الماتى وبلىسىندا 28 جاستاعى ەر ادامنىڭ ولىمىنە سەبەپكەر بولعان دەگەن حالىق ەمشىسى قاماۋعا الىندى، دەپ حابارلايدى Tengrinews.kz ءتىلشىسى وبلىستىق پوليسيا دەپارتامەنتىنە سىلتەمە جاساپ.
وقيعا 12 قاڭتاردا قاراساي اۋدانىندا بولعان. ەر ادام ءوز ۇيىندە ءولى تابىلعان. سوت-مەديسينالىق تەكسەرۋىنىڭ ناتيجەسىندە كەۋدە قۋىسىنىڭ تۇيىق جاراقاتى، قابىرعالارىنىڭ سىنۋى مەن وكپەنىڭ جاراقاتتانۋى ەر ازاماتتىڭ ولىمىنە سەبەپكەر بولعانى انىقتالعان. جابىرلەنۋشىگە ءتۇرلى اۋىر دەنە جاراقاتىن سالۋ بارىسىندا ونىڭ ولىمىنە اكەلۋگە قاتىسى بار دەگەن كۇدىكپەن پوليسەيلەر حالىق ەمشىسىنىڭ ۇستىنەن قىلمىستىق ءىس ءوندىرىسىن قوزعادى.
"پوليسياعا قايتىس بولعان ازاماتتىڭ تۋىستارىنان ءالى كۇنگە ارىز تۇسكەن جوق. الايدا بۇل دەرەك بويىنشا رق قىلمىستىق كودەكسىنىڭ 106-بابى 3-تارماعىنا سايكەس سوتقا دەيىنگى تەرگەۋ امالدارى جۇرگىزىلىپ جاتىر. قىلمىستىق ىستە كۇدىكتى رەتىندە ءداستۇرلى ەمەس مەديسينا قىزمەتىمەن اينالىساتىن 63 جاستاعى ەر ادام ايىپتالىپ جاتىر"، - دەپ اتاپ ءوتتى الماتى وبلىسى پوليسيا دەپارتامەنتىنىڭ باسپا ءسوز قىزمەتى.
ايتا كەتەيىك، حالىق ەمشىسىنە جابىرلەنۋشىنى ونىڭ تۋىستارى الىپ كەلگەن. ولاردىڭ پىكىرى بويىنشا، جاس ازاماتقا جىن كىرگەن جانە ول سوڭعى ءۇش جىل ىشىندە سول جىن اسەرىنەن قيىندىق كورگەن. حالىق ەمشىسىنىڭ 5 كۇن ىشىندە ءتۇرلى ادىستەردى قولدانۋ ارقىلى ازاماتتان جىندى شىعارۋ سالدارىنان جابىرلەنۋشىنىڭ كوز جۇمۋى مۇمكىن دەلىنەدى.
"بۇل ءىس قاراساي اۋدانى پوليسياسىنىڭ وندىرىسىندە. كۇدىكتى ۋاقىتشا ۇستاۋ وقشاۋلاعىشىنا قاماققا الىندى"، - دەپ وبلىستىق پوليسيا باسپا ءسوز قىزمەتى تولىقتىرادى.
پىكىر قالدىرۋ