قازاقستاندا كەزەكتەن تىس پرەزيدەنت سايلاۋىنىڭ ۋاقىتى جاريالانعالى بەرى بولجامدار، پىكىرلەر، ايتىس-تارتىستار تولاستاماي تۇر. بۇلاردىڭ بارلىعى العاشقى ۇمىتكەرلەر بەلگىلى بولعان كۇننەن باستاپ سايابىر تاپپاق.
"بايتاق بولاشاق" ەكولوگيالىق اليانسى" رەسپۋبليكالىق قوعامدىق بىرلەستىگىنىڭ قۇرىلتايشىلارى ءبىراۋىزدان پرەزيدەنتتىككە كانديدات رەتىندە ازاماتحان ءامىرتايدى ۇسىندى.
بۇل تۋرالى ازاماتحان ءامىرتاي ءوزىنىڭ الەۋمەتتىك جەلىدەگى پاراقشاسىندا جاريالادى.
"قۇرمەتتى دوستار، "بايتاق بولاشاق" ەكولوگيالىق اليانسى" رەسپۋبليكالىق قوعامدىق بىرلەستىگىنىڭ قۇرىلتايشىلارى مەنى قازاقستان رەسپۋبليكاسىنىڭ پرەزيدەنتىنە ۇمىتكەر رەتىندە ۇسىنعان سوڭ جان-جاقتان تولاسسىز قولداۋلار كەلىپ جاتىر. اسىرەسە كاسىپكەرلىك قاۋىمداستىقتارى، تاۋەلسىز جۋرناليستەر، ەكولوگيا جاناشىرلارى، ۇلتشىل ءارى پاتريوت اعايىندار جانە ەلىمىزدىڭ تانىمال تۇلعالارى ءوز قولداۋلارىن ءبىلدىرىپ جاتىر. مەن ءۇشىن بۇل كورسەتىلگەن سەنىم وتە ماڭىزدى!!! كوپ راقمەت سىزدەرگە!" - دەپ جازدى ول.
ءوزىن قۇپ كورگەن ازاماتتارعا العىسىن جاۋدىرعان ازاماتتىڭ الداعى ۋاقىتتا قانداي باعدارلاما دايىنداپ، قانداي ماسەلەلەردى كوتەرىپ، ناۋقاندا قالاي جۇمىس جاسايتىنىن ۋاقىت كورسەتەر.
ءبىراق ەل كوكەيىندە تۇيتكىل بولىپ تۇرعان ءبىر ماسەلە بار. الەۋمەتتىك جەلىدەگى جازبا 13-ساۋىردە جاريالانعان. سودان 4 كۇن بۇرىن، ياعني، 9-ساۋىردە ازاماتحان ءامىرتاي "Atameken Business" ارناسىنا بەرگەن سۇحباتىندا تومەندەگىدەي وي ايتادى:
"ەكولوگ رەتىندە ءوز پىكىرىمدى ايتسام، پرەزيدەنت قاسىم-جومارت توقايەۆ "كوك جايلاۋ" ماسەلەسىن توقتاتىپ، دۇرىس شەشىم قابىلدادى. بۇل ەكولوگتاردىڭ دا ساياسي الاڭعا شىعىپ جاتقانىن كورسەتەدى. ەكولوگ رەتىندە ءبىز پرەزيدەنتتىككە لايىقتى كانديدات رەتىندە قاسىم-جومارت توقايەۆتىڭ ءوزىن كورىپ وتىرمىز".
بۇل نەنىڭ كورىنىسى؟ بىرنەشە "كانديدات" قاتىسقان "بالاماسىز" سايلاۋدىڭ انونسى بولار، بالكىم؟!
الەۋمەتتىك جەلىدەگى ماتەريالدار مەن جازبالاردىڭ اۋجايىنا قاراپ، ازاماتحان ءامىرتاي، اسحات اسىلبەكوۆ سىندى ازاماتتاردىڭ نيەتتەنە باستاعانىن اڭعارۋعا بولادى.
قالاي بولعان كۇندە دە، ناقتى اقپارات ورتالىق سايلاۋ كوميتەتى جاريالاعان اقپارات بولادى. وعان دەيىن توي ءدۇبىرى قىزعان ۇستىنە قىزا بەرەدى، قىزا بەرەدى...