تۇركىستان وبلىسى، جەتىساي قالاسىندا ورىن العان وگەي شەشەنىڭ قاتىگەزدىك ماسەلەسى ەندى قۇدالار اراسىنداعى داۋعا ۇلاساتىن ءتۇرى بار. 
وسى وقيعا بويىنشا اقپارات تاراتقان ءتىلشى ءۇش قىزدىڭ ءبىر جىلدان استام ۋاقىت وگەي شەشەدەن تەپەرىش كورىپ جۇرگەنىن دىنمۇحامەد قويىمبەتوۆ وسىعان دەيىن دە قۇدالارعا ايتقانىن جازادى. دىنمۇحامەد قويىمبەتوۆ - ءۇش قىزدىڭ اكەسىنىڭ اعاسى، دەپ جازادى Qamshy.kz اقپارات اگەنتتىگى Ernur.kz پورتالىنا سىلتەمە جاساپ.

2019 جىلدىڭ 11 ساۋىرىندە ءاپالى-سىڭىلىلى ساليما، مانشۇك جانە ميلانا اۋرۋحاناعا تۇسكەن كۇنى قۇداسىنا قىزىنىڭ قىلىعىن ايتىپ، دىنمۇحامەد قوڭىراۋ شالعان. قىزىن الىپ كەتۋگە كەلگەن جۇلدىزدىڭ اكەسى جەكە سويلەسەمىز دەپ قىزىن شەتكەرىرەك شىعارادى. 

«شەتكەرىرەك بارىپ ەكەۋىنىڭ اڭگىمەسىنە قۇلاق تۇرسەم، اكەسى قىزىن ۇرىسىپ، ايىپتاۋدىڭ ورنىنا، «قىزىم، نەگە سونشا ۇردىڭ قىزداردى. ايتىپ ەدىم عوي، ۇرا بەرمە دەپ. ۇرساڭ دا كوگەرمەيتىن، ەشكىمگە كورسەتە المايتىن جەرلەرىنەن ۇرمايسىڭ با؟ ۇشەۋىن بىردەي اۋرۋحاناعا ءتۇسىردىڭ، نە بولدى ەندى؟ بىر-بىرەۋلەپ ۇرمادىڭ با سونشا ۇرعىڭ كەلىپ تۇرسا» دەگەنىن ەستىگەندە، ءوزىمدى ۇستاي الماي، ەكەۋىن دە ۇيدەن قۋىپ شىقتىم»، - دەيدى دىنمۇحامەد قويىمبەتوۆ.

وگەي شەشەنىڭ جاقىندارى تاعىلعان ايىپپەن كەلىسپەيدى

وسى وقيعاعا بايلانىستى ءمان- جايدى انىقتاۋ ماقساتىندا، ERNUR.KZ ءتىلشىسى ءقازىر ايىپ تاعىلىپ وتىرعان وگەي شەشە جۇلدىز كوبەيەۆانىڭ وتباسىمەن تىلدەسكەن. جەتىساي اۋدانىندا كامەلەتكە تولماعان ءاپالى-سىڭلىلى ءۇش قىزدى ۇرىپ-سوعىپ، ۇزاق ۋاقىتتان بەرى قيناپ كەلدى دەپ ايىپتالعان 

جۇلدىز كوبەيەۆانىڭ تۋىستارى وزدەرىنە تاعىلعان ايىپتارمەن تولىق كەلىسپەيتىنىن ايتادى.

سونىمەن قاتار، جۇلدىزدىڭ اكەسى پەرنەباي كوبەيەۆ ءۇش قىزدى ءوز قىزدارىنداي قابىلداعاندارىن، ولاردىڭ اپتا سايىن قىدىرىپ كەلەتىنىن العا تارتىپ: «اتا ءبىز ۇيگە بارماي-اق، وسىندا قالا سالايىقشى. ۇيگە جۇلدىز مامام كەلگەنشە ءبىز ديماش (دىنمۇحامبەت قويىمبەتوۆ) اعا مەن اجەمنىڭ ۇيىندە بولەك-بولەك جۇردىك. ءۇي شارۋاسىن ءبارىمىز بىرگە ەمەس تەك ءبىز عانا ىستەيمىز» دەگەن سابينانىڭ سوزىنەن سەكەم الىپ قالىپ ەدىم. ءبىراق، اقىر سوڭى مۇنداي بولادى دەپ ەش ويلامادىم»، - دەيدى. 

پەرنەباي كوبەيەۆ ءوز قىزىن اقتامايتىنىن دا جەتكىزدى 

«وسى وقيعا بايلانىستى قىزىم مۇلدەم كىناسىز دەپ اقتاپ وتىرعان جوقپىن. ونىڭ دا ايىبى بار. وقيعا بولعان كۇنى، ياعني، 11 ساۋىردە جۇلدىزدىڭ قىزدارعا ۇرىسقانى راس. ءبىراق، كەمپىراۋىزبەن قيناپ، تىرناق پەن ەتتىڭ اراسىنا ينە تىعىپ جاۋىزدىق تانىتپاعان. ۇيدەگى قۇرال-سايماندار وتباسىنا ورتاق دۇنيەلەر. نۇرماش ۇنەمى كوشەدە بولعان سوڭ ۇيدەگى ەر ازاماتتىڭ مايدا-شۇيدە جۇمىستارىن ايەل زاتى ىستەمەگەندە كىم ىستەيدى؟ ۇيدەگى كۇيگەن شامدى دا، ۇزىلگەن توقتى دا قىزىم ءوزى اۋىستىرىپ، سىنعان جيھازداردى دا ءوزى جوندەي بەرەتىن قىزىم. وسىنىڭ ءبارىن بىلەتىن قۇدالار ەندى بۇل دۇنيەلەردى باسقاشا ماقساتتا پايدالانىپ جاتىر»، - دەپ كۇيىنەدى ول. 

ءۇش قىز اۋرۋحاناعا تۇسكەن سوڭ، قۇدالارىمەن تىلدەسپەككە ۇمتىلعان پەرنەباي كوبەيەۆ وزىنە قۇداعيى ءاليانىڭ:«سەنىڭ قىزىڭا شىعارعان شىعىنىمدى، توي جاساۋعا كەتكەن اقشامدى سەن ءالى ماعان تولىق قايتاراتىن بولاسىڭ. بۇل ۇشەۋى مەن نەنى ايت دەسەم سونى ايتادى، نە ىستە دەسەم سونى ىستەيدى» دەپ سەس كورسەتكەنىن ايتادى. 

«مەيلى، ەگەر مەنىڭ قىزىم ولار ايتقان قاتىگەزدىكتىڭ ءبارىن جاساپ، دالەلىن تاۋىپ جاتسا ءتيىستى جازاسىن السىن. كىناسىز بولسا، ۇيدە ەكى جاسار بالاسى كۇتىپ ءجۇر، ءارى ءوزى ەكىنشىسىنە جۇكتى قىزدى بوسقا قيناماي بوساتسا»، - دەگەن جۇلدىزدىڭ اكەسى تىلشىلەردەن اقپاراتتى ءبىر جاقتى تاراتپاۋدى سۇرايدى. 

ۇسىنعان: نازەركە لابيحان