"تۋعان قىزىم مەنەن تەرىس اينالدى، سويلەسكىسى كەلمەيدى!" اقتوبەلىك كەلىنشەك 11 جاستاعى قىزىنىڭ بولاشاعى ءۇشىن قاتتى الاڭداۋلى. ايتۋىنشا، ونىڭ مىنەز-قۇلقى اكەسىنىڭ ۇيىنە بارعاننان كەيىن ادام تانىماستاي وزگەرىپ كەتكەن. ءتىپتى، انام ماعان قول كوتەرەدى دەپ جالعان سويلەدى، دەيدى. بۇل جايىندا Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ حابارلايدى.

اقمارال جولداسىمەن 2012 جىلى زاڭدى تۇردە اجىراسقان. 11، 13 جاستاعى قىزدارى مەن 8 جاستاعى ەگىز ۇلدارى سوتتىڭ شەشىمىمەن اناسىنىڭ تاربيەسىندە قالادى. ەرلى-زايىپتىلاردىڭ اراسىنداعى تۇسىنىسپەۋشىلىككە بالالاردىڭ ەش قاتىسى بولماعاننان كەيىن، ول بالالاردىڭ اكەلەرىمەن كەزدەسىپ تۇرۋىنا كەدەرگى بولماعان. ۇلدارى مەن قىزدارى مەرەكە، دەمالىس كۇندەرى اجەلەرىنە قىدىرىپ بارىپ، قونىپ قالىپ جۇرگەن. تەك ناۋرىزداعى مەرەكەدەن كەيىن اكەسىنە بارعان ەكىنشى قىزىنىڭ مىنەزى كۇرت وزگەرگەنىن بايقايدى. 

«بالا مەنەن قورقىپ، ءزابىر كورگەن قۇساپ قالدى. ۇلكەن قىزىما دا "سەنى الىپ كەتەدى، اكەم دوكۋمەنت دايىنداپ جاتىر" دەپ، شىڭعىرىپ، اكەسى ەسىكتى تەۋىپ، الىپ كەتتى. الىپ كەتكەننەن كەيىن مەنىڭ ۇستىمنەن ارىز جازىپ، "مامام مەنى قىلعىندىردى، سوتكامەن باسىمنان ۇردى" دەپ، مەدەكسپەرتيزادان سپراۆكا الىپ، 8ء-ى كۇنى اكىمشىلىك سوت بولدى»، - دەيدى وقۋشى قىزدىڭ اناسى اقمارال كەلبەتوۆا.

ال اقمارال قىزىن ۇرماق تۇگىلى، داۋىس كوتەرمەيتىنىن ايتادى. بالالارى دا بىر-بىرىنە قامقور، باۋىرمال . انالارىنا «ءسىز» دەپ سويلەۋ كەرەك دەپ ءتارتىپ ورناتقان دا وسى 11 جاستاعى قىزى ەكەن. اقمارال ونىڭ اياق استىنان «اكەمە كەتەم» دەپ شەشىم قابىلداۋىنا بىرەۋلەردىڭ ىقپالى بولدى دەپ كۇماندانادى. 
 
«ال مەن قالاي اليمەنت دۇرىس، ۋاقىتىلى تولەمەگەندىكتەن، ونىڭ قارىزى بولعاننان كەيىن ، قولدان جاساپ وتىرعاننان كەيىن، مينيمالنىي تولەيتىن بولعاسىن، ءوندىرىپ بەرۋىن سۇراعاننان كەيىن باستالدى، مۇنىڭ ءبارى. ۇيدەگى باۋىرلارى بار، ەگىز ىنىلەرى ءبارى ساعىنىپ ءجۇر»، - دەپ ايتتى اقمارال كەلبەتوۆا.

ءمان جايدى بىلمەك بولىپ بالالار اۋرۋحاناسىنا باردىق. نيەۆرولوگيا بولىمىندەگىلەر قىزدىڭ قانداي دياگنوزبەن جاتقانىن، نە ەم جاسالىپ جاتقانىن اشىپ ايتپادى. دارىگەرلىك قۇپيا دەپ وتىر.
 
"بەلگىلى ءبىر نيەۆرولوگيا بەلگىلەرىمەن ءتۇستى، جاعدايى جاقسى. تولىق تەكسەرۋلەرمەن ەم قابىلداپ جاتىر"، - دەپ مالىمدەدى وبلىستىق بالالار اۋرۋحاناسى نيەۆرولوگيا ءبولىمىنى مەڭگەرۋشىسى باعيلا جۇماشيەۆا.

اقمارالدىڭ ايتۋىنشا، بالالارىنىڭ اكەسى ءقازىر وتباسىن قۇرعان. ەكىنشى نەكەدە ورتاق ۇلدارى بار ەكەن. ەر ادامدى بۇرىنعى كەلىنشەگىنىڭ ۇستىنەن سوتقا شاعىمدانۋىنا نە تۇرتكى بولعانىن سۇراعانىمىزدا، «قىزىمنىڭ شەشىمى- وسىلاي، ول اناسىمەن تۇرعىسى كەلمەيدى» دەدى. ال اقمارالدىڭ تۋعان قىزىنا قول كوتەرگەنىن ول دا "ءوز كوزىممەن كورمەدىم" دەپ وتىر. 

قانات ابدۋل، وقۋشى قىزدىڭ اكەسى : «مەن كوزىممەن كورگەن جوقپىن. تۋعان شەشەسى قول كوتەردى بالاعا، جاعدايى جامان بولدى دەپ ايتا المايمىن."مەن مامامەن تۇرعىم كەلمەيدى"، دەدى، بالا بولعاسىن، ەندى انداي-مىنداي ۇساق-تۇيەك اڭگىمە ايتادى عوي، مەن ايتتىم، "بوتا، ونداي تەرمە اڭگىمە كەرەك ەمەس، ومىرلىك قادامىڭ، بۇل ساعان مازاق ەمەس، بۇگىن پاپامەن تۇرام، ەرتەڭ مامامەن تۇرام، دۇرىستاپ ويلان"»، - دەپ ايتتى قىزدىڭ اكەسى قانات ابدۋل.

كەلىنشەكتىڭ ماسەلەسىمەن تانىسقاننان كەيىن، قورعانشىلىق بولىمىندەگىلەر سوڭعى شەشىمدى سوت قابىلدايتىنىن ايتتى. وسى وقيعادان كەيىن قىزدىڭ اكەسى لەزدە قۇزىرلى ورىندارعا بالانىڭ تۇرعىلىقتى مەكەن-جايىن انىقتاۋ تۋرالى ارىزدانعان. 

«بالانىڭ تۇرعىلىقتى مەكەن-جايىن انىقتاۋمەن سوت اينالىسادى. اكەسى كەدەرگى جاسايتىن بولسا، بىزگە ارىز جازىپ كەتىڭىز، ءبىز بالانىڭ اناسىمەن كەزدەسىپ تۇرۋىنا شەشىم شىعارىپ بەرەمىز»، - دەپ ايتتى قالالىق ءبىلىم ءبولىمىنىڭ سەكتور مەڭگەرۋشىسى اعىپىس شاعىروۆا.

"بالاسىنا قول كوتەردى" دەپ اكىمشىلىك جاۋاپقا تارتىلعان اقمارالعا ايىپپۇل سالعان. الايدا، كەلىنشەك مۇنىمەن كەلىسپەيدى. مەدسينالىق ساراپتامانىڭ قورىتىندىسىنا دا كۇمانداناتىنىن ايتتى. "مەن قىزىما قول كوتەرگەن ەمەسپىن"، - دەيدى ول. 

اتا-اناسىنىڭ اراسىندا تاعدىرى تالاسقا تۇسكەن 11 جاستاعى وقۋشىنىڭ ماسەلەسى ەندى سوتتا شەشىلەتىن بولادى. ويتكەنى، قىزدىڭ اناسى بۇعان دەيىنگى سوتتىڭ شەشىمىمەن كەلىسپەي، اپپەلياسيالىق شاعىم تۇسىرگەن. 

ۇسىنعان: نازەركە لابيحان