ايدوس سارىم الەۋمەتتىك جەلىدەگى Facebook پاراقشاسىندا كوپبالالى انالارمەن جۇمىس ىستەۋ تۋرالى پىكىرىمەن ءبولىستى. بۇل تۋرالى Qamshy.kz اقپارات اگەنتتىگى حابارلايدى.

وسى كۇندەرى كوپبالالى انالار مەن وتباسىلار ماسەلەسىمەن ءبىراز ەتەنە ارالاسىپ، زەرتتەۋگە تۋرا كەلدى.  كەشە كۇنى-بويى انالارمەن كەزدەسىپ، قۇجاتتارىن قابىلدادىم.  قابىلداۋعا كەلگەن ءجۇز انانىڭ قىرىقتان استامىمەن سويلەسىپ، بارىنشا كومەك بەرۋگە تىرىستىم.  شىنىن ايتايىن، بۇرىن دا از-ماز قايىرىمدىلىق، كومەك شارالارىن جاسادىق، قاتىستىق. ءبىراق كۇن سايىن بۇنداي جۇمىستى اتقارۋ ءۇشىن جۇرەك پەن نەرۆى قاجەت ەكەن. بۇل جۇمىسقا تەك ارنايى دايىندىعى، ىشكى تالابى، مۇراتى بار ادامدار قاتىسىپ، ارالاسپاسا، قالعانى بەكەرشىلىك بولادى ەكەن.  جىلدار بويى الەۋمەتتىك قورعاۋ قىزمەتكەرلەرىنىڭ دە جۇمىسى وڭاي ەمەس ەكەن. سان ءتۇرلى مىنەز، تەمپەرامەنت، پسيحولوگيا توعىسقان جەردە سالقىنقاندىلىق ساقتاۋ، داۋىس كوتەرمەۋ، ۇرسىسپاۋ دا قيىننىڭ-قيىنى سياقتى بولىپ كورىندى. بۇنداي جۇمىس كەز-كەلگەن ادامدى توزدىرىپ، تاسجۇرەك ەتە مە دەپ قالدىم. ەكىنىڭ ءبىرى دە: يا ءار ادامعا ءوز جۇرەگىڭ مەن جانىڭنىڭ بولىگىن بەرەسىڭ، يا تاستاي قاتقان روبوت بولاسىڭ دەگەن ءسوز.  سوندىقتان ءوز باسىم مەمورگاندار مەن انالاردىڭ اراسىندا دانەكەر بولاتىن، ۇلكەن جۇمىس پەن مىندەت جۇگىن جەڭىلدەتەتىن ۇيىمداردىڭ كوبەيگەنىن قالايمىن.  وزگەنى بىلمەيمىن، كەشە كەلگەننەن جۇمىسقا كىرىسىپ كەتتىك. تۇستەنەيىن دەسەڭ، كەزەكتەگى انالاردى قيمايسىڭ. ەكى-ۇش رەت تەمەكى شەگۋگە شىققانىڭدى قىلمىس ساناپ، قۋىستانادى ەكەنسىڭ.  قىسقاسى، ءبىر كۇندە 46 انامەن كەزدەسىپ، باعىت بەرىپ، زاڭدى ايتىپ، 39 ادامنىڭ قۇجاتىن قابىلداپ الدىم. بۇگىندە قورعا مىڭنان استام ادامنىڭ قۇجاتى مەن تالاپتارى ءتۇستى. العاشقى لەگىنە كومەك كورسەتىلىپ جاتىر. 

ايدوس سارىمنىڭ Facebook پاراقشاسىنان

ۇسىنعان: فاريزا جومارت قىزى