اقتوبەدە وتكەن حالىقارالىق كونفەرەنسياعا الەمنىڭ 120-دان اسا كورنەكتى عالىمدارى جينالدى.

ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىندە «قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازاربايەۆتىڭ ستراتەگياسى – ايماقتىق دامۋدىڭ درايۆەرى» حالىقارالىق عىلىمي-تاجىريبەلىك كونفەرەنسياسى ءوتتى.

شارانىڭ ماقساتى – قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا. نازاربايەۆتىڭ قازاقستاننىڭ ايماقتارىن دامىتۋ بويىنشا ستراتەگياسىنىڭ ماڭىزىن كورسەتۋ؛ شەتەلدىك جانە وتاندىق ساراپشىلار قوعامداستىعىنىڭ پىكىرىن تالقىلاۋ ۇدەرىسىندە ايماقتىق ءساتتى دامۋدىڭ فاكتورى رەتىندە باتىس قازاقستاننىڭ ەكونوميكالىق، الەۋمەتتىك-ساياسي، رۋحاني-مادەني الەۋەتىن دامىتۋ تۋرالى ءبىلىمدى كەڭەيتۋ.

كونفەرەنسيا جۇمىسىنا الەمنىڭ 15 مەملەكەتىنەن، سونىڭ ىشىندە قحر، وڭتۇستىك كورەيا، تۇركيا رەسپۋبليكاسى، ينديا رەسپۋبليكاسى، رەسەي فەدەراسياسى، وزبەكستان، قىرعىزستان ەلدەرىنەن، سونىمەن قاتار، قازاقستاننىڭ جيىرما جوعارى وقۋ ورنىنان كەلگەن 126 عالىم قاتىستى.

- اقتوبەدە پرەزيدەنت نۇرسۇلتان نازاربايەۆتىڭ تاۋەلسىز قازاقستاننىڭ قالىپتاسۋى مەن وركەندەۋىندەگى ءرولى تۋرالى كونفەرەنسيا وتكىزۋ ءبىز ءۇشىن ۇلكەن قۋانىش ءارى قۇرمەت. جۋىردا ءبىز تاۋەلسىزدىگىمىزدىڭ 27 جىلدىعىن اتاپ وتەمىز. قازاقستان وسىنداي قىسقا تاريحي كەزەڭ ىشىندە ۇلت كوشباسشىسىنىڭ دانا ساياساتىنىڭ ارقاسىندا بۇكىل الەمگە تانىلدى. كونفەرەنسياعا قاتىسۋشىلاردىڭ بارلىعى وزدەرى ءۇشىن جاڭا دۇنيەلەردى اشادى دەپ سەنەمىن. شىنىندا، پىكىر الماسۋ، پىكىرتالاستار مەن ديالوگ بارىسىندا جاقسى يدەيالار پايدا بولادى، - دەدى اقتوبە وبلىسىنىڭ اكىمى بەردىبەك ساپاربايەۆ سالەمدەسۋ سوزىندە.

ءوڭىر باسشىسى سونداي-اق، اقتوبەلىك جاستاردى ۇلتتىق ءسالت-داستۇردى ساقتاپ، زاماناۋي جوعارى ءبىلىم الۋعا، باسەكەلەستىككە قابىلەتتى مامان جانە وتانىنىڭ پاتريوتى بولۋعا شاقىردى.

ەلباسى كىتاپحاناسى ديرەكتورىنىڭ ءبىرىنشى ورىنباسارى، ساياسي عىلىمدارىنىڭ دوكتورى، پروفەسسور ءامىرحان راحىمجانوۆ «پرەزيدەنت نۇرسۇلتان نازاربايەۆتىڭ قازاقستان وڭىرلەرىنىڭ دامۋى جونىندەگى ستراتەگياسى» تاقىرىبىندا بايانداما جاسادى.

- تاريحي ۇدەرىستىڭ تۇرعىسىنان العاندا، 27 جىل قىسقا ۋاقىت كەزەڭى بولىپ تابىلادى، ءبىراق ەلدىڭ ساياسي، ەكونوميكالىق جانە الەۋمەتتىك سالالارىنداعى وزگەرىستەر قارقىنىنىڭ وسكەنى سونشالىق، بۇل وزگەرىستەردىڭ اۋقىمى 90-جىلداردىڭ باسىندا جاس مەملەكەتتىڭ العاشقى قادامدارىنا كۋا بولعان ادامداردى تاڭ قالدىرماي قويمايدى. پرەزيدەنت جۇرگىزىپ وتىرعان ساياساتتىڭ نەگىزگى پوستۋلاتى ءارقاشان ەلدەگى بەيبىتشىلىك پەن كەلىسىمدى ساقتاۋ بولدى. العاشقى كۇندەردەن باستاپ رەفورمالاردىڭ الەۋمەتتىك باعدارلانۋىنا باسا نازار اۋدارىلدى.

مەملەكەت باسشىسىنا شەشىمدەردى ۋاقىتىلى قابىلداۋعا، ۋاقىتتىڭ قيىندىقتارىنا جاۋاپ بەرۋگە، جاعدايدى وتە قيىن كەزدە تۇزەتۋگە تۋرا كەلدى. سونىمەن بىرگە نۇرسۇلتان نازاربايەۆ ءارقاشان جاۋاپكەرشىلىكتى وزىنە الدى، - دەدى پروفەسسور.

ءوز سوزىندە ول كونفەرەنسيانى قازاقستان ەلورداسىنىڭ 20 جىلدىعىن مەرەكەلەۋ جىلى وتكىزۋدىڭ سيمۆولدىعىن اتاپ ءوتتى.

- استانا جيىرما جىل ىشىندە تاۋەلسىز قازاقستاننىڭ تابىسى مەن گۇلدەنۋىنىڭ نىشانىنا اينالدى. وسى مۇمكىندىكتى پايدالانا وتىرىپ، ەلوردا تۇرعىنى رەتىندە اقتوبەلىكتەرگە استانا مەرەيتويىنا تارتۋ ەتكەن بىرەگەي سىيلىق - «بەيبىتشىلىك قابىرعاسى» ەسكەرتكىشى ءۇشىن العىس ايتامىن. ونىڭ اشىلۋ ءراسىمى حالىقارالىق يادرولىق سىناققا قارسى ارەكەت كۇنى ءوتتى. مەملەكەت باسشىسى استانادا ورناتىلعان بىرەگەي ەسكەرتكىشتىڭ تاريحىمىزدىڭ ساباقتارىن ءبىلىپ، ەستە ساقتاۋعا، ءبىزدىڭ ءوز جەرىمىزدە قۇرعان بەيبىتشىلىك پەن يگىلىكتى قۇرمەتتەۋگە شاقىرۋ بولىپ تابىلاتىنىن اتاپ ءوتتى. «بەيبىتشىلىك قابىرعاسى» - بۇل زامانداستارعا بەيبىتشىلىك قۇندىلىقتارى مەن وتكەننىڭ قايعىلى بەتتەرىنىڭ قايتالانۋىنا جول بەرمەۋ تۋرالى تاعى ءبىر ەسكەرتۋ. 11 قازاندا الەمدىك جانە ءداستۇرلى دىندەر كوشباسشىلارىنىڭ 6-شى سەزى اياسىندا «بەيبىتشىلىك» ءسوزى 51 تىلدە جازىلعان «بەيبىتشىلىك قابىرعاسىندا» ءتۇرلى ءدىن وكىلدەرى وسى جەردەگى بەيبىتشىلىك پەن كەلىسىم ءۇشىن قاسيەتتى دۇعالارىن وقىدى،- دەيدى ءامىرحان راحىمجانوۆ .

كونفەرەنسياعا قاتىسۋشىلار قازاقستان ايماقتارىن دامىتۋ بويىنشا ن.ءا.نازاربايەۆ ستراتەگياسىنىڭ مانماتىنىندە الەمدىك قوعامداستىقتاعى قازاقستاننىڭ بەدەلى مەن حالىقارالىق مارتەبەسىن ارتتىرۋ فاكتورى رەتىندە تۇڭعىش پرەزيدەنت – ەلباسىنىڭ ىشكى ساياسي باستامالارى مەن ەتنيكاارالىق، كونفەسسياارالىق كەلىسىم مەن رۋحاني دامۋ، «پرەزيدەنتتىڭ بەس الەۋمەتتىك باستاماسى» جوباسى، مەملەكەت باسشىسىنىڭ «بولاشاققا باعدار: قوعامدىق سانانى جاڭعىرتۋ» باعدارلامالىق ماقالاسىن جۇزەگە اسىرۋ سالاسىنداعى عىلىمي زەرتتەۋلەر ناتيجەسىن تالقىلادى.

ءىس-شارا قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ «ن. نازاربايەۆ: ءداۋىر، تۇلعا، قوعام» كوشپەلى كورمە جوباسى اياسىندا وتكىزىلدى. جوبا بويىنشا اۋقىمدى ءعىلىمي-بىلىم بەرۋ جانە مادەني-اعارتۋ شارالارى، سونىمەن قاتار اقتوبە وبلىسى بويىنشا كوشپەلى ەكسكۋرسيالار ۇيىمداستىرىلادى. جوبا ەلباسى كىتاپحاناسىنىڭ جيناقتارىنان ۇسىنىلعان قور كورمەسىنە نەگىزدەلگەن. كورمە 14 قاراشادان باستاپ اقتوبە وبلىستىق تاريحي-ولكەتانۋ مۇراجايىنىڭ جاڭا عيماراتىندا ەكسپوناتتالۋدا. اقتوبە تۇرعىندارى مەن قوناقتارى 2019 جىلعى قاڭتار ايىنىڭ سوڭىنا دەيىن كورمەنى تەگىن تاماشالاي الادى.