قىركۇيەك ايىنىڭ 12 جۇلدىزىندا ورتالىق كوممۋنيكاسيالار قىزمەتى الاڭىندا Astana Art Show  وتكىزىلۋىنە قاتىستى باسپا ءسوز كونفەرەنسياسى ءوتتى دەپ حابارلايدى Astana Art Show باسپا ءسوز قىزمەتى ۇسىنعان دەرەكتى نەگىزگە الا وتىرىپ.

15 قىركۇيەك – 28 قازان ارالىعىندا ەلوردادا Astana Art Show وتەدى. Astana Art Show زاماناۋي قازاقستاننىڭ بەينەلەۋ ونەرى حالىقارالىق بيەننالەسىنىڭ نەگىزگى شاراسى بولىپ تابىلادى جانە ونىڭ اياسىندا ءۇش كورمە وتەدى.

ءىس-شارانىڭ العاشقى تاقىرىبى - «Metamorphosis». جوبا قاتىسۋشىلارى – تولىق جەتىلگەن جانە شەتەلدە اتتارى تانىمال بولعان قازاقستاندىق جاس سۋرەتشىلەر.

20-دان استام سۋرەتشى حالىقارالىق ءىرى كورمەلەرگە قاتىسقان جانە شوۋعا ارنايى دايىندالعان ەڭبەكتەرىن ۇسىنادى.

كورمە قاتىسۋشىلارىنىڭ اراسىندا تانىمال جاپوندىق فوتوگراف، «مەن وبلوموۆ» بەلگىلى اۆتوپورترەت سەرياسىنىڭ اۆتورى – يكۋرۋ كۋۆادجيما بار. سونداي-اق، كوركەم ونەردى قادىرلەۋشى ەلوردالىقتاردىڭ نازارىنا ءوز جۇمىستارىن لوندوندا اتى شىققان قازاقستاندىق ازا شادەنوۆا ۇسىنادى. ال جاس سۋرەتشى ءادىل اۋبەكەروۆ استانا تۇرعىندارى مەن قوناقتارىن قالا عيماراتتارىنىڭ ءبىرىنىڭ قاسبەتىنە سالىنعان جاڭا ارت-نىسانمەن قۋانتادى.

سۋرەتتەر مەن ينستاللياسيالاردى كەلۋشىلەر TSE Art Destination گالەرەياسىندا جانە ونىڭ اينالاسىندا تاماشالاي الادى.

Metamorphosis-پەن قاتار، ورتالىق ازيا ەلدەرى مەن قازاقستاننىڭ 16 جاس سۋرەتشىسىنىڭ شىعارماشىلىعىنا ارنالعان «قايتا جۇكتەۋ. كەڭىستىكتى وڭتايلاندىرۋ» كورمەسى وتەدى.

«The Ghost Expedition» اتتى ءۇشىنشى كورمەسىنىڭ ۇيىمداستىرۋشىلارى – ەۋروپالىق وداق. جوبا شەڭبەرىندە قازاقستاندىق جانە ەۋروپالىق سۋرەتشىلەر توبى ماڭعىستاۋ وبلىسىنىڭ كيەلى ورىندارىن زەرتتەۋ بارىسىندا كوركەم جۇمىستارىنىڭ ناتيجەلەرىن ۇسىنادى. 

سونداي-اق، جوبا اياسىندا تانىمال سۋرەتشىلەردىڭ جاريا دارىستەرى، شەبەر-سىنىپتارى مەن كۋراتورلىق ەكسكۋرسيالارى وتەدى.

Astana Art Show اشىلۋىندا ءىس-شارانىڭ ارنايى قوناقتارى – الەمگە ايگىلى مۋزىكانت Benjamin Skepper (مەلبۋرن، اۆستراليا) ونەر كورسەتەدى. Benjamin Skepper – كوركەم مانماتىندە زاماناۋي تەحنولوگيالار مەن عىلىمي يننوۆاسيالاردى قولدانا وتىرىپ، جاڭا ەكسپەريمەنتتىك مۋزىكالىق شىعارمالارجازاتىن مۋزىكانت، جانە ورىنبور وبلىسى، ورسك قالاسىنىڭ تۋماسى، ايگىلى ءبيشى ارسەن يمەنوۆ.

Astana Art Show كورمەسىنىڭ رەسمي اشىلۋى 15 قىركۇيەكتە ساعات 19:00-دە TSE Art Destination گالەرەياسىندا وتەدى. كىرۋ تەگىن.