ەس جيعالى كورگەنىم، بىلگەنىم، داۋىس بەرگەنىم – ءبىر-اق پرەزيدەنت. ول 1991 جىلدان باستاپ ەل باسقارىپ كەلەدى، مەن 1994 جىلى دۇنيە ەسىگىن اشتىم. 2015 جىلعى پرەزيدەنت سايلاۋىندا ۋنيۆەرسيتەت قابىرعاسىندا وقىپ ءجۇرىپ، «مەنىڭ پرەزيدەنتىم – نۇرسۇلتان نازاربايەۆ»، «نازاربايەۆسىز قازاقستان دەگەن مەملەكەت بولماس ەدى» دەگەن ۇرانمەن سول كىسىگە العاش رەت داۋىس بەردىم. داۋىس بەرەردە، «شىنىمەن نازاربايەۆتى بەلگىلەدىم بە؟» دەپ اق پاراققا قايتا-قايتا قاراپ، وزگە بىرەۋدى بەلگىلەپ قويسام، نازاربايەۆ جەڭىسكە جەتە الماي قالاتىنداي كۇي كەشىپ، قوبالجىعانىم، قولدارىمنىڭ دىرىلدەگەنى ءالى ەسىمدە. تەك سول كىسىگە سەندىم، قازاقستاندى تىعىرىقتاردان الىپ شىعاتىن جان دەپ ۇقتىم. دالىرەك ايتقاندا، شىنايى ومىرگە، ارپالىسقا ەندى قادام باسىپ كەلە جاتقان بويجەتكەنگە مۇنىڭ ءبارىن سەندىرگەن ءبىزدىڭ قوعام بولدى. ءبىزدىڭ مەكتەپ، ۋنيۆەرسيتەت، ءبىزدىڭ مۇعالىمدەر، اتا-انامىز ودان وزگە پرەزيدەنت ەلدى باسقارا المايتىنداي سەندىردى مەنى. نەمەسە ءوزىم اڭقاۋ بولدىم با؟!
مىنە، جاسىم شيرەك عاسىرعا تايادى. مەن ءبىر كەزدەرى «ەرەكشە قۇرمەتتەگەن» پرەزيدەنت وكىلەتتىلىگىن توقتاتتى. ونى كەشە كەشكىسىن جولدا كەتىپ بارا جاتىپ ەستىدىم. ۇستىمنەن بىرەۋ مۇز تولى سۋ توگىپ جىبەرگەندەي بولدى. كەشە تۇستە عانا «ەلباسى نۇرسۇلتان نازاربايەۆ، ق ر پرەزيدەنتى نۇرسۇلتان نازاربايەۆ» دەپ جارىسا جازىپ جاتقان ەدىك. ءبىر ساعاتتا ءبارى وزگەرىپ سالا بەردى. ول ميلليونداعان حالىقتىڭ كوزىنشە «وكىلەتتىلىگىن توقتاتۋ» تۋرالى قۇجاتقا قول قويدى. وعان ءبارىمىز كۋا. سەنەر-سەنبەسىمدى بىلمەدىم. كوز اشقالى تەك نازاربايەۆتى پرەزيدەنت دەپ تانىعان مەن وزگە ەل باسشىسىن شىنىمەن ەلەستەتە المادىم. ورنىنا سەنات ءتوراعاسى قاسىم-جومارت توقايەۆتى قالدىرىپ كەتىپتى. ول بولەك اڭگىمە...
19.03.19. بۇل قازاق ەلى ءۇشىن تاريحي داتا. 30 جىل ەل باسقارعان پرەزيدەنت مەرزىمىنەن بۇرىن وكىلەتتىلىگىن توقتاتقان كۇن. بۇل كۇندى قازاقتىڭ 60-70 پايىزى اسىعا كۇتتى. شىنىمدى ايتسام، نازاربايەۆتى «ەرەكشە سىيلاعان» مەن دە كۇتتىم. نەگە؟ ءيا، ۋنيۆەرسيتەت قابىرعاسىنا دەيىن اڭقاۋ بولىپ جۇرگەن بويجەتكەننىڭ ارپالىسقا تولى قوعامعا قادام باسقاندا كوزى اشىلدى. قوعامعا باسقا كوزقاراسپەن قارادىم، بيلىكتى تانىدىم. ساياساتقا دا كوز سالدىم. الايدا مارقۇم اتامنىڭ «نازاربايەۆ – ەرەكشە تۇلعا. وعان اللانىڭ نۇرى جاۋعان. مەملەكەت باسشىلارىن تاڭدايتىن اللا تاعالا. ال نازاربايەۆ قازاقتىڭ باسىنا بىتكەن ب ا ق» دەگەن سوزدەرى توسقاۋىل بولىپ ءجۇردى. سول سەبەپتى ەلباسىنى جاقسى كوردىم. ءيا، شىنىمەن جاقسى كوردىم. بۇعان اتام سەبەپ پە، الدە باسقا ما؟ جاۋابىن ءوزى دە بىلمەدىم...
كەشكە «ايدى اسپانعا شىعارعان» جاڭالىقتى ەستىدىم دە، ۇيگە كىردىم. «نازاربايەۆ ەندى پرەزيدەنت ەمەس. نە بولار ەكەن؟» ۇيىقتار الدىندا دا، تۇندە ويانىپ كەتسەم دە، وسى سۇراقتاردى ويلادىم. ەرتەڭ ءبىزدى نە كۇتىپ تۇر؟
وياتقىش ساعاتى شىر ەتتى. نازاربايەۆ كەتىپ، دالا دا، قالا دا، ادام دا، جالپى قوعام وزگەرىپ كەتتى مە ەكەن؟ تەرەزەنى اشتىم، كۇن جارقىراپ تۇر، ازىرگە ەش وزگەرىس جوق. تەلەديداردى قوستىم، سول باياعى باعدارلامالار، سەريالدار، ءبارى قاز قالپىندا. بۇل جەر دە تىنىش. «جۇمىسىما بارايىن، ونداعى اتموسفەرا وزگەشە شىعار» دەپ ويلادىم. اۆتوبۋسقا ءمىندىم، سول باياعى تاڭعى ۇيقىلارىن قيماي، جۇمىسقا ارەڭ بارا جاتقان جولاۋشىلار. نازاربايەۆتى ويلاپ نە قۋانىپ، نە مۇڭايىپ وتىرعان ءبىرىن كورمەدىم. ءبارىنىڭ قاباقتارىنان قار جاۋىپ تۇر. سالون ىشىنە ارەڭ سىيىپ، بىرەۋ «ءا» دەسە، ەكىنشىسى «ءما» دەۋگە دايىن تۇرعان جۇرتشىلىق. ءجا، اۆتوبۋس ءىشى دە وزگەرىسسىز. راديودا دا سول باياعى اۋەندەر. جۇمىسقا كەلدىم، ءبارى باز قالپىندا. پرەزيدەنتتىڭ ورىنتاعىن بوساتقانىن العاش كورگەن مەن دە وزگەرگەن جوقپىن. جالپى، پرەزيدەنتتەردىڭ اۋىسقانى قانداي بولادى؟ مۇنى ءالى سەزىنىپ جاتقان جوقپىن. مينيسترلەردىڭ اۋىسقانىن كورگەنىممەن، ءوز ەلىمنىڭ پرەزيدەنتىنىڭ اۋىسقانىن كورمەگەم. كوز الدىمدا ءالى دە سول ادام، پرەزيدەنتتىڭ تاعىندا وتىرعان دا نازاربايەۆ سەكىلدى. ال ءسىز قانداي سەزىمدەسىز؟
گۇلىم جاقان
