قازاقستاننىڭ باس پروكۋرورىنىڭ ورىنباسارى مارات احمەتجانوۆ اتىراۋ وبلىسىنىڭ ەكس-اكىمى بەرگەي رىسقالييەۆتىڭ لوندون كوشەلەرىمەن قىدىرىپ جۇرگەن ۆيدەوسىنا قاتىستى تۇسىنىكتەمە بەردى دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساي وتىرىپ.

بۇرىنعى اكىم رىسقالييەۆكە جەتى جىل بۇرىن ىزدەۋ جاريالانعان ەدى، وتكەن اپتادا ول ۆيدەوعا ءتۇسىپ قالعان. روليكتە رىسقالييەۆ لوندون كوشەلەرىندە جايباراقات سەرۋەندەپ ءجۇر.

باس پروكۋروردىڭ ورىنباسارى ايتقانداي، قاشقىن ەكس-شەنەۋنىكتىڭ ۆيدەوسىن قاداعالاۋ ورگانى كورگەن، رىسقالييەۆ ءقازىر حالىقارالىق ىزدەۋدە.

"وكىنىشكە وراي، ەلىمىزدە قىلمىس جاساعان ءبىرقاتار ازامات ءقازىر شەتەلدە ءجۇر. قۇقىقتىق كومەك كورسەتۋ – ونىڭ ىشىندە قىلمىسكەردى بەرۋ جانە ەكستراديسيالاۋ تۋرالى شارت جاساسپاعان ەلدەر بار"، - دەپ مالىمەت بەردى احمەتجانوۆ.

ونىڭ ايتۋىنشا، ەندى قاداعالاۋ ورگانى زاڭ بويىنشا ءتيىستى شارالار قولدانۋعا كوشەدى. ءتىپتى ەكس-اكىم سىرتتاي سوتتالۋى دا مۇمكىن.

بەرگەي رىسقالييەۆ 2006-2012 جىلدارى اتىراۋ وبلىسى باسشىسى قىزمەتىن اتقارعان. وسى ۋاقىت ارالىعىندا، تەرگەۋ مالىمەتى بويىنشا، بىرنەشە مارتە زاڭ بۇزىپتى. رىسقالييەۆكە قىلمىستىق كودەكستىڭ سەگىز بابى بويىنشا ايىپ تاعىلعان: اسا ءىرى كولەمدە مەملەكەت قاراجاتىن قىمقىرۋ، الاياقتىق، قىلمىستىق جولمەن تاپقان اقشانى زاڭداستىرۋ، قىلمىستىق ۇيىم قۇرىپ، باسقارۋ، قىزمەتتىك وكىلەتتىگىن اسىرا پايدالانۋ جانە تاعى باسقا.

كەي ب ا ق مالىمەتىنە سۇيەنسەك، بەرگەي رىسقالييەۆ ۇلىبريتانيادا ساياسي بوسقىن مارتەبەسىنە يە.

ەستەرىڭىزگە سالا كەتسەك، رىسقالييەۆ قىلمىستىق كودەكستىڭ سەگىز بابى بويىنشا قىلمىس جاسادى دەگەن كۇدىككە ىلىنگەن

ۇسىنعان: فاريزا جومارت قىزى