قازاقستاننىڭ ورتالىق سايلاۋ كوميسسياسى قاسىم-جومارت توقايەۆتىڭ وكىلەتتىگى تۋرالى مالىمدەمەنى جاريالادى، دەپ حابارلايدى Qamshy.kz اقپارات اگەنتتىگى وسك باسپا ءسوز قىزمەتىنە سىلتەمە جاساپ. 

2019 جىلعى 20 ناۋرىزدا 9.00-دە قازاقستان رەسپۋبليكاسى ورتالىق سايلاۋ كوميسسياسىنىڭ وتىرىسى بولدى، وندا ءۇش ماسەلە قارالدى:

1) قازاقستان رەسپۋبليكاسىنىڭ پرەزيدەنتى ن.ءا. نازاربايەۆتىڭ وكىلەتتىگىن مەرزىمىنەن بۇرىن توقتاتۋ تۋرالى؛

2) قازاقستان رەسپۋبليكاسى پارلامەنتى سەناتىنىڭ دەپۋتاتى ق.ك. توقايەۆتىڭ وكىلەتتىگىن توقتاتۋعا اكەلەتىن نەگىزدىڭ تۋىنداعانى تۋرالى؛

3) قازاقستان رەسپۋبليكاسىنىڭ پرەزيدەنتى وكىلەتتىگىنىڭ ق.ك. توقايەۆقا كوشكەنى تۋرالى.

"كونستيتۋسيانىڭ 42-بابىنىڭ 3-تارماعىنا سايكەس رەسپۋبليكا پرەزيدەنتىنىڭ وكىلەتتىگى جاڭادان سايلانعان رەسپۋبليكا پرەزيدەنتى قىزمەتىنە كىرىسكەن كەزدەن باستاپ، سونداي-اق پرەزيدەنت قىزمەتىنەن مەرزىمىنەن بۇرىن بوساتىلعان جاعدايدا توقتاتىلادى.

كونستيتۋسيالىق كەڭەستىڭ 2019 جىلعى 15 اقپانداعى № 1 قاۋلىسى بويىنشا قازاقستان رەسپۋبليكاسى پرەزيدەنتىنىڭ كونستيتۋسيالىق مارتەبەسىنەن ونىڭ ءوز ەركىن بىلدىرۋىنە سايكەس وكىلەتتىگىن توقتاتۋ قۇقىعى تۋىندايدى. ول مەملەكەت باسشىسىنىڭ وكىلەتتىگىن مەرزىمىنەن بۇرىن توقتاتۋعا دەربەس نەگىز بولىپ تابىلادى. ءتيىستى قاۋلى قابىلداندى.

كونستيتۋسيانىڭ 48-بابىنا سايكەس قازاقستان رەسپۋبليكاسىنىڭ پرەزيدەنتى قىزمەتىنەن مەرزىمىنەن بۇرىن بوساعان جاعدايدا ق ر پرەزيدەنتىنىڭ وكىلەتتىگى قالعان مەرزىمگە پارلامەنت سەناتىنىڭ ءتوراعاسىنا كوشەد"، - دەلىنەدى حابارلامادا.

وزىنە رەسپۋبليكا پرەزيدەنتىنىڭ وكىلەتتىگىن قابىلداعان تۇلعا تيىسىنشە سەنات ءتوراعاسىنىڭ وكىلەتتىگىن دوعارادى. تيىسىنشە، № 885 جارلىقتىڭ 2-تارماعىمەن پرەزيدەنتتىڭ وكىلەتتىگى قالعان مەرزىمگە سەنات ءتوراعاسى قاسىم-جومارت كەمەل ۇلى توقايەۆقا كوشەتىنى كوزدەلدى.

"وسىعان بايلانىستى كونستيتۋسيانىڭ 48-بابىنىڭ 1-تارماعىن جانە  «قازاقستان رەسپۋبليكاسىنىڭ پارلامەنتى جانە ونىڭ دەپۋتاتتارىنىڭ مارتەبەسى تۋرالى» كز نورمالارىن باسشىلىققا الا وتىرىپ، وسك سەنات دەپۋتاتىنىڭ وكىلەتتىگىن توقتاتۋعا اكەلەتىن نەگىزدىڭ تۋىنداعانى تۋرالى قاۋلى قابىلداپ، پارلامەنت سەناتىنا ءتيىستى ۇسىنىم ەنگىزدى"، - دەلىنەدى حابارلاما ماتىنىندە.

ق ر ورتالىق سايلاۋ كوميسسياسىنىڭ قاۋلىلارى قازاقستان رەسپۋبليكاسىنىڭ كونستيتۋسياسىنا، «قازاقستان رەسپۋبليكاسىنىڭ پرەزيدەنتى تۋرالى» قازاقستان رەسپۋبليكاسىنىڭ كونستيتۋسيالىق زاڭىنا سايكەس، «قازاقستان رەسپۋبليكاسى پرەزيدەنتىنىڭ وكىلەتتىگىن اتقارۋ تۋرالى» قپ پرەزيدەنتىنىڭ 2019 جىلعى 19 ناۋرىزداعى № 887 جارلىعى نەگىزىندە قابىلداندى.