الەۋمەتتىك جەلىدە كونور ماكگرەگوردىڭ ءجۇرىسىن سالىپ، ءبىر كۇندە جۇلدىزعا اينالعان بالاقايدىڭ ەسىمى - تالانت ءالي باقىتجان ۇلى. 5 جاسار تالانتتىڭ تاەكۆوندومەن اينالىسقانىنا كوپ بولا قويعان جوق دەپ حابارلايدى Qamshy.kz اقپارات اگەنتتىگى.

«مەن قىزىلوردا قالاسىنىڭ تۇرعىنىمىن. جاسىم – بەستە. مەكتەپكە ءالى بارعان جوقپىن. سپورتپەن اينالىسقانىما جەتى اي بولدى. ۇيدەگى ءۇش بالانىڭ ۇلكەنىمىن. مەنەن كەيىن قارىنداسىم جانە ءىنىم بار. اكەم بولاشاقتا ولاردى دا سپورتقا باۋلىعىسى كەلەدى»، - دەيدى تالانت.

تالانتتىڭ تالانتىن شىڭداپ، وسى سپورت تۇرىنە كەلۋىنە سەبەپشى بولعان اكەسى ەكەن. ول: «تاەكۆوندودان بولەك ەرەجەسىز جەكپە-جەكپەن اينالىسىپ ءجۇرمىن. وعان دا اكەم ۇيرەتىپ، دايىنداپ جاتىر. سونىمەن قاتار بوس ۋاقىتىمدا شاحمات، فۋتبول ويناعاندى جاقسى كورەمىن»، - دەيدى.

سپورتقا كەلگەنىنە از ۋاقىت بولسا دا، جارىستان جەڭىسپەن ورالۋىنا جاعداي جاساپ جۇرگەن باپكەرلەرى دە جوق ەمەس. ولار – گۇلمىرزا ماجىكوۆ، اكەجان ەرتايەۆ جانە ەربول بەيسەنباي سىندى سپورت شەبەرلەرى.

«قازىرگى تاڭدا مەن اپتاسىنا ءۇش رەت، ەكى ساعاتتان دايىندالامىن. سپورتتى جاقسى كورگەندىكتەن  تاەكۆوندومەن اينالىسۋ ماعان اسا قيىندىق تۋدىرعان جوق»، - دەيدى تالانت ءالي.

"كونور ماكگرەگوردىڭ سەنىڭ بەينەجازباڭدى ءوزىنىڭ پاراقشاسىندا بولىسكەنىن العاش كىمنەن ەستىدىڭ، كورگەندە قانداي سەزىمدە بولدىڭ؟" دەگەن ساۋالىمىزعا: «مەن ول جاڭالىقتى اكەمنەن ەستىدىم، اكەمە اعايلارىم ايتقان ەكەن. جان-جاقتان تانىستارىمىز قوڭىراۋ شالىپ، قۇتتىقتاپ جاتتى. مەن ەرەكشە سەزىمدە بولدىم»، - دەپ  تالانت قۋانىشىن جاسىرمادى.

ونىڭ ارمانى – كونورمەن كەزدەسۋ. سۇيىكتى سپورتشىسىنىڭ ءار قيمىلىن باقىلاپ وتىراتىنىن دا جەتكىزدى.

«كونوردى كورگىم كەلەدى. جاڭا عانا مەنەن اكەم «كونور شاقىرسا، باراسىڭ با؟»، - دەپ سۇرادى. "مەن بارمايمىن، ءبىراق كونوردى ءوزىم قازاقستانعا شاقىرامىن" دەپ جاۋاپ قايتاردىم»، - دەيدى 5 جاسار تاەكۆوندوشى.

تالانت ءالي از ۋاقىت ىشىندە كوپتەگەن جارىسقا قاتىسىپ، جۇلدەلى ورىندارمەن قايتقان. ونىڭ قانجىعاسىندا حالىقارالىق، وبلىستىق، اۋداندىق جارىستاردىڭ 1-2 ورىن جۇلدەلەرى بار.

«العا قويعان ماقساتىم – سپورتتا بەلگىلى ءبىر ناتيجەگە جەتىپ، قازاقستاندى الەمگە تانىتقىم كەلەدى. ءقازىر سول ارمانىما جەتۋ ءۇشىن سپورتپەن بارىنشا اينالىسىپ، جاتتىعۋدان قالماي دايىندالىپ ءجۇرمىن»، - دەدى تالانت ءالي.

كونور ماكگرەگوردىڭ  Instagram پاراقشاسىندا جاريالانعان تالانت ءاليدىڭ بەينەجازباسىن 11 ميلليونعا جۋىق ادام تاماشالاعان. الەمگە تانىلىپ ۇلگەرگەن بەينەجازبا مۇساحان قالماحانوۆتى ەسكە الۋعا ارنالعان تاەكۆوندودان بالالار مەن جاسوسپىرىمدەر اراسىنداعى حالىقارالىق تۋرنيردە تۇسىرىلگەن ەكەن. تالانت ءالي بۇل تۋرنيردە 18 كەلى سالماق دارەجەسىندە ەكىنشى ورىن يەلەنگەن.

اڭگىمەلەسكەن: مارجان سابەت