تەمىرجول اۋماعىن تازالاۋعا شىققان وقۋشىلار شەتتە تۇرعان جۇك ۆاگونىنىڭ ۇستىنە شىقپاقشى بولادى. ءبىرىنشى بولىپ شىققان بالا توققا ءتۇسىپ قازا تاپتى دەپ حابارلايدى Qamshy.kz اقپارات اگەنتتىگى Sputnik قازاقستاننىڭ دەرەگىنە سۇيەنىپ.
اقمولا وبلىسى اتباسار اۋدانىندا ءۇش وقۋشى توقتاپ تۇرعان ۆاگوننىڭ ۇستىنە شىعىپ العان. ولاردىڭ ءبىرى توققا ءتۇسىپ كوز جۇمدى، تاعى بىرەۋى اۋرۋحاناعا جەتكىزىلدى.
سەنبىلىك كەزىندە بولعان قايعىلى جايت تۋرالى قازا بولعان بالانىڭ اپكەسى ايتىپ بەردى.
"مەنىڭ باۋىرىم مەن يرچەنكو ستانسياسى اۋماعىندا بولعان وقۋشىلار قازاق ورتا مەكتەبىندە وقيدى. مەن دە سول مەكتەپتە وقىعام، كەزىندە تەمىرجول اۋماعىنا سەنبىلىككە شىعاتىنمىن. ءبىراق سول كۇنى قايعىلى وقيعا ورىن الدى. ول ۆاگونداردىڭ تۇرعانىنا ءبىر اپتا بولعان سەكىلدى. بالالار كىم تەز مىنەدى دەپ باستەسىپ، وعان جارىسا شىققان سياقتى"، - دەيدى قىز.
ەڭ ءبىرىنشى بوپ ۆاگونعا قىزدىڭ 14 جاستاعى ءىنىسى مىنگەن. بالالاردىڭ ايتۋىنشا، ونى بىردەن توق سوعىپ، سول مەزەتتە جان ءتاسىلىم ەتىپتى.
"بالالاردىڭ ايتۋىنشا، ونىڭ قولى سىم تەمىرگە تيمەگەن. قولىن كوتەرگەندە اۋاداعى جوعارى ۆولتتى توق سوعىپتى. ەكىنشى بالا جاراقاتتانعان، ال ءۇشىنشىسى سەكىرىپ ءتۇسىپ ۇلگەرگەن"، - دەيدى قىز.
ال سىنىپتاسىنىڭ ولىمىنە كۋا بولعان باسقا وقۋشىلار بولسا، ءالى ەستەرىن جيا الار ەمەس.
قايتىس بولعان بالانىڭ اپكەسىنىڭ سوزىنە سۇيەنسەك، ول ارادا تۇرعان ۆاگوندار استانالىق "استىق ترانس" جشس-عا تيەسىلى كورىنەدى.
"ەگەر ۆاگوندار ەلدى مەكەندى اۋماقتا، وندا دا مەكتەپكە قاراما-قارسى تۇرسا، ولار توقتان اجىراتىلۋى كەرەك بولاتىن. كىم جاۋاپتى بۇل قازاعا؟ كىنالىلەر جازاسىن السىن "، - دەيدى مارقۇم بالانىڭ تۋىستارى.
اتباسار اۋدانىنى اكىمدىگىنىڭ قىزمەتكەرلەرى بۇل فاكتىگە قاتىستى تەرگەۋ باستالعانىن جەتكىزدى.
"يرچەنكو ستانسياسى ۋاقىتشا تۇراق، ول ءبىزدىڭ قاراماعىمىزدا ەمەس. ۆاگون ۇستىندە جوعارى ۆولتتى توق نەگە بولعان، كۇزەت، جول جوندەيتىندەر قايدا قاراعان، بالالار ەمىن-ەركىن ول ۆاگونداردىڭ ۇستىنە نەگە شىعىپ كەتكەن؟ بۇل ساۋالداردى "قازاقستان تەمىر جولى" نەمەسە ىشكى ىستەر باسقارماسىنا جولداعاندارىڭىز ءجون بولار. ءقازىر بۇل جايتقا قاتىستى قىلمىستىق ءىس قوزعالىپ، تەرگەۋ باستالىپ كەتكەن. كىنالىلەر ءوز جازاسىن الادى دەپ ويلايمىن"، - دەدى اتباسار اۋدانىنىڭ اكىمى امانبەك قالجانوۆ.
ءبىراق ول ءىستىڭ قانداي باپ بويىنشا قوزعالعانىن ناقتىلاي المادى.
كولىك پوليسياسى دەپارتامەنتىنىڭ باسپا ءسوز قىزمەتى حابارلاعانداي، بۇل فاكتىگە قاتىستى 344-باپتىڭ 2-تارماعى، ياعني "ابايسىزدا ادام ولىمىنە اكەلىپ سوققان تەمىرجول قوزعالىسى قاۋىپسىزدىگىنىڭ ءتارتىبى جانە ونى جۇرگىزۋ ەرەجەلەرىن بۇزۋ" بويىنشا سوتقا دەيىنگى تەرگەۋ ءىسى قولعا الىنعان. ق ر قىلمىستىق كودەكستىڭ 201-بابىنداعى تالاپتارعا سايكەس، تەرگەۋدىڭ ءمان-جايىن جاريالاۋعا بولمايدى.
ال "قازاقستان تەمىر جولى" كومپانياسى ازىرگە جاۋاپ بەرگەن جوق.
ۇسىنعان: نازەركە لابيحان
پىكىر قالدىرۋ