اقتوبە وبلىسىنىڭ ەڭ كونە باسىلىمى - «اكتيۋبينسكيي ۆەستنيك» گازەتى ءوزىنىڭ 100 جىلدىق مەرەيتويىن تويلادى. وسى جىلداردىڭ ىشىندە وبلىستىق قوعامدىق-ساياسي گازەت ءوزىنىڭ اتاۋىن، تارالىمى مەن ديزاينىن سان مارتە وزگەرتتى. بۇگىندە رەداكسيادا 22 ادام ەڭبەك ەتەدى، ولاردىڭ ونى – جۋرناليستەر.

بىرنەشە عاسىر بويى «اكتيۋبينسكيي ۆەستنيك» گازەتىنىڭ ءوز عيماراتى بولمادى. مەرەيتوي جىلى بۇل ماسەلە شەشىمىن تاپتى. 30 قاراشا، جۇما كۇنى وبلىستاعى تۇڭعىش باسپا ءسوز ءۇيى سالتاناتتى تۇردە اشىلدى. ەندى مۇندا وبلىستاعى ەكى باستى باسىلىم - «اقتوبە» جانە «اكتيۋبينسكيي ۆەستنيك» گازەتتەرى ورنالاسادى. باسىلىم ۇجىمدارىن قۋانىشتارىمەن اقتوبە وبلىسىنىڭ اكىمى بەردىبەك ساپاربايەۆ تا قۇتتىقتادى.

* سىزدەردى ق ر تۇڭعىش پرەزيدەنتى كۇنىمەن جانە ەلىمىزدىڭ تاريحىنداعى العاشقى گازەتتەردىڭ ءبىرى – «اكتيۋبينسكيي ۆەستنيك» گازەتىنىڭ 100 جىلدىعىمەن قۇتتىقتايمىن! گازەت وسى ۋاقىت ىشىندە ءبىزدىڭ جالپى تاريحىمىزدىڭ ءتۇرلى ساتتەرىن حالىقپەن بىرگە وتكەردى. قۇلدىراۋ، اشارشىلىق، سوعىس جىلدارى سىندى قيىن-قىستاۋلارعا قاراماستان شىعا بەردى. بۇل مەرەيتوي – گازەت ۇجىمى ءۇشىن دە، بۇكىل وبلىس ءۇشىن دە ۇلكەن، اسىلىندا اتاۋلى كۇن. گازەتتىڭ 100 جىلدىعىن مەرەكەلەۋ اياسىندا وبلىس تاريحىندا ءبىرىنشى رەت «باسپا ءسوز ءۇيىن» اشقانىمىز قۋانتادى. بۇل ءبىزدىڭ وڭىردەگى جۋرناليستيكا مەن بۇقارالىق اقپارات قۇرالدارىنىڭ دامۋىنا جاڭا شابىت بەرەتىنىنە سەنىمدىمىن،- دەدى بەردىبەك ساپاربايەۆ.

باسپا ءسوز ءۇيىنىڭ اشىلۋىنا بايلانىستى وتكەن سالتاناتتى شاراعا سونداي-اق، وليمپيادا چەمپيونى جاقسىلىق ۇشكەمپىروۆ، قازاقستانداعى اتاقتى قوعام قايراتكەرلەر مەن جۋرناليستەر – عادىلبەك شالاحمەتوۆ، قاينار ولجاي، نۇرتىلەۋ يمانعالي ۇلى مەن ت.ب.، وبلىستىق گازەتتەردىڭ رەداكتورلارى، ارداگەرلەر مەن گازەتتىڭ بۇرىنعى قىزمەتكەرلەرى قاتىستى.

قوناقتار الاڭى شامامەن 6،8 مىڭ شارشى مەتر بولاتىن باسپا ءسوز ءۇيىنىڭ ءتورت قاباتتى كەڭ ءارى جارىق عيماراتىن ارالادى. بۇگىندە مۇندا باسپاحانا مەن «اقتوبە» جانە «اكتيۋبينسكيي ۆەستنيك» گازەتتەرى مەن ولاردىڭ سايتتارىنىڭ، «اقتوبە»، «ادىرنا»، «ءۇش تاعان» جۋرنالدارىنىڭ، «اقتوبەمەديا.kz» مەديا پورتالىنىڭ، «Akotbenews» اقپاراتتىق سايتىنىڭ مەنشىك يەسى «اكتوبە مەديا» ج ش س ورنالاسقان.

بۇدان باسقا، باسپا ءسوز ۇيىندە بۇقارالىق اقپارات قۇرالدارىنىڭ مۇراجايى، كىتاپحانا، بەلگىلى جۋرناليست گۇلناز الىمگەرەيدىڭ ونلاين-ستۋدياسى مەن اۆتورلىق مەديا مەكتەبى اشىلعان.

«اكتيۋبينسكيي ۆەستنيك» گازەتىنىڭ 100 جىلدىعىنا ارنالعان باستى شارا بۇگىن كەشكە ت.احتانوۆ اتىنداعى دراما تەاتر عيماراتىندا وتەدى. شارا اياسىندا باسىلىمنىڭ ۇجىمى مەن جەكەلەگەن قىزمەتكەرلەرىنە ق ر پرەزيدەنتى اكىمشىلىگىنىڭ، ق ر اقپارات جانە بايلانىس مينيسترلىگىنىڭ، وبلىس اكىمى مەن وبلىستىق ءماسليحاتتىڭ ءتۇرلى ماراپاتتارى تابىس ەتىلەدى.