قىزىلوردا قالاسىندا پوليسەيگە 2000 تەڭگە سىياقى بەرگەنى ءۇشىن اۆتوكولىك جۇرگىزۋشىسىنە 200 اەك (ەسكەرتپە: 1 ايلىق ەسەپتىك كورسەتكىش - 2525 تەڭگە) كولەمىندە ايىپپۇل سالىندى.

كەنتاۋ قالاسىنىڭ تۇرعىنى ە.ك. ەسىمدى ازامات جول قاۋىپسىزدىگى ەرەجەلەرىن بۇزعانى ءۇشىن اكىمشىلىك قۇقىق بۇزۋشىلىق حاتتاماسىن تولتىرتپاۋ ماقساتىندا قىزىلوردا قالالىق جول پوليسيا قىزمەتكەرلەرىنە 2000 تەڭگە سىياقى بەرگەن. ءتارتىپ ساقشىلارى زاڭسىز سىياقى جونىندە قۇزىرلى ورگاندارعا حابارلاعان.

ءوز كەزەگىندە، مەملەكەتتىك فۋنكسيالاردى ورىنداۋعا ۋاكىلەتتىك بەرىلگەن تۇلعاعا زاڭسىز ماتەريالدىق سىياقى بەرگەنى ازامات ە.ك-عا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قىزىلوردا وبلىسى بويىنشا دەپارتامەنتىمەن ق ر اكىمشىلىك قۇقىق بۇزۋشىلىق تۋرالى كودەكسىنىڭ 676-بابىمەن حاتتاما راسىمدەلىپ، سوتقا جولدانعان.

دەپارتامەنتتىڭ باس مامانى مۇرات ىسقاقوۆ «ە.ك. ەسىمدى ازامات، الدىڭعى ەكى قاپتالداعى تەرەزەلەرى قاراڭعىلانعان اۆتوكولىكتى باسقارعانى سەبەپتى توقتاتىلىپ، جول پوليسيا قىزمەتكەرلەرىنە اكىمشىلىك حاتتامانى تولتىرماۋ ءۇشىن 2000 تەڭگە زاڭسىز سىياقى بەرگەن. بۇگىنگى تاڭدا، ازامات ە.ك-عا سوت قاۋلىسىمەن ەكى ءجۇز ايلىق ەسەپتiك كورسەتكiش مولشەرiندە ايىپپۇل سالىندى. مۇنداي اكىمشىلىك ءىس قىزىلوردا وبلىسىندا العاش رەت قارالىپ وتىر. پارا نەمەسە زاڭسىز سىياقى الۋشىمەن قاتار، ونى بەرۋشى دە قاتاڭ جاۋاپكەرشىلىككە تارتىلادى. بۇل باعىتتاعى پروفيلاكتيكالىق جۇمىستار قارقىندى جۇرگىزىلۋدە، الداعى ۋاقىتتا دا جالعاسىن تابادى»، - دەدى.

ق ر اكىمشىلىك قۇقىق بۇزۋشىلىق تۋرالى كودەكسىنە سايكەس، مەملەكەتتiك فۋنكسيالاردى ورىنداۋعا ۋاكiلەتتiك بەرىلگەن تۇلعانىڭ نەمەسە وعان تەڭەستiرiلگەن تۇلعانىڭ 2 اەك (5050 تەڭگە) دەيىنگى كولەمدە زاڭسىز ماتەريالدىق سىياقى، سىيلىقتار، جەڭiلدiكتەر نە قىزمەتتەر الۋى - 600 اەك (1515000 تەڭگە) دەيىنگى مولشەردە، ال، ولارعا 2 اەك دەيىنگى كولەمدە زاڭسىز ماتەريالدىق سىياقى، سىيلىقتار، جەڭiلدiكتەر بەرۋ نە قىزمەتتەر كورسەتۋ - جەكە تۇلعالارعا 200 اەك (505000 تەڭگە)، زاڭدى تۇلعالارعا 750 اەك (1893750 تەڭگە) مولشەرىندە ايىپپۇل سالۋ كوزدەلگەن.

ەگەر، سىياقى كولەمى 2 اەك ارتىق بولاتىن بولسا، وندا ول پارا رەتىندە باعالانادى جانە ول ءۇشىن قىلمىستىق جاۋاپتىلىققا تارتىلادى.