اقتوبەدەگى تۇڭعىش Check-up ورتالىعىنىڭ قۇرىلىسىن 2019 جىلى اياقتاۋ جوسپارلانىپ وتىر. بۇل تۋرالى اقتوبە وبلىسىنىڭ اكىمى بەردىبەك ساپاربايەۆ وڭتۇستىك كورەياعا بارعان جۇمىس ساپارىن قورىتىندىلاي كەلە مالىمدەدى.
- ءبىزدىڭ ساپارىمىز پرەزيدەنت نۇرسۇلتان نازاربايەۆتىڭ دامىعان ەلدەرمەن ەكىجاقتى ءوزارا قارىم-قاتىناستى ورناتۋ تۋرالى تاپسىرماسى اياسىندا ءوتتى. ساپاردىڭ نەگىزگى ماقساتى – كورەياداعى الدىڭعى قاتارلى تەحنولوگيالار مەن يننوۆاسيالاردى الۋ جانە ەنگىزۋ. سونىڭ ىشىندە ءبىزدى ەنەرگيانىڭ بالامالى كوزدەرىن پايدالانۋ جوبالارى قىزىقتىرادى. ءبىز قازاقستاننىڭ كورەيا رەسپۋبليكاسىنداعى ەلشىلىگىمەن بىرگە سەرىكتەستىك جانە تاجىريبە الماسۋ جۇمىسىن جالعاستىرامىز،- دەدى بەردىبەك ساپاربايەۆ. اقتوبەلىك دەلەگاسيا دەنساۋلىق ساقتاۋ سالاسىنداعى جاڭا تەحنولوگيالارعا ەرەكشە نازار اۋداردى.
- سوڭعى ءۇش جىلدا وڭتۇستىك كورەيانىڭ الدىڭعى قاتارلى مەديسينا مەكەملەرىنىڭ ءبىرى – سەۋل ۇلتتىق ۋنيۆەرسيتەتىمەن تىعىز ارىپتەستىك قارىم-قاتىناس جولعا قويىلدى. اقتوبەدە باۋىر مەن بۇيرەك الماستىرۋ، بۋىن اۋىستىرۋ وتالارى بىرگە جاسالدى. اقتوبەلىك بالالار وڭتۇستىك كورەيادا تەگىن ەمدەلدى، وڭتۇستىك كورەيالىق جەتەكشى دارىگەرلەر اقتوبەلىك ارىپتەستەرىن وقىتتى. ءبىز وسى جۇمىستىڭ جالعاسۋى جايلى كەلىستىك. سونداي-اق، كەلەسى جىلى اقتوبەدەگى Check-up ورتالىق قۇرىلىسىن اياقتاۋعا كەلىستىك، - دەدى اقتوبە وبلىسىنىڭ اكىمى.
اقتوبەدەگى قۇنى 5 ملرد تەڭگە بولاتىن Check-up كەشەندى دياگنوستيكالىق ورتالىعىنىڭ قۇرىلىسى سەۋل ۇلتتىق ۋنيۆەرسيتەتىمەن بىرگە مەملەكەتتىك-جەكە سەرىكتەستىك اياسىندا جۇزەگە اسىرىلۋدا. ورتالىقتىڭ بىرەگەيلىگى – ءاربىر ادام ءتورت ساعاتتىڭ ىشىندە تولىق تەكسەرۋدەن ءوتىپ، دەنساۋلىعى جايلى بارلىق اقپاراتتى بىلە الادى.
بۇدان بۇرىن حابارلاعانداي، بەردىبەك ساپاربايەۆ كورەياعا ساپارى كەزىندە مۇناي-گاز، قۇرىلىس ينجەنەرياسى مەن دەنساۋلىق ساقتاۋ سالالارى بويىنشا الەمدىك دەڭگەيدەگى كومپانيالاردىڭ باسشىلارىمەن كەزدەستى. اتاپ ايتقاندا، K-Medical Lab كورپوراسياسىنىڭ باس ديرەكتورى لي كىن ەنگپەن كەلىسسوزدەر جۇرگىزىلدى. كەزدەسۋ بارىسىندا ەكىجاقتى سەرىكتەستىك ماسەلەلەرى تالقىلاندى. K-Medical Lab باسشىسى ءتۇرلى باعىتتاعى التى جوعارى تەحنولوگيالىق مەديسينا مەكەمەسىنىڭ قۇرىلىس جوبالارىن تانىستىردى. اقتوبەلىك دەلەگاسيانى ونكولوگيالىق ورتالىقتىڭ، سونىمەن قاتار، انا مەن بالاعا بوسانعاننان كەيىنگى كۇتىم ورتالىعىنىڭ جوبالارى ەرەكشە قىزىقتىردى. بەردىبەك ساپاربايەۆ اتالمىش باستامالار بويىنشا شەشىمنىڭ جەتە زەرتتەۋدەن سوڭ قابىلداناتىنىن اتاپ ءوتتى. K-Medical Lab كورپوراسياسىمەن كەلىسسوزدەر كەلەر جىلدىڭ باسىندا جالعاسپاق. بۇدان باسقا، دەنساۋلىق ساقتاۋ سالاسىنداعى ەكىجاقتى قارىم قاتىناستى دامىتۋ ماسەلەلەرى ءوڭىر باسشىسى مەن سەۋل ۇلتتىق ۋنيۆەرسيتەتىنىڭ رەكتورى وونگ حاك كيممەن كەزدەسۋ كەزىندە قارالدى.
پىكىر قالدىرۋ