پويىز اپاتىنان زارداپ شەككەن ازامات بەلشەدەن قارىزعا باتىپ كەتكەن. اۋىر جاراقات العاندىقتان جۇمىسقا جارامسىز بولىپ قالعان ءالىبي بايجانوۆ ءوزىن وسىنداي كۇيگە تۇسىرگەندەر وتباسىن اسىراۋعا جاردەم بەرسىن دەپ وتىر. جۇبايىمەن بىرگە الماتىعا بەت العان ول جول ورتاسىندا اۋدارىلعان سەگىز ۆاگوننىڭ بىرىندە وتىرعان ەدى. اپات 4 اي بۇرىن بولعانىمەن، تەرگەۋ جۇمىستارى ءالى اياقتالماعان ەكەن. بۇل تۋرالى ەۋرازيا ءبىرىنشى ارناسى حابارلايدى.

بيىل ماۋسىمدا تۇسىرىلگەن كادرلار بۇل. الماتىعا بەت العان پويىزدىڭ 8 بىردەي ۆاگونى جولدان شىعىپ، اۋدارىلعان. سالدارىنان 12 جاستاعى ءبىر بالا كوز جۇمدى. 22 ادام جارالاندى. ولاردىڭ اراسىندا ءالىبي بايجانوۆ تا بار. سول كۇنى ەكى اياعىن سىندىرىپ الىپتى. بىرنەشە كۇردەلى وتا جاسالدى. ءقازىر بالداقپەن اۋپىرىمدەپ ءجۇر. ءوزىنىڭ كىشىگىرىم سانتەحنيكالىق قىزمەت كورسەتەتىن توبى بولعان ەكەن. جۇمىسقا جارامسىز بولىپ قالعاندىقتان، ۇيگە كەلەر كىرىس تە توقتاپتى.

«گيپستى الىپ، بالداقپەن ءجۇرىپ ءجۇرمىن. ءوز اياعىممەن تۇرۋعا بولمايدى. ەكى اي جۇرەسىڭ دەدى. سالماق تۇسىرۋگە بولمايدى. بارلىعىن قاداعالاپ وتىرادى. تاعى ءبىر دارىلەر جازىپ بەردى ەندى. ۇيدە شىداپ تا وتىرا المايمىن مەن. ءوزىم جۇمىس ىستەپ قالعان اداممىن. شامالى قيىنداۋ بولادى. امال جوق، نە ىستەيمىن. جۇرە المايمىن ازىرگە» - دەيدى استانا قالاسىنىڭ تۇرعىنى ءالىبي بايجانوۆ.

ءالىبي جۇبايى ەكەۋى 4 بالا اسىراپ وتىر. وتاناسى ايگۇل كەنجە بالاعا باس-كوز بولىپ ۇيدە وتىرعان. ەندى جولداسىنا دا كۇتىم جاساپ ءجۇر. اپاتتان كەيىن ساقتاندىرۋ كومپانياسىنان ءبىر رەتتىك تولەم جاسالعان. تەمىر جول كومپانياسى دا 1 ملن تەڭگە جاردەم بەرىپتى.

«بۇل 1 ملن تەڭگە جالعىز اسىراۋ ءۇشىن جەتپەيدى. مەن ءوزىم جۇمىس ىستەمەيمىن. كورىپ وتىرعانىڭىزداي مەنىڭ جولداسىمنىڭ وزىنە ءبىر ادام كەرەك. كۇن بولسا سۋىپ بارادى. وت جاعۋ كەرەك دەگەندەي ۇيگە. ونىڭ بارىنە 1 ملن تەڭگە نە بولادى. ارى كەتسە 3 ايعا جەتەر. كورىپ وتىرعانىڭىزداي ازىق-تۇلىكتىڭ ءبارى قىمبات استانادا» - دەيدى ءالىبي بايجانوۆتىڭ جۇبايى ايگۇل كارىموۆا.  

ەرلى-زايىپتىلار امالدارى تاۋسىلعان سوڭ تامىر-تانىستار مەن تۋعان-تۋىستان قارىز سۇراپ كۇن كورىپ ءجۇر ءقازىر. وزدەرىنىڭ ەسەپتەۋىنشە، بەرەشەگى 1 ملن تەڭگەدەن اسىپ كەتكەن. جۇرتتان كومەك سۇراعىلارى كەلمەيدى. تەك ءالىبيدىڭ وسى كۇيگە تۇسۋىنە كىنالىلەردەن ساۋىققانشا وتەماقى بەرۋىن تالاپ ەتۋدە. ايگۇل كارىموۆا ءبىراز جەرگە حات جازىپ كورگەن. ءبىراق تۇششىمدى جاۋاپ الا الماپتى. كىنالى كىم جانە تاعى قانداي وتەماقى بەرىلۋى مۇمكىن ەكەنىن سۇراپ ءبىز دە حابارلاستىق. تەرگەۋ ءالى بىتپەپتى. ىسكە نۇكتە قويىلعانشا ءتىس جارمايمىز دەپ جاۋاپ قاتتى باس كولىك پروكۋراتۋراسى.

باس كولىك پروكۋراتۋراسىنىڭ رەسمي جاۋابى:
«كولىكتەگى ىشكى ىستەر دەپارتامەنتى «استانا-الماتى» جولاۋشىلار پوەزىنىڭ ۆاگوندارى تەمىرجول رەلسىنەن شىعىپ، جول اپاتىنا ۇشىراۋ فاكتىسى ق ر قك 344-بابى 2-بولىگىندە كوزدەلگەن قىلمىستىق قۇقىق بۇزۋشىلىق بەلگىلەرىمەن تىركەلىپ، سوتقا دەيىنگى تەرگەپ-تەكسەرۋ جۇرگىزۋ ۇستىندە ەكەنىن حابارلايدى. ق ر قىلمىستىق پروسەستىك كودەكسى 201-بابىنىڭ تالاپتارىنا سايكەس ءسىز سۇراستىرىپ وتىرعان اقپاراتتار، تەرگەۋ مۇددەسى اياسىندا، قازىرگى كەزدە جاريا ەتۋگە جاتپايدى».

4 ايعا سوزىلعان تەرگەۋدىڭ قاشان اياقتالارى ءالى بەلگىسىز. ايتا كەتەيىن، العاشقىدا جولاۋشىلار پويىزى وزگە جۇك پويىزىمەن سوقتىعىسىپ قالۋى مۇمكىن ەكەندىگى ايتىلعان. ءبىراق تەرگەۋشىلەر ول پايىمدى بىردەن جوققا شىعاردى. ياعني تەمىر جولدىڭ جاعدايىن تەكسەرگەندەر نەمەسە پويىز ۆاگوندارىنىڭ جاعدايىنا جاۋاپتىلار جازالانۋى مۇمكىن. بۇل تەك تۇسپال عانا.