نۇرسۇلتان نازاربايەۆ وكىلەتتىلىگىن توقتاتۋ تۋرالى شەشىمى مالىمدەلگەننەن باستاپ قاراپايىم حالىق تۇڭعىش ەل باسىعا دەگەن العىستارىن ءبىلدىرىپ، كەلەسى پرەزيدەنتتىڭ كىم بولاتىندىعىنا الاڭداۋدا. بۇل تۋرالى Qamshy.kz اقپارات اگەنتتىگى حابارلايدى.

ازىلزات ورازباي قىزى اتتى الەۋمەتتىك جەلى قولدانۋشىسى "تۇڭعىش پرەزيدەنتىمىزگە ۇلكەن راقمەت. قانشا ميلليون حالىقتى باسقارۋ وڭاي شارۋا ەمەس. قاراپايىم ادام بولىپ، بىلدەي پرەزيدەنتتىك اتاققا ءوزىنىڭ پەيىلى مەن اقىلدىلىعىنىڭ ارقاسىندا جەتتى. نازاربايەۆ وسى جىلدار ىشىندە ەلىمىزدى كوركەيتتى. 1991 مەن 2019 جىل ارالىعىن سالىستىرىپ قاراساڭىز، وسىنداي ەلدە ءومىر ءسۇرىپ جاتقان ءبىز باقىتتىمىز. قارىزداردى دا ءوزى ءۇشىن ەمەس، ەلى ءۇشىن الدى. شۇكىر جەر قويناۋىمىز بايلىققا تولى، ودان دا قۇتىلار. بۇيىرسا كەلەسى پرەزيدەنتىمىز دە ادالىنان بولسىن." - دەيدى. 

اسىلزات ەڭ باستىسى ەلىمىزدىڭ تىنىش بولۋىن تىلەپ. نۇرسۇلتان ءابىشۇلىنا ەل باسقارعان ۋاقىتتارى ءۇشىن العىسىن ءبىلدىردى. 

ساۋلە سارحاد "قۇرمەتتى، نۇرسۇلتان ءابىش ۇلى ءسىز ەلىمىزدىڭ مىقتى دا، مىڭ جىلدا ءبىر تۋار پاتشامىز، كوش باسشىمىز بولدىڭىز. سىزگە ءبىزدىڭ بولاشاق ۇرپاعىمىز ءۇشىن اتقارعان ەڭبەگىڭىزگە ءوز جانۇيامنىڭ اتىنان شەكسىز العىسىمدى بىلدىرەمىن. جولداۋىڭىزدى كورىپ، مەنىڭ كىشى ۇلىمنان باستاپ جانۇيامىزبەن قاتتى جابىرقاپ قالدىق. كىشى ۇلىم نەگە پرەزيدەنتىمىز كەتەدى دەپ كوزىنە جاس الىپ مەنەن سۇراعان كەزدە ءوزىم دە نە ايتارىمدى ءبىلمي قالدىم. ۋاقىتشا كەتەدى عوي دەپ كوڭىلىن باسىپ قويدىم. كوڭىلىمىز قاتتى ءتۇسىپ، ءبىر تىرەگىمىز كەتىپ قالعانداي، ءىشىمىز قاڭىراپ قالعانداي كۇيدە وتىرمىز. ءبىز ءۇشىن ءسىزدىڭ ورنىڭىزدى ەشكىم باسا المايدى. سىزگە ۇزاق عۇمىر تىلەيمىز . ەلباسىمىز، ءبىز جانۇيامىزبەن ءسىزدىڭ الدىڭىزدا باس يەمىز." - دەيدى.  

"ءيا، تاقتان ءوز ەركىمەن كەتۋ دە ەرلىك! ەندىگى قازاقستاننىڭ بولاشاعى، اينالاسىنداعى ازۋلى ەلدەرمەن قارىم-قاتىناسى، ىشكى-سىرتقى ساياساتى كەلەر پاتشانىڭ شەبەرلىگىنە بايلانىستى. وڭاي شارۋا ەمەس، ارينە. نۇراعامىز قازاقستاندى ەلگە تانىتىپ، ەر جەتكىزدى. 25 جاستاعى قىلشىلداعان جىگىت سەكىلدى وڭ سولىن تانيتىن كۇش - قايراتى بويىندا. ەندى تەك قانا العا، قازاقستان! اتامىز سالعان سارا جولمەن." - دەپ ەلدىڭ بولاشاعى كەمەلدەنە تۇسەتىنىنە سەنىم ءبىلدىردى يسابەكوۆا ءجاميلا.

باتىر كاميلا: جاقسى كەلۋ باردا جاقسى كەتۋ دە بار. ەلباسىمىز ءدال ۋاقىتىندا كەتە ءبىلدى. ەلباسىنىڭ حالىقتىڭ قامى ءۇشىن ىستەگەن ەرەن ەڭبەكتەرى كوپ. ءالى دە بيلىك باسىندا وتىرا بەرگەنى دۇرىس ەدى. ەندى كەلەسى پرەزيدەنت كىم بولادى ەكەن؟ جاڭا پرەزيدەنت جاڭا جاڭالىقتاردى ەنگىزەتىنى بەلگىلى، وسى كۇنىمىزگە زار بولىپ قالماساق ەكەن.

"وسى ۋاقىتقا دەيىن بيلىكتى شالا ساياسي ساراپتامالارمەن پرەمەردەن باستاپ، دەپۋتاتقا دەيىن سىناسام دا، پرەزيدەنتكە قاتىستى بىردە ءبىر نە ماقتاۋ، نە داتتاۋ جازعان ەمەسپىن. نەگە؟ ويتكەنى پرەزيدەنت بولۋ وتە قيىن. ونىڭ جاۋاپكەرشىلىگى ءجۇز اتاننىڭ جۇگىنەن اۋىر. ءيا، 1991-دەن بەرى "قاپ" دەپ سان سوققان دا، قۋانعان دا ساتتەر كوپ بولدى. مەن كوزىمدى تىرناپ اشقان ساتتە ەلباسى پرەزيدەنت ەدى، جاسىم شيرەك عاسىرعا جەتىپ، ەكى بالانىڭ اكەسى بولعان ساتتە قازاقستان جاڭا كەزەڭگە قادام باستى. ەلباسىنىڭ ساياسي قىزمەتىنە تاريح ءالى ءوز ادىلەتتى باعاسىن بەرە جاتار. دەي-تۇرا ەلباسى ءوز حالقىنا اسا ماڭىزدى ساياسي شەشىمدەردى جاساي ءبىلدى دەپ باعالايمىن.استانانى كوشىرۋ ارقىلى گەوساياسي قادامعا باردى.تارىداي شاشىراعان قازاقتى جيناۋ ءۇشىن قىزمەت ەتتى. ول قاسيەتتى ميسسيانى كەلەسى باسشى جالعاستىرۋى ءتيىس.قازاق شەكاراسىن شەگەلەپ بەردى. سولتۇستىكتى قازاقىلاندىرۋ ءۇشىن باعدارلاما اشتى. تۇركىستاندى ورتالىق ەتتى. ءسويتىپ تاريحي ءارى ساياسي قادامعا باردى. ءالىپبيدى لاتىنعا كوشىرۋدى باستادى. قازاقتى تانىتۋ جولىندا ەڭبەگى ەرەن. ارينە، اتقارىلار شارۋا كوپ. كەلەسى باسشىنىڭ قىزمەتى ءتىپتى اۋىر. الەمدىك الپاۋىتتاردىڭ گەوساياسي قاقتىعىسىنان قازاقتى امان الىپ شىعۋ ميسسياسى تۇر."- دەيدى اسحات قاسەنعالي. 

اسحات "قازاققا قۇداي بۇل جولدا جار بولسىن! 90-جىلداردىڭ مايشامىندا دۇنيەگە كەلگەن بالانىڭ، 19-دىڭ جارىعىندا سىزگە ايتار العىسى بار، قۇرمەتتى ەلباسى! الەمدىك ساياسات ول مايدان قىل سۋىرعانداي نازىك دۇنيە. قاتتى باسساڭ سىنىپ، كۇش سالساڭ مايىسىپ كەتەر ءقاۋىپتى ءىس. سول قاۋىپتەن حالىقتى امان الىپ شىققانىڭىزعا راقمەت!" - دەپ نۇرسۇلتان ءابىشۇلىنا العىسىن ءبىلدىردى.

ماقسات ەسىمدى الەۋمەتتىك جەلى قولدانۋشىسى اكەم كەتكەندەي كۇي كەشىپ وتىرمىن دەيدى. 

"نە بولدى ەكەن بۇنداي شەشىم قابىلداۋعا؟ مەن اكەم كەتكەندەي كۇي كەشىپ وتىرمىن. بۇل كىسى وتىرعاندا ءبىر كۇشتى سەزىنۋشى ەدىم. ەلدىڭ تىنىشتىعىن ۇستاعانىنىڭ ءوزى ۇلكەن ەرلىك دەپ بىلەمىن. مەن بۇل كىسىنى كوپ ەڭبەك سىڭىرە ءبىلدى دەپ باعالايمىن. ەندى نە بولاتىنى بەلگىسىز. ەل ءۇشىن، جەر ءۇشىن، ۇرپاق ءۇشىن قورقامىن. نە بولسادا جاقسىلىق بولعاي" - دەپ نازاربايەۆقا العىسىن ايتا وتىرىپ ويىن قورتىندىلادى ماقسات. 

ۇسىنعان: فاريزا جومارت قىزى