ەلباسىنىڭ جىل سايىنعى قازاقستان حالقىنا جولداۋىندا بەرگەن تاپسىرماسىن ورىنداۋدا اقتوبە وبلىسىندا «نۇرلى جەر» مەملەكەتتىك باعدارلاماسى اياسىندا تۇرعىن ءۇي زايمىنىڭ العاشقى جارناسىن 20 پايىزدان 10 پايىزعا تومەندەتۋ ءۇشىن تۇرعىن ءۇي سەرتيفيكاتتارىن بەرۋدى باستادى.

ماتەريالدىق قولداۋدى باسپانا كەزەگىندە تۇرعان قتقجب سالىمشىلارى «نۇر اقتوبە» تۇرعىن ءۇي الابىنداعى ءبىر بولمەلى پاتەرلەردى ساتىپ الۋ كەزىندە پايدالانا الادى.

7 قاراشا، سارسەنبى كۇنى اقتوبە وبلىسىنىڭ اكىمى بەردىبەك ساپاربايەۆ پەن «قازاقستاننىڭ تۇرعىن ءۇي قۇرىلىس جيناق بانكى» اق باسقارماسىنىڭ ءتورايىمى ءلاززات يبراگيموۆا قتقجب سالىمشىلارىنا تۇرعىن ءۇي سەرتيفيكاتتارىن بەرۋ، سونىمەن قاتار، جالدامالى پاتەردى ساتىپ الۋ قۇقىعىمەن ۇسىنۋدا سەرىكتەس بولۋ تۋرالى كەلىسىمگە قول قويدى.

- ءبىز تۇرعىن ءۇي قۇرىلىس جيناق بانكىمەن پرەزيدەنتتىڭ حالىقتى باسپانامەن قامتاماسىز ەتۋ تۋرالى تاپسىرماسىن ورىنداۋدا بەلسەندى جۇمىس جاساپ جاتىرمىز. سەرىكتەستىككە مىنا دەرەك دالەل: بۇگىندە بانكتىڭ اقتوبەلىك فيليالىندا 90 مىڭ ادامنىڭ دەپوزيتى بار، ولاردىڭ ىشىندە 20 مىڭ ادام جەرگىلىكتى اتقارۋشى ورگانداردا باسپانا كەزەگىندە تۇرعاندار. بۇگىن ءبىز بىردەن ەكى مەموراندۋمعا قول قويا وتىرا ءوزارا قارىم قاتىناستى كەڭەيتەمىز،- دەدى وبلىس اكىمى.

تۇرعىن ءۇي سەرتيفيكاتىن بەرۋ ءۇشىن وبلىس اكىمدىگى ءبىرىنشى كەزەڭدە 250 ميلليون تەڭگە ءبولدى. بۇل قاراجات بانكتىڭ 500-دەن اسا سالىمشىسىنىڭ العاشقى جارناسىن تومەندەتۋگە مۇمكىندىك بەرەدى دەپ كۇتىلۋدە. قوسا كەتەيىك، «نۇر اقتوبەدەگى» تازا ارلەۋدەگى ءبىر بولمەلى پاتەردىڭ ءبىر شارشى مەترىنىڭ قۇنى 100 000 – 120 000 تەڭگەنى قۇرايدى. پاتەرلەردىڭ جالپى شارشى مەترى - 32-54 شارشى مەتر. سالىمشىدا باسپانا قۇنىنىڭ 10%-ى بولۋ كەرەك. العاشقى جارنانىڭ قالعان 10%-ىن اكىمدىك بيۋدجەتتەن بەرەدى. ونى قارىز الۋشى بەس جىل ىشىندە اي سايىن 8 250 تەڭگەدەن قايتاراتىن بولادى. پاتەر قۇنىنىڭ قالعان بولىگىن تۇرعىن ءۇي قۇرىلىس جيناق بانكى جىلدىق مولشەرلەمەسى 5%-دىق جەڭىلدەتىلگەن نەسيەمەن ۇسىنادى.

- اقتوبە وبلىسى پرەزيدەنت جولداۋى اياسىندا تۇرعىن ءۇي سەرتيفيكاتى تۋرالى مەموراندۋمعا بۇكىل ءوڭىردىڭ ىشىندە ءبىرىنشى بولىپ قول قويىپ جاتىر. بۇل ايلىعى ءتىپتى 60 مىڭ بولاتىن ادامدارعا دا باسپانالى بولۋعا مۇمكىندىك بەرەدى. اكىمدىك پەن وبلىس اكىمىنە العىسىمدى بىلدىرگىم كەلەدى. اقتوبە وبلىسى – بەلسەندى وڭىرلەردىڭ ءبىرى جانە نەسيەلىك باسپانانى ساتىپ الۋدا دا رەسپۋبليكا بويىنشا كوش باسىندا تۇر،-دەپ اتاپ ءوتتى ءلاززات يبراگيموۆا.

باعدارلاماعا قاتىسۋ ءۇشىن وتىنىشتەر وسى جىلعى 6-9 قاراشا ارالىعىندا حالىقتىق كەڭسە عيماراتىندا قابىلدانادى. نەگىزگى كريتەريي - جەكەمەنشىك قۇقىعىنداعى باسپانانىڭ بولماۋى جانە تولەم قابىلەتىن راستاۋ.