ول سيرەك كەزدەسەتىن اۋرۋمەن دۇنيەگە كەلدى. ونىڭ قولى دا، اياعى دا جوق. سۋعا باتىپ ءوز-وزىن ولتىرمەكشى دە بولعان. سويتسە، سۋعا باتپاي قويىپتى. سودان ساباق الىپ، ومىرگە دەگەن قۇلشىنىسى ارتىپ، كوزقاراسىن وزگەرتىپتى.
ول-وراتور. ول-موتيۆاتور. ول-4 بالانىڭ اكەسى. ول-نيك ۆۋيچيچ. ونىڭ ءسىز بەن بىزگە ايتارى بار. وقىڭىز، كوڭىلىڭىزگە توقىڭىز. ومىرگە باسقاشا كوزقاراسپەن قارايىق! نيكتىڭ كوزىمەن... ءبىر ءسات.
ۆۋيچيچ ەشنارسەگە قاراماستان باقىتتى بولۋ ءۇشىن ۇزاق ىزدەندى. بۇگىندە ونىڭ جىگەرى، ەرلىگى ءدال ءوزى سەكىلدى جانە ون ەكى مۇشەسى ساۋ ادامدارعا دا ءۇمىت سىيلاپ، ومىرگە دەگەن قۇلشىنىسىن ارتتىرىپ ءجۇر.
نيك ءۆۋيچيچتىڭ «شەت-شەگى جوق ءومىر» اتتى كىتابىنان ادامدى جىگەرلەندىرىپ، ومىرگە دەگەن كوزقاراستى تيتتەي دە بولسا وزگەرتۋگە سەپتىگى تيەر بىرنەشە پىكىرلەرىن ۇسىنامىن. بۇل جىگىتتىڭ ايتارى بار.
- دوس كەرەك كەزدە ءوزىڭ دە دوس بول. ۇمىتكە مۇقتاج بولساڭ، وزگەگە ءۇمىت سىيلا.
- ەگەر ەسىكتى ەشكىم اشپاسا، بىردەن بىرنەشە ەسىكتى قاق.
- ءبارىمىز ءبىر-بىرىمىزدىڭ بويىمىزدان جاماندى دا، جاقسىنى دا تابا الامىز. ءبىراق مەن ءبىر ءتۇيىر التىن ىزدەگەندى قۇپ كورەمىن.
- ءوز ارەكەتتەرىڭىز ءوزىڭىزدى شابىتتاندىرىپ، قاناعاتتاندىراتىنداي ءومىر سۇرۋگە تىرىسىڭىز.
- ماقساتىمىز ورىندالىپ نەمەسە قانداي دا ءبىر زاتقا قول جەتكىزگەندە باقىتتى بولامىز دەپ كۇتۋمەن ءومىر ءسۇرۋ دۇرىس ەمەس. باقىت ۇنەمى جانىمىزدا جۇرگەندەي سەزىنۋىمىز كەرەك. ال وعان قول جەتكىزۋ ءۇشىن رۋحاني، پسيحولوگيالىق، ەموسيونالدى، فيزيكالىق ۇيلەسىمدىلىك قاجەت.
- كەيدە ساۋالىڭىزعا بىردەن جاۋاپ الۋ مۇمكىن ەمەستىگىن ءتۇسىنۋىڭىز كەرەك.
- ءسىز ءوز-وزىڭىزدى قابىلداۋعا دايىن ەمەس بولساڭىز، ەندەشە، وزگەنى دە قابىلداۋعا دايىن ەمەسسىز.
- الەمدە مەن كەزدەستىرمەگەن قيىندىق وتە كوپ. وزگە كوپتەگەن جانداردىڭ ومىرىنە قاراعاندا، ءومىرىم مىڭ ەسە جاقسى ەكەنىنە سەنىمدىمىن.
- كومەك سۇراۋعا بولاتىنىن جانە كەرەك ەكەنىن وتە ەرتە ۇقتىم. دەنەڭىز ساۋ ما، ەمەس پە، ءبارىبىر، ءبىراق جالعىز ءوزىڭىزدىڭ شاماڭىز كەلمەيتىن ىستەر بارشىلىق.
- ءومىرىڭىزدىڭ سوڭىنا كوز تاستاپ كورۋگە تىرىسىڭىز. سوسىن سول مەجەگە جەتكەندە ەش وكىنىش بولمايتىنداي ءومىر ءسۇرىڭىز.
- سەنىڭ قولىڭنان نە كەلەدى، نە كەلمەيدى، كىمسىڭ، كىم بولا الماي ءجۇرسىڭ، ول ماسەلە ماحابباتتى قىزىقتىرمايدى. شىن ماحاببات بىردەن جۇرەككە قارايدى!
- كەز كەلگەن قيىندىققا تاپ بولعاندا، ودان دا ءبىر شاتتىق تابۋعا تىرىس.
- الەمگە دەگەن قارىم-قاتىناستى قاشىقتىقتان باسقاراتىن قۇرىلعى دەپ ءبىلىڭىز. ەگەر كورىپ وتىرعان باعدارلاماڭىز ۇناماسا، باسقارۋ قۇرىلعىسىن الىپ، جاي عانا تەلەارنانى اۋىستىرا سالىڭىز. ومىرگە دەگەن قارىم-قاتىناستا دا سولاي. ناتيجەگە كوڭىلىڭىز تولماسا، قانداي قيىندىققا تاپ بولعانىڭىزعا قاراماستان، سول ماسەلەگە باسقا قىرمەن قاراپ كورىڭىز.
- ءوزىن جولى بولمايتىن بىرەۋ دەپ ويلايتىندار ول — قولىن ءبىر سىلتەپ، باس تارتقان كەزدە جەتىستىككە قانشالىقتى جاقىن بولعانىن تۇسىنبەگەن جاندار.
- جۇرەگىڭ جارالى بولسا، كەرەمەت سىرت كەلبەت تۇككە تۇرعىسىز.
- جاقسىلىق جاساۋ ءۇشىن عالامات جوبا قۇراستىرۋدىڭ قاجەتى جوق. وزگە جان ءۇشىن ءتىپتى تيتتەي ءىستىڭ ءوزى ماڭىزدى بولۋى مۇمكىن.
- ومىردەگى ەڭ كەرەمەت قۋانىشتىڭ ءبىرى – ءوز ءومىرىڭ مەن جەكە تاجىريبەڭنەن دە ارتىق ۇلكەن بىرنارسەنىڭ ءبىر بولىگى بولۋ.
- ال-دارمەنىڭ قالماعان كۇيزەلىس كەزىندە ءسىز كەزىككەن جاعداي مەن ىشىڭىزدە بولىپ جاتقان جاعدايدىڭ اراجىگىن اجىراتا ءبىلۋ ماڭىزدى.
- ءومىرىمىز جاقسى بولۋى مۇمكىن. ارينە، ەگەر ءوزىمىز سونى تاڭداساق.
- بۇرىن «نەگە مەن؟ نەگە مەن عانا وسىندايمىن؟» دەپ سۇرايتىنمىن. ءبىراق ءقازىر «نەگە؟ نەگە مەن ەمەسپىن؟» دەيمىن.
- تاعى ءبىر كۇن – تاعى ءبىر مۇمكىندىك!
اۋدارىپ، ۇسىنعان: ماقپال سەمباي
پىكىر قالدىرۋ