ق ر ادىلەت ءمينيسترى مارات بەكەتايەۆ ەلوردا اتاۋىنىڭ وزگەرۋىنە بايلانىستى قۇجاتتاردى اۋىستىرۋ ماسەلەسىنە قاتىستى تۇسىنىك بەردى، دەپ حابارلايدى Qamshy.kz اقپارات اگەنتتىگى قازاقپارات سايتىنا سىلتەمە جاساپ.

«كۋالىك قۇجاتتار، مىسالى، تۋۋ تۋرالى كۋالىك، ديپلومدار، جۇرگىزۋشىلىك كۋالىكتەردى قازىردەن باستاپ شۇعىل اۋىستىرۋدىڭ قاجەتى جوق. بۇل قۇجاتتار ءتيىستى بەلگىلەنگەن مەرزىمى بويىنشا، ياعني اۋىستىرۋ ۋاقىتى جەتكەن كەزدە ءوزىنىڭ كەزەگىمەن اۋىستىرىلادى»، - دەدى مارات بەكەتايەۆ ق ر پارلامەنتى پالاتالارىنىڭ بىرلەسكەن وتىرىسىنان كەيىن.

"بۇل ءومىر، وزگەرىس اقىلعا قونىمدى مەرزىمدە جاسالادى. تاريحتا اتاۋى وزگەرگەن قالالار از ەمەس، ءبارى ءبىر ءتۇننىڭ ىشىندە اۋىسىپ كەتكەن جوق. اقىلعا قونىمدى ۋاقىت ىشىندە ءبارى اۋىستىرىلادى"، - دەدى ادىلەت ءمينيسترى.

بۇدان بۇرىن حابارلانعانداي، پارلامەنت ەلوردانىڭ اتاۋىن نۇرسۇلتان قالاسىنا وزگەرتۋ تۋرالى قۇجاتتى قابىلدادى.

ۇسىنعان: ماقپال سەمباي