الماتىدا ءار سالا سيفرلىق فورماتقا كوشۋدى باستاپ تا كەتكەن. اسىرەسە، ءبىلىم جانە دەنساۋلىق ساقتاۋ سالاسىن سيفرلاۋ ءۇردىسى قارقىندى ءجۇرىپ كەلەدى. شەنەۋنىكتەردىڭ ايتۋىنشا، وسى ەكى سالا سيفرلىق فورماتقا كوشەر بولسا، ەلدە جەمقورلىق ازايادى.

قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ وڭتۇستىك استاناداعى سيفرلاۋ ءۇردىسىنىڭ ءساتتى ورىندالىپ جاتقانىنا ءدان ريزا.

اليك شپەكبايەۆتىڭ ايتۋىنشا، بۇگىنگى تاڭدا حالىق ءۇشىن دەپ اتقارىلىپ جاتقان مەملەكەتتىك قىزمەتتىڭ كولەمى 5 ميلليون دوللاردان اسقان. ال سول قىزمەتتىڭ 80 پايىزى ەلەكتروندى فورماتقا جۇمسالىپتى.

ول قانداي قىزمەتتەر؟

ەڭ بىرىنشىدەن، ەلەكتروندى كۇندەلىك. شپەكبايەۆتىڭ مالىمدەۋىنشە، ىشكى جەمقورلىقتى جويۋ ماقساتىندا الماتىدا 400 مىڭنان كوپ وقۋشى ەلەكتروندى كۇندەلىك پايدالانادى. مۇنداي ءۇردىس تەك مەكتەپتەردە عانا ەمەس، سونىمەن قاتار بالاباقشالارعا دا جەتكەن.

جەمقورلىققا قارسى ۆەدومستۆونىڭ باسشىسى اليك شپەكبايەۆ جوعارعى وقۋ ورىندارىنىڭ مۇعالىمدەرىنىڭ دە نازارىن وزىنە اۋدارتتى. ايتۋىنشا، پەداگوگقا ءتان قاسيەت – الدىمەن ادالدىق پەن ءتارتىپ. بۇل ەكەۋى بويىندا ۇندەسكەن ۇستاز بىلىكتى مامان تاربيەلەپ شىعادى.

«جەمقورلىققا قارسى تۇرۋ ماسەلەسىندە سىزدەردىڭ قولداۋلارىڭىزعا مۇقتاجبىز. جاستاردى مادەنيەتكە، جارقىن بولاشاققا، تارتىپكە باۋليتىن دا سىزدەرسىزدەر. وسكەلەڭ ۇرپاققا ادالدىق دەگەن ءسوزدى تەرەڭىنەن ۇعىندىرساق، ەرتەڭگى كۇنى جەمقورلىقسىز الەمگە اياق باسامىز دەگەن سەنىمىم مول. ءبارى ءسىز بەن ءبىزدىڭ قولىمىزدا»، - دەدى ۇستازدار قاۋىمىنا اليك شپەكبايەۆ.

ايتا كەتەيىك، 2017 جىلدىڭ 12 جەلتوقسانىندا قازاقستان رەسپۋبليكاسى ۇكىمەتىنىڭ № 827 قاۋلىسىمەن «سيفرلىق قازاقستان» مەملەكەتتىك باعدارلاماسى بەكىتىلگەن ەدى. باعدارلامانىڭ ماقساتى – ءار سالادا سيفرلىق تەحنولوگيانى پايدالانۋ ءارى ونى دامىتۋ، وسىلايشا ەلدىڭ ەكونوميكاعا باسەكەلەستىگىن ارتتىرۋ ءارى حالىقتىڭ ءومىر ساپاسىن ارتتىرۋ.

تاعى ءبىر ايتا كەتەرلىگى، «سيفرلىق قازاقستان» باعدارلاماسىن جۇزەگە اسىرۋ ەلباسى نۇرسۇلتان نازاربايەۆتىڭ «قازاقستان-2050» ستراتەگياسىنا جول اشاتىن نەگىزگى فاكتور رەتىندە سانالماق. ستراتەگياعا سايكەس، 2050 جىلعا قاراي قازاقستان باسەكەلەستىگى جوعارى 30 ەلدىڭ قاتارىنا ەنۋى ءتيىس.