اقتوبە وبلىسىنىڭ «اتامەكەن» كاسىپكەرلەر پالاتاسىندا «باستاۋ» جوباسىنىڭ 71 تۇلەگى ءوز بيزنەس جوسپارلارىن قورعادى. بۇل - وسى جىلعى جوبانىڭ سوڭعى 6-لەگى بويىنشا كاسىپكەرلىك ءبىلىم العان جاندار.

وسى توپتا وبلىس بويىنشا 580 ادام وقىعان. باستاپقىدا كاسىپكەرلىك وقۋلارىن اۋىل ادامدارىنىڭ اراسىندا وتكىزۋ كوزدەلگەن بولاتىن، الايدا بيىل ولاردىڭ قاتارىنا 109 قالا تۇرعىنى دا قوسىلدى.

باعدارلاما بويىنشا كاسىپكەرلىك ءبىلىم العان جانداردىڭ ءبىرى - اقتوبە قالاسى ماڭىنداعى قۋرايلى ەلدى مەكەنىنىڭ تۇرعىنى ەرلان ايتەكەنوۆ. وسىعان دەيىن ول قالاداعى كولىك جوندەۋ ستانسيالارىندا مەحانيك بولىپ جۇمىس جاساپتى. «باستاۋ» جوباسى ارقىلى بيزنەستى جۇرگىزۋدى ۇيرەنۋگە بولادى دەگەندى ەستىپ، كاسىپكەرلىك ساباقتارىنا قاتىسۋدى ۇيعارىپتى. جاقىن ارادا ءوز اۋىلىندا جول بويىنداعى كولىك جوندەۋ قىزمەتىن اشپاق. بۇگىنگى كۇنى جوبا جاتتىقتىرۋشىلارىنىڭ كومەگىمەن بيزنەس-جوسپار جاساپ، مەملەكەتتەن كولىك جوندەۋ كەشەنىن سالۋعا ارنالعان جەر تەلىمىن الدى. باعدارلاما كومەگىمەن قۇرىلىس جۇمىستارىنا «اۋىل شارۋاشىلىعىن قولداۋ قورىنان» 6 ملن تەڭگەنى 6% نەسيەمەن الۋدى جوسپارلاپ وتىر.

«كاسىپ باستاۋدىڭ وزىندىك قىر-سىرى جوق ەمەس ەكەن. جەرگىلىكتى جەردەگى بيزنەس احۋالدى زەردەلەپ، جەكە كاسىپكەرلىككە تىركەلۋدەن باستاپ، سالىق تولەۋ شارتتارى تۋرالى ءبىراز ماعلۇمات الدىق. ءوز ورتالىعىمدى اشسام دەيمىن. بيزنەس ءبىلىمىن العان جاندارعا كاسىپ باستاۋدىڭ قيىن ەمەس ەكەنىنە كوزىم جەتتى. كەلەشەكتە كاسىبىمدى كەڭەيتىپ، جول بويىنداعى كەمپينگ اشۋ جوسپارىمدا بار»،-دەيدى بولاشاق كاسىپكەر.

بيىل وبلىستاعى 12 اۋدان بويىنشا بيزنەس ساباقتارىنا بارلىعى 2 231 ادام وقىعان. جوبا بويىنشا 6 توپ 1 ايلىق كاسىپكەرلىك كۋرستارىنان ءوتتى. ولاردىڭ 416 –سى مەملەكەتتىك قولداۋ شارالارى ارقىلى 966 646 000 تەڭگە كولەمىندە نەسيە راسىمدەدى. سونىمەن قاتار، «باستاۋ» جوباسىن بىتىرگەن 81 تىڭداۋشى 240 000 تەڭگەنى قۇرايتىن ءبىر رەتتىك ارنايى گرانتقا قول جەتكىزدى.

««اتامەكەن» ۇلتتىق كاسىپكەرلەر پالاتاسىنىڭ باستاماسىمەن جۇزەگە اسىرىلعان كاسىپكەرلىك نەگىزدەرىنە وقىتاتىن «باستاۋ» جوباسى بيىلعى جۇمىسىن ءتامامدادى. «باستاۋ» بويىنشا بيزنەس ىلىمدەرىن وقۋعا سۇرانىس كوپ بولدى، سوندىقتان بيىل قالا تۇرعىندارىن دا وقىتۋ قولعا الىندى. جوبا بويىنشا قاتىسۋشىلار كاسىپكەرلىكتىڭ 12 ءمودۋلى بويىنشا وقىتىلدى»-دەيدى جوبانىڭ اقتوبە وبلىسى بويىنشا ۇيلەستىرۋشىسى ديانا جۇمابايەۆا.

ەسكە سالساق، «باستاۋ» جوباسى «اتامەكەن» ۇلتتىق كاسىپكەرلەر پالاتاسىنىڭ باستاماسىمەن جانە ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسىنىڭ ەكىنشى باعىتى اياسىندا جۇزەگە اسىرىلۋدا.