ق ر پرەزيدەنتىنىڭ اككاۋنتى جالعان بولىپ شىقتى دەپ جازادى Qamshy.kz اقپارات اگەنتتىگى. بۇل تۋرالى قازاقستان پرەزيدەنتىنىڭ باسپا ءسوز حاتشىسى بەرىك ءۋالي ءوزىنىڭ Facebook الەۋمەتتىك جەلىسىندەگى پاراقشاسىندا حابارلادى.
"سوڭعى كەزدەرى ءارتۇرلى الەۋمەتتىك جەلىلەردە مەملەكەت باسشىنىڭ اتىنان اشىلعان فەيك اككاۋنتتار كوبەيىپ كەتتى. سول ارقىلى جالعان اقپارات تاراتىپ جاتقاندار دا بار، كەيبىرى ونى كوممەرسيالىق ماقساتتا قولدانىپ جاتىر.
وسىعان بايلانىستى بارشا الەۋمەتتىك مەديا قولدانۋشىلار مەن ب ا ق وكىلدەرىنە ەسكەرتەرىمىز - قازاقستان پرەزيدەنتى قاسىم-جومارت توقايەۆتىڭ اتىنا رەسمي تىركەلگەن ەكى اككاۋنت قانا بار. ولار: Twitter جەلىسىندە 2011 جىلدان بەرى جۇمىس ىستەپ كەلە جاتقان - @TokayevKZ، سونداي-اق، 2019 جىلدىڭ ءساۋىر ايىندا Instagram جەلىسىندە اشىلعان @tokayev_online اككاۋنتى.
بارشا الەۋمەتتىك جەلى قولدانۋشىلاردى مەملەكەت باسشىسى تۋرالى ناقتى راستالعان اقپارات الۋ ءۇشىن جوعارىدا كورسەتىلگەن رەسمي اككاۋنتتارعا عانا جۇگىنۋگە شاقىرامىز"، - دەپ جازدى بەرىك ءۋالي ءوزىنىڭ فەيسبۋك پاراقشاسىندا.
