جانىڭ جانناتتىق بولسىن، باۋىرىم!

ءيا، بۇل بالانىڭ ساباققا دەگەن قۇلقى بولعان جوق. ءبىراق، بىلىمگە دەگەن نيەتى بولمادى دەپ ايتۋعا بولمايدى. ساباققا بارمايدى. اقىرى وقۋدان دا شىعىپ كەتتى. كەيىن ءوزىنىڭ اۋىلىنا قايتتى. اۋىلى كەنتاۋ جاقتا. بىرنەشە كۇن بۇرىن عانا سۋىت حابار ەستىپ، جۇرەگىم ەزىلىپ كەتتى...

سۋرەتتەگى جىگىتكە قاراڭىزشى، 1996-97 جىلعى جىگىت. ءالى ءومىرىنىڭ ءبىر قىزىعى باستالماعان ورىمدەي جاس جىگىت. قازاقتىڭ اپ-ادەمى بالاسى. بىرەۋدىڭ كوز قۋانىشى، ءبىر قىزدىڭ جولداسى بولاتىن، بىرەۋدىڭ دوسى-باۋىرىم، بىرەۋدىڭ تەنتەك ءىنىسى ەدى.

ءمان-جايدى ەستىپ توبە شاشىم تىك تۇردى. وققا ۇشىپ قازا تاپتى. سونداعىسى، اتىپ كەتكەن جىگىتتەر 1999 جىلعى «بانديتتەر» ەكەن. جاستارى ءالى 20-عا جەتپەگەن.

«90-جىلدار» دەگەن تۇسىنىك ءبىز ءۇشىن «بانديتتەردى ەسكە الاتىن» كەزەڭىمەن ەستە قالدى. ول وزىنە ءبىر ءداۋىر بولدى. قوعام سوعان الىپ كەلدى. ال ءقازىر شە؟ ءقازىر كىمگە نە جەتپەي جاتىر، قولعا قارۋ ۇستاپ، جاسىڭ جيىرماعا جەتپەي جاتىپ قولىڭدى قانعا مالاتىنداي نە كۇن تۋدى؟

جىگىت بولعان سوڭ «كوشە كورۋ» دەگەن تۇسىنىك بولادى. مەن ونى قولدايمىن. ەر بولعاننان كەيىن، ۇيىڭدە ۇيمەلەپ جاتقانشا، كوشەگە شىعىپ تاياق جەگەنىڭ، مۇرنىڭ قاناپ قايتقانى قالىپتى ءارى تۇسىنىكتى ماسەلە. تەك، قارۋ ۇستاپ «اتىپ تاستادىم» دەگەن اتاق پا الدە ابىروي ما؟

20 جاستى قويىپ، 40 جاسقا كەلسە دە ەلىمىزدە وزگە ۇلتتاردىڭ قورلىعىنا، ولاردىڭ مىسىنا شامامىز جەپتەي جۇرگەن جوق پا؟ ولاردان قورقۋ ەمەس، ءبىز ءوزىمىزدىڭ زاڭنان سونداي قورقامىز، ءتىپتى ءبىزدىڭ زاڭ ءبىزدىڭ مۇددەنى قورعامايتىنداي كورىنەدى. وزگە ۇلتقا ساۋساعىڭ تيسە سوتتالىپ، تۇرمەدەن شىعاسىڭ. ال قازاق-قازاقپەن قىرىلا بەرسىن، ولارعا ءباربىر سەكىلدى. بىزگە ءبارىن سويىپ سالاتىن زاڭ كەرەك! زاڭنان ەلدىڭ اۋماعىنداعى بارلىق ازامات قورقۋى كەرەك جانە قۇرمەتتەۋى مىندەتتى. ول – زاڭ! مىنە، «وي ءبىزدىڭ زاڭدى قويشى!» دەگەننىڭ ارتى وسىلاي ولىمگە اپارادى.

ورىستان سىڭگەن «بانديتتىك ءومىر»، «اتىپ كەتۋ»، «سىندىرىپ تاستاۋ» دەگەن تۇسىنىك ەندىگى ءتۇپ تامىرىمەن جوعالىپ كەتۋى كەرەك ەدى. بىزدە ءالى بار. تاڭداناتىن ەشتەڭەسى جوق، اۋىلدا جاسى وتىزعا جاقىنداپ قالعان جىگىتتەر جۇمىسسىز ءجۇرىپ وسىلاي بوپسالاپ، قورقىتىپ اقشا الادى. نە ءومىر؟ قانداي 2030؟ قانداي دامۋ؟ قانداي «رۋحاني جاڭعىرۋ»؟

ءبىر بالانىڭ ولىمىنە ۇلتتىڭ نە مەملەكەتتىڭ دامۋى قاراپ قالعان جوق دەپ ويلاساڭدار، قاتتى قاتەلەستىڭدەر. مەملەكەت ءۇشىن ەڭ ءبىرىنشى ورىندا ونىڭ ەكونوميكاسى نە مادەنيەتى ەمەس، ادامي كاپيتالى جوعارى تۇرۋ كەرەك. ادامنىڭ تاعدىرىنا اراشا تۇسە الماي وتىرىپ، ول مەملەكەتتىڭ دامۋى تۋرالى قالاي ءسوز بولماق؟

قازانىڭ ارتى قايىرلى بولسىن! 
«مىڭ ءولىپ، مىڭ تىرىلگەن» حالىقتىڭ ۇرپاعىمىز. ونسىز دا مىڭىمىز ۇلت ءۇشىن، ازاتتىق ءۇشىن كەۋدەسىن توسىپ وققا ۇشتى. ولگەنىم ەندى ءتىرىلدى مە دەگەن كەزدە، ولگەندەردىڭ ارتىنان ولمەك جاساۋدىڭ قاجەتى قانشا؟ باتىرىڭ ولسە جاۋ قولىنان ءولدى، الاشىڭ قىرىلسا جاۋدىڭ قولىنان، ساتقىننىڭ قولىنان كەتتى. ايدىڭ كۇنى اماندا ەرەگەس ءۇشىن قازاق قازاقتى اتىپ تاستاسا... اششىنباي قايتەسىڭ!

رۇستەم قايىرتايدىڭ «قىراتىن جوڭعار دا جوق، گەرمەن دا جوق، سوندا دا جەتىمى مەن جەسىرى كوپ» دەپ ايتىستا تۇيىندەگەنى بار ەدى. بەيبىت كۇندە اتىلعان وقتىڭ وتەۋىن كىم بەرەدى؟

مارعۇلان اقاننىڭ فەيسبۋك پاراقشاسىنان الىنعان