"دوس-مۇقاسان" توبىنىڭ ءانشىسى مۇرات قۇسايىنوۆ نۇر-سۇلتان اۋەجايىندا بولعان وقيعاعا قاتىستى تۇسىنىكتەمە بەردى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

بۇعان دەيىن "ەير استانا" اۋە كومپانياسىنىڭ باسپا ءسوز قىزمەتى مۇرات قۇسايىنوۆتى اۋەجاي قىزمەتكەرىنە قول كوتەرىپ، دەنساۋلىعىنا زيان كەلتىردى دەپ ايىپتاعان ەدى.

الايدا ايگىلى "دوس-مۇقاسان" توبىنىڭ ءانشىسى مۇنىڭ ءبارىن جوققا شىعارىپ وتىر.

"مۇنىڭ ءبارى – ماعان جاسالعان قيانات. مەن "ەير استانامەن" ۇنەمى ۇشامىن، بۇرىن-سوڭدى مۇنداي جاعداي بولعان ەمەس. ءبارى جالا"، - دەدى قۇسايىنوۆ.

ونىڭ ايتۋىنشا، اۋەجاي قىزمەتكەرلەرى رەيس الدىندا انشىدەن اياق كيىمدى شەشۋدى تالاپ ەتكەن.

"اۋەجايدا كيىم شەشتىرەدى، تاعىسىن تاعى. قالاي تەكسەرەتىنىن بىلەسىزدەر عوي. مەن ءبارىن ورىندادىم. ءبىر كەزدە اياق كيىمدى شەش دەدى. مەن شەشپەيمىن دەدىم. ەشقانداي دا قىلمىسكەر ەمەسپىن، مەنى ەل تانيدى، اپتا سايىن ۇشامىز دەدىم. سكانەر بار عوي، سونىمەن تەكسەرىڭىزدەر دەدىم. ءبىراق ولار بولماي قويدى. سودان اشۋلانا باستادىم، سوزگە كەلىپ قالدىق. ءبىراق، قول جۇمساعان جوقپىن. بۇل وتىرىك"، - دەدى "دوس-مۇقاسان" توبىنىڭ ءسوليسى.

ايتۋىنشا، اۋەجاي قىزمەتكەرلەرى ونى رەيسكە جىبەرمەگەن، ءسويتىپ ءانشىنىڭ بيلەتى كۇيىپ كەتىپتى.

"ەير استانا"-مەن بۇرىننان ۇشامىن. بۇلار كەيىنگى كەزدەرى ادام سىيلامايتىن بولعان سياقتى. ەل بىلەدى، حالىق تانيدى دەپ تۇسىندىرمەك بولدىم، تىڭدامادى"، - دەيدى ءانشى.

"ەير استانا" اۋە كومپانياسىنىڭ باسپا ءسوز قىزمەتى 14 ساۋىردە "نۇر-سۇلتان – الماتى" باعىتىنا قاتىنايتىن كس 852 ۇشاعىنان تارتىپكە باعىنباعان جولاۋشى شىعارىلعانىن حابارلادى. ولاردىڭ مالىمەتىنشە، مۇرات قۇسايىنوۆ اۋە كومپانياسى قىزمەتكەرلەرىنىڭ كوزىنشە جولاۋشىلارعا قىزمەت كورسەتۋ ءبولىمى باسشىسىنىڭ ماڭدايىنا قاتتى سوققى جاساپ، ونىڭ دەنساۋلىعىنا زيان كەلتىرگەن.

وسىدان كەيىن اۋە كومپانياسى نۇر-سۇلتان قالاسى اۋەجايىنداعى پوليسيا بولىمىنە مۇرات قۇسايىنوۆتى جاۋاپقا تارتۋ جانە سوتقا دەيىنگى تەرگەۋ جۇرگىزۋ جونىندە ارىز تۇسىرگەن.