جانار بايسەمىزوۆا بىرەر كۇن بۇرىن ينستاگرام جەلىسىندەگى پاراقشاسىندا ورازا امالىنىڭ قۇراندا جوق ەكەنىن جازىپ، كوپشىلىكتىڭ قىزۋ سىنىنا ۇشىرادى دەپ حابارلايدى Qamshy.kz اقپارات اگەنتتىگى.
بەلگىلى تەلەجۋرناليست، "شەتەلدەگى قازاق بالالارى" اتتى اۆتورلىق جوباسىمەن كوپتىڭ كوڭىلىنەن شىققان جانار بايسەمىزوۆا بۇگىندە كوپشىلىككە رۋحاني ازىق سىيلايتىن موتيۆاتور رەتىندە تانىلىپ جۇرگەن ەدى. الەۋمەتتىك جەلىدەگى 125 مىڭ وقىرمانىن ءتۇرلى پايدالى كەڭەستەر مەن جاعىمدى جاڭالىقتارىمەن قۋانتىپ جۇرگەن تەلەجۋرناليستىڭ سوڭعى جازباسى كوپشىلىكتىڭ شامىنا ءتيدى.
اتام زاماننان قازاق حالقى بەس پارىزدىڭ ءبىرى دەپ، وتىز كۇن تۇتىپ كەلە جاتقان ورازانى جوققا شىعارىپ، ون كۇن ۇستاسا دە جەتكىلىكتى دەگەن تەلەجۋرناليستى قالىڭ وقىرمانى ءتۇرلى پىكىرمەن سىناپ جاتىر.
مۇنىڭ الدىندا دا بۋددا دىنىندەگى الدەبىر سەنىم تۋرالى ءسوز قوزعاي كەلە، "7-مامىر -وسى جىلداعى ەڭ عاجايىپ كۇن. اكشايا-تريتيا دەپ اتالادى" دەپ، ول كۇنى نە ىستەۋ كەرەك، قانداي امال جاساۋ كەرەكتىگىن تىكەلەي ەفيردە ايتامىن دەپ، تاعى دا سىنعا ۇشىراعان بولاتىن.
ءوزىنىڭ باسقا ءدىني اعىمدا ەكەنىن جازبالارىنان بايقاتىپ قويدى دەگەن وي كەيبىر وقىرماننىڭ كوكەيىندە تۋىنداعانى انىق.
قالىڭ سىني پىكىردىڭ استىندا قالعان جانار بايسەمىزوۆا بۇل جازبانى بەلگىلى ءبىر سارى باسىلىمنان كوشىرىپ العانىن ايتىپ، ءتىپتى سىلتەمەسىن قالدىرعان. الايدا، سىلتەمە بويىنشا كىرسەڭ، ەشنارسە تاپپايسىڭ.
جانار حانىمنىڭ ءدال ورازا كەزىندە جازعان بۇل جازباسىن كوپشىلىك "جاۋدى سىرتتا دەسەك، ءوز ىشىمىزدە ەكەن عوي" دەگەن وي تۇيۋگە يتەرمەلەدى. قاراپايىم حالىق پەن ەلگە بەلگىلى ونەر ادامدارى دا جانار حانىمنىڭ بۇل ارەكەتىن تەرىس پيعىلعا بالادى.
جازبانىڭ استارىندا جازبا اۆتورىنىڭ دا ويى جاتقانى ونسىز دا تۇسىنىكتى. ويتپەگەن جاعدايدا، ول بىرنەشە جاعىمسىز پىكىردەن كەيىن-اق جازبانى الىپ تاستار ەدى.
«ەرتەڭ ءبىر ويىڭىزدى جيناقتاپ پوست شىعاراسىز دەگەن ۇمىتتەمىن. مىنا جازبا سىزدىكى ەمەس. ءسىزدىڭ جازبالارىڭىز اللاعا جاقىن. جانە بىلتىر ءوزىڭىز ورازا ۇستاپ، ونى 10 كۇن ەمەس 30كۇن ۇستاعانىڭىز انىق ەسىمدە. بيىلدا سولاي بولار»، «جانار حانىم، جوق جەردەن جاڭالىق اشۋ ۇنايدى-اۋ سىزگە... ونسىزدا ەكى ويلى بوپ جۇرگەندەر شىن قابىلداپ قالىپ، قانشا ادامدى اداسۋىنا سەبەپ بوپ قالماڭىزشى... ورازا- بەس پارىزدىڭ ءبىرى»، «مىنانى xايپ كوزدەپ جازساڭىز دا... اقىلسىزدىقتىڭ ەڭ جوعارعى ساتىسىندا جازدىڭىز!»، «مىناۋ تازا الجۋدىڭ الدىنداعى سيندروم. اللا ساقتاسىن مۇنداي اداسۋدان»- دەگەن پىكىرلەر جاڭبىردان كەيىنگى ساڭىراۋقۇلاقتاي قاپتاپ كەتتى.
ال، بۇل پىكىرتالاسقا ايتىسكەر اقىن اينۇر تۇرسىنبايەۆا «ورازا اللانىڭ پارىز ەتكەن امالى» دەپ ءوز پىكىرىن قالدىرىپ، پسيحولوگ قۇرالاي حانىم مەن جۋرناليست اسحات سادىرباي سابىرعا كەلىپ، بۇل جازباسىن جەلىدەن الىپ تاستاۋىن ءوتىنىپ: «قايىرلى كۇن! مەنىڭ جازعان سوڭعى پوستىمدى وقىڭىز دا بۇل پوستتى وشىرە سالىڭىز. اللا كەشىرسىن»، «جاناريك مىنا پوستىڭدى الىپ تاستا»،- دەپ ءوتىنىش جازعان. الايدا، جانار بايسەمىزوۆانىڭ ينستاگرام جەلىسىندە تىكەلەي ەفيردە ايتقان سوزىنە قاراعاندا، بۇل جازبا ەشقاشان وشپەيتىن سياقتى. دەگەنمەن، قاراپايىم حالىقتىڭ دا، مىڭداعان وقىرماندارىنىڭ دا، تانىمال تۇلعالاردىڭ، تانىس، جاناشىرلارىنىڭ دا سوزىنە قۇلاق اسپاعان جانار حانىم: «مەنىڭ جازبامنىڭ استىنا تانىمال ادامداردى بەلگىلەمەي-اق قويىڭىزدار. ولار وزدەرىنىڭ ءانىن ايتىپ، جۇمىسىن جاساپ جۇرە بەرسىن. پوستتى الىپ تاستا دەپ ءوتىنىش ايتقاندار: بۇل جازبا سول جەردە قالادى»، -دەدى.
ارينە، اقيقاتى اللاعا ايان. دەگەنمەن، مۇنداي سالماعى اۋىر جازبا سالماس بۇرىن تەلەجۋرناليستىڭ دە ون ويلانىپ، ءجۇز تولعانعانى راس-اۋ. تەك ءبىر سۇراق: كوزدەگەنى نە، حايپ پا، لايك پا؟ مۇنىسى وزىنە ايىپ پا، الدە اۋزىنا قاراپ، ءار ءسوزىن جاقۇت ساناپ جۇرگەن قالىڭ وقىرمانىنا ايىپ پا؟
ونسىز دا ويى سان-ساقتا اداسىپ، ءدىن دەگەندە ۇركە قاراپ جۇرگەن قازاق ءۇشىن بۇل دا ءبىر سوققىداي تيگەنى انىق. ىزىنە ەرىپ جۇرگەنىڭ دالاعا ەمەس، مولاعا سۇيرەپ بارا جاتقانداي كۇي كەشكەن وقىرماندارى ەندى نە ىستەر ەكەن؟ جانار حانىمنىڭ جازبالارىن ارى قاراي وقي بەرە مە، الدە الدەقاشان جازىلۋشىلارى قاتارىنان شىعىپ كەتتى مە؟
ۇسىنعان: ماقپال سەمباي
