندە الماتىنىڭ ءدال ورتالىعىندا قازاقستاندىق مانەرلەر سىرعاناۋشى دەنيس تەنگە شابۋىل جاسالدى. كوپ قان جوعالتقان سپورتشى سول كۇنى اۋرۋحانادا جان تاپسىردى. «دەنيستى ءولتىردى» دەگەن ەكى كۇدىكتى – نۇرالى قياسوۆ پەن ارمان قۇدايبەرگەنوۆ تۇتقىندالدى.