ساباقتاستىق – ەل دامۋىنىڭ ۇلگىسى
ەلىمىز ءوزىنىڭ دامۋىنىڭ جاڭا كەزەڭىندە تاۋەلسىزدىك جىلدارى قالىپتاسقان ساياسي تۇراقتىلىق، قۋاتتى ەكونوميكا مەن ساپالى الەۋمەتتىك جەتىلدىرىلۋلەر اياسىندا قارىشتاپ كەلەدى. تورتكۇل دۇنيەمەن ۇيلەسىمدە الەمدىك تانىمالدىلىققا قول جەتكىزدى. ءححى عاسىر – ادامزات قاۋىمى ءۇشىن جاڭارۋلار زامانى. بۇل ۇلى وزگەرىستەر ۇدەرىسى قازاقستان رەسپۋبليكاسىنىڭ دا دامۋ جولىن انىقتاۋدا.
تاۋەلسىزدىك جىلدارى ءجۇز جىلدا جۇزەگە اساتىن ىستەردى اتقارىپ، الەمدەگى ەڭ دامىعان ەلۋ ەل قاتارىنا قوسىلدىق. بۇل ورايدا ءبىلىم ساپاسىنىڭ وكىلى رەتىندە مەملەكەتىمىزدىڭ ادام كاپيتالىن دايىنداۋ ساپاسىن ارتتىرۋ جولىنداعى ساياساتى بويىنشا ۇلتتىق مازمۇندا تاربيە بەرىپ، الەمدىك ءبىلىم كەڭىستىگى مازمۇنىمەن ۇندەسۋدى جۇزەگە اسىرىپ جاتقانىن ۇلى ءىس دەپ بىلەمىن. ناقتىراق ايتسام، «بولاشاق» باعدارلاماسى، نازاربايەۆ ۋنيۆەرسيتەتى، نازاربايەۆ زياتكەرلىك مەكتەپتەرىنە باعدارلانۋ جۇزەگە اسۋدا. وسى جىلدا جۇزدەگەن جاڭا مەكتەپتەر مەن بالا باقشالار بوي كوتەردى. مۇعالىمدەردىڭ بىلىكتىلىك ساپاسى ارتتىرىلا ءتۇستى ت.س.س.
ەلباسى نۇرسۇلتان ءابىش ۇلى نازاربايەۆ 19 ناۋرىزداعى قازاقستان حالقىنا ۇندەۋىندە: «ءاربىر ۇرپاقتىڭ اتقاراتىن ءوز مىندەتتەرى بار. مەن جانە مەنىڭ زامانداستارىم ەلىمىز ءۇشىن قولدان كەلگەننىڭ ءبارىن جاسادىق. الەم وزگەرىپ، جاڭا بۋىن كەلەدى. بۇل – تابيعي پروسەسس. ولار ءوز زامانىنىڭ پروبلەمالارىن شەشەتىن بولادى. سونداي-اق ەلىمىزدى ودان ءارى وركەندەتۋ ءۇشىن بار كۇش-جىگەرىن جۇمىلدىرۋعا ءتيىس،» - دەپ، كونستيتۋسيالىق نەگىزدە قازاقستان رەسپۋبليكاسىنىڭ پرەزيدەنتى وكىلەتتىگىن توقتاتۋ تۋرالى شەشىمىن جاريالادى.
قازاقستاندىقتار جانە الەم قاۋىمداستىعى بۇل شەشىمدى، ەڭ الدىمەن، مەملەكەتتىڭ كەلەشەگىنە، ساياسي تۇراقتىلىققا جانە بۇدان ءارى قارايعى قازاقستاننىڭ دامۋىنا باعىتتالعان كەمەڭگەرلىك كادام دەپ قولداپ قابىلدادى.
قازاقستانداعى بيلىك ساباقتاستىعى كونستيتۋسيالىق تۇرعىدان رەتتەلگەن. پرەزيدەنتتىڭ وكىلەتتىگى مەرزىمىنەن بۇرىن توقتاتىلعان جاعدايعا بايلانىستى ونىڭ وكىلەتتىگى قالعان مەرزىمىنە سەنات ءتوراعاسىنا بەرىلدى. وسى نەگىزدە قازاقستان رەسپۋبليكاسىنىڭ پرەزيدەنتى قاسىمجومارت كەمەل ۇلى توقايەۆ 9 ساۋىردە قازاقستان حالقىنا ق ر پرەزيدەنتى وكىلەتتىگى بويىنشا كەزەكتەن تىس قازاقستان رەسپۋبليكاسى پرەزيدەنتىن سايلاۋ مەرزىمىنىڭ 2019 جىلدىڭ 9 ماۋسىمىنا بەلگىلەنگەنى تۋرالى تاريحي ۇندەۋ جاريالادى.
جاڭا ۇندەۋدە قازاقستان رەسپۋبليكاسىنىڭ پرەزيدەنتىن سايلاۋدى كەزەكتەن تىس وتكىزۋ شەشىمىنىڭ ساياسي-ەكونوميكالىق جانە الەۋمەتتىك نەگىزدەرى جانە وزەكتىلىگى جان-جاقتى كورسەتىلدى. ق ر پرەزيدەنتى سونىمەن قاتار ق ر پرەزيدەنتىن كەزەكتەن تىس سايلاۋ مەيىلىنشە اشىق، ءادىل جانە دەموكراتيالىق سيپاتتا وتەتىنىنە سەنىم ءبىلدىرىپ، قازاقستاندىقتاردى جاڭا سايلاۋعا بەلسەندى قاتىسۋعا شاقىردى.
بىزدەر مۇعالىمدەر قاۋىمى، مەملەكەتىمىزدىڭ ءبىلىم ساياساتىن جۇزەگە اسىرۋشىلار رەتىندە، ەلباسى ن.ءا.نازاربايەۆ باستاماشىلىعىمەن بەلگىلەنگەن باعدارلامالاردىڭ ودان ءارى ساپالى جۇزەگە اسۋىندا بۇل كەزەكتەن تىس سايلاۋ ناتيجەلەرى اسا ماڭىزدى دەپ بىلەمىز. ەلىمىزدىڭ دامۋ جولى «قازاقستان – 2050» ستراتەگياسىندا ت.ب. باعدارلامالاردا ايقىن بەلگىلەنگەن. ءبىزدىڭ مىندەتىمىز – ەلباسى سالىپ بەرگەن سارا جولمەن ۇسىنعان يدەيالارىن جۇزەگە اسىرۋعا ايانباي اتسالىسۋ. جاڭا سايلاۋ وسى ىزگى نيەتىمىزگە جەتۋدە يگى ىقپال ەتەدى دەپ ويلايمىن.
تاۋەلسىز قازاقستاننىڭ جارقىن كەلەشەگى ءۇشىن، ەلباسىنىڭ ستراتەگيالىق باعدارلامالارىنىڭ سالتانات قۇرۋ ءۇشىن، دامۋداعى ساباقتاستىق ءۇشىن ق ر پرەزيدەنتىن سايلاۋعا ءبىر كىسىدەي قاتىسۋعا شاقىرامىن.
اياگۇل تورە قىزى ميرازوۆا
قازاقستاننىڭ ەڭبەك ەرى،
«التىن جۇلدىز»، «وتان» وردەندەرىنىڭ يەگەرى
قازاقستانعا ەڭبەگى سىڭگەن قىزمەتكەر،
الماتى قالاسىنىڭ،
جامبىل وبلىسىنىڭ،
جۋالى اۋدانىنىڭ
قۇرمەتتى ازاماتى
پىكىر قالدىرۋ