پرەزيدەنتتىككە قاسىم-جومارت توقايەۆ كەلگەلى ءبىراز جەردە بيلبوردتار وزگەرتىلىپ،  مەملەكەت باسشىسىنىڭ قاناتتى سوزدەرى قالا كوشەلەرىنە ءىلىنىپ، پرەزيدەنتتى ناسيحاتتاۋ جاپ-جاقسى بەلەڭ الىپ كەلەدى.  ءبىراق  قاسىم-جومارت كەمەل ۇلى، ءبىر عانا اقتاۋ قالاسىندا ءوزىنىڭ 14 سۋرەتى ءىلىنىپ تۇرعانىن ەستىپ، «ماعان مۇنداي پروپوگاندا كەرەك ەمەس» دەگەندى قاداپ ايتتى. ءبىراق وعان قوياتىن بىزدەگى اتقامىنەرلەر مە؟! كەرسىنشە، «ايماققا پرەزيدەنت كەلەدى» دەپ جانتالاسىپ، جىرتىعىن جاماپ-جاسقاپ جاتقانداردىڭ قاراسى بارشىلىق.

الماتى وبلىسىنى قاراستى ۇشتوبە قالاسىندا دا ءدال ءقازىر وسىنداي قاربالاس بولىپ جاتىر. پرەزيدەنتتىڭ اكەسى كەمەل توقايەۆ ۇشتوبە قالاسى، قاراتال اۋىلىندا  دۇنيە كەلگەن.  الداعى ۋاقىتتا پرەزيدەنت اكەسىنىڭ باسىنا ءتاۋ ەتىپ، حالىقتىڭ جاي-كۇيىمەن تانىسۋى ابدەن مۇمكىن بولعاندىقتان، ۇشتوبە قالاسىنىڭ اكىمدىگى پرەزيدەنتتىڭ جولىن توسىپ، ەكى كوزى ءتورت بولىپ ءجۇر. قالا تۇرعىندارىنىڭ ايتۋىنشا، سوڭعى كەزدە وبلىس اكىمدىگىنەن لاۋازىمدى قىزمەتكەرلەر ۇشتوبەگە، قاراتالعا ءجيى كەلە باستاعان.  ۇشتوبەدەگى باستى كوشەلەردىڭ  شارباقتار جاڭارتىلىپ،  كوشە شامدارى ورناتىلعان. قالاداعى كەمەل توقايەۆ اتىنداعى مەكتەپتى كوكتەمنىڭ سۋىق كۇندەرىنە قاراماي سىرلاپ، بارىنشا ادەمىلەنىپ قويعان. كوشەنىڭ شارباقتارىن دا جەرگىلىكتى اكىمدىك وزدەرى بىردەي تۇسكە بوياپ، سىرلاپ بەرىپ جاتىر. ءتىپتى مۇعالىمدەر مەن جەرگىلىكتى اكىمدىك قىزمەتكەرلەرى كوشە بويىن دا وزدەرى تازالاپ، قورعانداردىڭ سىرتىنا دەيىن وزدەرى تازالاپ بەرىپ جاتقان كورىنەدى. ال كەشە ءتىپتى قالالىق اۋرۋحانىڭ دا ءىشى-سىرتى سىرلانىپ، رەتكە كەلتىرىلگەن.

ۇشتوبە قالاسىنىڭ تۇرعىنى سايا ەسەنبەكوۆانىڭ ايتۋىنشا، قالاداعى 145 ورىندىق اۋرۋحانانىڭ ءدالىزى مەن سىرتىن سىرلاپ تاستالعان. «اسىرەسە جانساقتاۋ ءبولىمىنىڭ ءدالىزىن سىرلاپ قويۋۋى اقىلعا سىيمايدى»،-دەيدى تۇرعىن.

«ۇششتوبە قالاسىندا ءقازىر قاربالاس. "پرەزيدەنت كەلەدى" دەپ ناۋرىزدان باستالعان جانتالاس ءالى جالعاسىن تاۋىپ جاتىر. مۇعالىمدەر اپتا سايىن سەنبىلىككە شىعادى. كەمەل توقايەۆ اتىنداعى مەكتەپتى كوكتەمنىڭ سۋىعىنا قاراماي سىرلاپ، وندا بالالاردىڭ دەمىكپەسى ۇستاپ، اللەرگيالارى قوزىپ جەدەل جاردەم شاقىرعان كەزدەر بولدى. ال ەندى اۋرۋحاناعا كەلسەك، قالالىق اۋرۋحانانى سىرلاپ تاستاعان. مۇندا ناۋقاستار جاتىپ ەم الادى. كۇندىزگى ستاسيونار دەگەن بار. قان قىسىمىم كوتەرىلىپ كەلىپ ەدىم، كەرسىنشە، بوياۋدىڭ يىسىنەن باسىم ودان ءارى اۋىرىپ قايتىپ بارامىن. وسى بىزدە نەگە پرەزيدەنت، اكىم كەلەدى دەسە جانتالاسادى؟! مىناداي يىستەن ناۋقاستار كەرىسىنشە، اۋرۋدىڭ ۇستىنە اۋرۋ جاماپ الادى ەمەس پە؟!» - دەيدى قالا تۇرعىنى سايا ەسەنبەكوۆا.

ماسەلەنىڭ ءمان-جايىن انىقتاۋ ءۇشىن ۇشتوبە قالالىق اۋرۋحاناسىنا تەلەفون شالدىق. بىزگە پىكىر بىلدىرگەن ۇشتوبە قالاسى اۋرۋحاناسىنىڭ باس دارىگەرىنىڭ ورىنباسارى ايدانا جانبايەۆانىڭ ايتۋىنشا، «بۇل پرەزيدەنت كەلەدى» دەپ جانتالاسۋ ەمەس. جىلدا ورىن الاتىن جاعداي» دەيدى مامان.

«قىستان شىققاننان كەيىن وسىلاي اۋرۋحانانى سىرلاپ تازالىق جۇمىسىن جۇرگىزىپ جاتقانىمىز راس. وسىلاي مامىر ايىنا دەيىن تازالىق جۇمىستارىن جۇرگىزەمىز. اۋرۋحانانىڭ ءدالىزى، سىرتى بويالدى. جانساقتاۋ ءبولىمى جاقتى دا سىرلاپ قويدىق. حالىققا قىزمەت كورسەتىلىپ جاتىر. مۇنى كوكتەمگى تازالىق جۇمىستارى دەپ ساناۋ كەرەك» دەدى اۋرۋحانا باسشىسىنىڭ ورىنباسارى ايدانا جانبايەۆا.

 دەسە دە، ءقازىر ۇشتوبەدە «بوياۋشى، بوياۋشى دەگەنشە ساقالىن بوياپتى» دەگەن ماقال «حيت»  بولىپ تۇر. بۇل رەتتە قالا تۇرعىندارى «اكىمدەر حالىقتىڭ جايىن ەمەس، وزدەرىنىڭ كرەسلولارىن ويلاپ جوعارىدان بىرەۋ كەلە جاتسا سونشا قاربالاسادى. سوندا ەشكىم كەلمەسە، بارلىعى توزعان قالپىندا تۇرا بەرە مە، پرەزيدەنت كەلەتىن كەزدە عانا جىرتىعىمىز جامالا ما؟! وندا مەملەكەت باسشىسى قازاقستانداعى ءاربىر اۋداندى، اۋىلدى جەكە ءوزى ارالاپ شىقسىن. سوندا بالكىم جاعدايىمىز تۇزەلەر» دەپ اشىنادى.

قارلىعاش زارىققان قىزى