قىتايداعى قازاقستان ەلشىلىگى تۇرمەدە وتىرعان اقجارقىن تۇرلىبايعا قانداي كومەك كورسەتىپ جاتقاندارىن ايتتى، دەپ جازادى Qamshy.kz اقپارات اگەنتتىگى Sputnik قازاقستان سايتىنىڭ دەرەگىنە سۇيەنىپ.

قىتايداعى قازاقستان رەسپۋبليكاسى ەلشىلىگىنىڭ قىزمەتكەرلەرى اقجارقىن تۇرلىبايعا ءوز قالتاسىنان اقشا شىعارىپ كومەكتەسىپ جاتىر. 

بەيجىڭدەگى ق ر توتەنشە جانە وكىلەتتى ەلشىسى شاحرات نۇرىشيەۆ ەلشىلىك قىزمەتكەرلەرىنىڭ اقجارقىن تۇرلىبايمەن ۇنەمى بايلانىستا ەكەنىن ايتادى.

"مىسالى، كونسۋل بولات سىرلىبايەۆ ەكى اي سايىن قىزبەن جۇزدەسىپ، ءوز قالتاسىنان اقشا شىعارىپ، وعان قاجەتتىنىڭ ءبارىن الىپ بەرەدى. وقۋلىقتارىن ساتىپ الىپ بەردى وتكەندە، ويتكەنى ءقازىر اقجارقىن اعىلشىن ءتىلىن تەرەڭدەتىپ وقىپ جاتىر.

ودان بولەك كۇندەلىكتى تۇتىنىسىنا قاجەتتى ۇساق-تۇيەك زاتتارىن دا اپەرگەن. بىزدە مۇنداي شىعىندار بيۋدجەتتە قاراستىرىلماعان. سوندىقتان كەيدە وسىنداي جاعدايدا ىشىمىزدەن اقشا جيناپ، مۇنداي شىعىنداردى ءوزىمىز كوتەرىپ الامىز"، - دەيدى ول.

ەسىرتكى تاسىمالدادى دەپ ايىپتالعان قازاق قىزىنىڭ ءىسى ءالى تولىققاندى قارالىپ بىتكەن جوق. ەلشىلىكتەگىلەر قوسىمشا تەرگەۋ جۇمىستارى ءالى جۇرگىزىلىپ جاتقانىن ايتادى. تەرگەۋشىلەر ءقازىر اقجارقىندى قازاقستاننان شىعارىپ سالعان ادامداردى تەكسەرىپ جاتىر ەكەن. وسى فاكتىلەر ابدەن زەردەلەنگەن سوڭ عانا جۇڭگو سوتى شەشىم شىعارماق. 

اقجارقىن تۇرلىبايدىڭ تاعدىرى

قازاقستان ازاماتى اقجارقىن تۇرلىباي 2014 جىلى ناۋرىزدا گۋانچجوۋ اۋە-جايىندا ۇستالعان بولاتىن. وعان شەكارادان 4،5 كەلى ەسىرتكىنى الىپ وتپەك بولدى دەگەن ايىپ تاعىلدى. ال اقجارقىن ونى وزىنە بىلدىرتپەي بىرەۋلەر تىعىپ جىبەردى دەۋمەن كەلەدى.

جۇڭگو سوتى ونى ءومىر بويىنا باس بوستاندىعىنان ايىرعان بولاتىن. الايدا كەيىننەن سوت شەشىمى جويىلىپ، ءىستى قايتا قاراۋعا كەرى جىبەرگەن.

ۇسىنعان: نازەركە لابيحان