ازات پەرۋاشيەۆ ايماقتار مەن قالالارداعى كوشە، مەكەمە اتاۋلارىنا 750-گە جۋىق الاش قايراتكەرلەرىنىڭ ەسىمىن بەرۋدى ۇسىندى. بۇل جونىندە رەسپۋبليكالىق ماڭىزى بار قالالار مەن وبلىس اكىمدەرىنىڭ اتىنا ءتيىستى حات جولداندى.

اتالعان 750 ارىستىڭ ءتىزىمى جاسالىپ، ءتىپتى، ولاردىڭ قاي وڭىردە، قاي قالادا دۇنيەگە كەلگەنى، قايدا قىزمەت ەتكەنى دە انىقتالدى. بۇل جيناقتالعان ءتىزىم اكىمدەرگە جىبەرىلدى.

«اق جول» پارتياسىنىڭ ءتوراعاسى حاتتا «وسى باعىتتاعى جۇمىستى جالعاستىرۋ – بۇكىل قوعامىمىزدىڭ جانە جاڭعىرعان زامانىمىزدىڭ وزەكتى تالابى. مىسالى، «اقجولدىق» دەپۋتاتتاردىڭ ساۋالىنا بەرىلگەن رەسمي اقپارات بويىنشا ەل اۋقىمىندا لەنين (506 كوشە)، كيروۆ (54 كوشە)، ماركس (40 كوشە)، كرۋپسكايا (28 كوشە)، سۆەردلوۆ (24 كوشە)، ەنگەلس (23 كوشە) اتىنداعى كوشەلەر، مەكەمەلەر مەن ايماقتىق اتاۋلاردىڭ تاپجىلماعان كۇيى تۇرعانى تۇسىنىكسىز»، - دەپ مالىمدەيدى.

سول سەبەپتى «اق جول» اكىمدەردەن ايماقتار مەن قالالارداعى كوشە، مەكەمە اتاۋلارىنا ەلىمىزدىڭ تاعدىرىنا ەش قاتىسى جوق ادامداردىڭ ورنىنا، ءبىرىنشى كەزەكتە ۇلت تاۋەلسىزدىگى جولىندا جانىن پيدا ەتكەن الاشتىڭ كورنەكتى قايراتكەرلەرىنىڭ ەسىمدەرىن بەرۋدى ۇسىنىپ وتىر.

«الاش ارىستارىن ۇلىقتاۋ – ەشبىر باسقا ەتنوسقا قارسى باعىتتالعان باستاما ەمەس. كەرىسىنشە، ءبىزدىڭ ويىمىزشا، الاش مۇراتى بۇكىل قازاقستاندىقتاردى بىرىكتىرىپ، ەلىمىزدىڭ ناعىز ۇلتتىق يدەياسىنا اينالۋى ءتيىس»، - دەلىنگەن رەسمي حاتتا.