قازاقستان رەسپۋبليكاسىنىڭ ەكىنشى پرەزيدەنتى قاسىم-جومارت توقايەۆ تۆيتتەر، ينستاگرام سەكىلدى ءىرى الەۋمەتتىك جەلىلەردە تىركەلگەن. مەملەكەت باسشىسىنىڭ اككاۋنتىنا ۇقساس اككاۋنت اشىپ، سول ارقىلى جارنامادان تابىس تاۋىپ جۇرگەن "جۇمىرتقادان ءجۇن قىرقاتىن" الاياقتار دا بار ەكەن.
بۇل تۋرالى ق ر پرەزيدەنتىنىڭ باسپا ءسوز حاتشىسى بەرىك ءۋالي ءوزىنىڭ فەيسبۋك پاراقشاسىندا جاريالادى.
"سوڭعى كەزدەرى ءارتۇرلى الەۋمەتتىك جەلىلەردە مەملەكەت باسشىنىڭ اتىنان اشىلعان فەيك اككاۋنتتار كوبەيىپ كەتتى. سول ارقىلى جالعان اقپارات تاراتىپ جاتقاندار دا بار، كەيبىرى ونى كوممەرسيالىق ماقساتتا قولدانىپ جاتىر.
وسىعان بايلانىستى بارشا الەۋمەتتىك مەديا قولدانۋشىلار مەن ب ا ق وكىلدەرىنە ەسكەرتەرىمىز - قازاقستان پرەزيدەنتى قاسىم-جومارت توقايەۆتىڭ اتىنا رەسمي تىركەلگەن ەكى اككاۋنت قانا بار. ولار: Twitter جەلىسىندە 2011 جىلدان بەرى جۇمىس ىستەپ كەلە جاتقان - @TokayevKZ، سونداي-اق، 2019 جىلدىڭ ءساۋىر ايىندا Instagram جەلىسىندە اشىلعان @tokayev_online اككاۋنتى.
بارشا الەۋمەتتىك جەلى قولدانۋشىلاردى مەملەكەت باسشىسى تۋرالى ناقتى راستالعان اقپارات الۋ ءۇشىن جوعارىدا كورسەتىلگەن رەسمي اككاۋنتتارعا عانا جۇگىنۋگە شاقىرامىز"، - دەدى ول ءوز جازباسىندا.
وزگە ازاماتتىڭ اتىنان پاراقشا اشىپ، ونى جەكە مۇددەگە پايدالانۋدى زاڭ قۇپتامايتىنى انىق. قولدانۋشىلار مەملەكەت باسشىسىنىڭ باسپا ءسوز حاتشىسىنا پايدالى اقپارات جەتكىزگەنى ءۇشىن العىس بىلدىرۋدە.
