استانا قالالىق سوتىندا 26 جاستاعى ەسكەندىر سۇلەيمەنوۆ كوز جۇمعان جول اپاتىنا قاتىستى ءىس بويىنشا اپەللياسيالىق القانىڭ شەشىمى شىقتى، دەپ حابارلايدى Qamshy.kz اقپارات اگەنتتىگى Sputnik قازاقستان دەرەگىنە سۇيەنىپ. 

"ءىس ماتەريالدارىن زەردەلەي كەلە، سوت القاسى ۇكىمدى وزگەرىسسىز قالدىرۋدى شەشتى"، — دەپ مالىمدەدى اپەللسيالىق شەشىمدى وقىعان سۋديا اسەم رامازانوۆا. 

سۋديا اۋداندىق سوتتىڭ شەشىمى ادىلدىكتىڭ بارلىق قاعيداتىنا تولىعىمەن جاۋاپ بەرەتىنىن اتاپ ءوتتى. 

ەسكە سالا كەتسەك، جول اپاتى 2018 جىلدىڭ 22 ماۋسىمىندا استاناداعى ماڭگىلىك ەل – كەرەي جانىبەك حاندار كوشەلەرىنىڭ قيىلىسىندا بولدى. قىزىلوردا وبلىسى ىشكى ىستەر دەپارتامەنتىنىڭ باستىعى، پوليسيا پولكوۆنيگى قايرات ءمۇحيتوۆتىڭ قىزى ماليكا مۇحيتوۆا موتوسيكلمەن كەلە جاتقان ەسكەندىر سۇلەيمەنوۆتى قاعىپ كەتتى. بەلگىلى اقىن ولجاس سۇلەيمەنوۆتىڭ 26 جاستاعى جيەنى وقيعا ورنىندا كوز جۇمدى. 

قاراشا ايىنىڭ ورتاسىندا 29 جاستاعى ماليكا مۇحيتوۆا ق ر قىلمىستىق كودەكسى 345-بابى 3-تارماعى بويىنشا (جول قوزعالىسى نەمەسە كولىكتى پايدالانۋ ەرەجەلەرىنىڭ بۇزىلۋىنان ابايسىزدا ادام ولىمىنە اكەپ سوققان ارەكەت) كىنالى دەپ تانىلدى. سوت ۇكىمىمەن ول قاۋىپسىزدىگى تومەن قىلمىستىق-اتقارۋ جۇيەسى مەكەمەسىندە جازاسىن وتەۋمەن ەكى جىلعا باس بوستاندىعىنان ايىرىلدى.

كەيىنىرەك سوتتالۋشىنىڭ ادۆوكاتى دميتريي كۋرياچەنكو سوت ۇكىمىنە شاعىم ءتۇسىردى. اپەللياسيالىق شاعىم بويىنشا سۋديا اسەم رامازانوۆانىڭ توراعالىعىمەن ءۇش سوت وتىرىسى ءوتتى. 

مارقۇمنىڭ اتاسى، بەلگىلى اقىن ولجاس سۇلەيمەنوۆ وتباسىنىڭ ۇلكەنى رەتىندە مۇحيتوۆانىڭ جازاسىن جەڭىلدەتۋ تۋرالى وتىنىشپەن سوتقا ەكى رەت جۇگىندى. الايدا سۇلەيمەنوۆتىڭ ەكى حاتى دا ءىس ماتەريالدارىنا جەكە ادامنىڭ پىكىرى رەتىندە قوسىلدى. جاس جىگىتتىڭ اتا-اناسى سوتتان ۇكىمدى وزگەرىسسىز قالدىرۋدى سۇرادى.