60 جاستان اسقاننان كەيىن جەتىستىككە جەتۋگە بولا ما؟ بۇل ساۋالدىڭ جاۋابى كوپشىلىگىمىزدى قىزىقتىرادى. سول سەبەپتى Qamshy.kz اقپارات اگەنتتىگى سىزدەرگە ىسكەرلىك ءومىرى 60 جاستان اسقاننان كەيىن باستالىپ، ايتارلىقتاي جەتىستىككە جەتكەن تۇلعالاردىڭ ۇزدىك وندىعىن ۇسىنادى.

فرەنك ماككورت (ادەبيەت)

فرەنك ماككورت (1930-2009) 27  جىل بويى ورتا مەكتەپتە اعىلشىن تىلىنەن ساباق بەرگەن ۇستاز. ول 1996 جىلى زەينەتكەرلىككە شىققاننان  كەيىن ۋاقىتىن تەككە وتكىزبەستەن جازۋشىلىققا دەن قويا باستايدى. اقىرى فرەنك ماككورت «انجەلانىڭ ك ۇلى» (پراح اندجەلى) اتتى كىتابىن جارىققا شىعاردى. ءساتتى جازىلعان تۋىندى ميلليونداعان تيراجبەن تاراپ، كوپ ۇزاماي بەستسەللەرگە اينالدى.

وسى ەڭبەگى ءۇشىن پۋليتسەر سىيلىعىن جانە كىتاپ سىنشىلارىنىڭ ۇلتتىق قاۋىمداستىعىنىڭ جۇلدەسىن يەلەنگەن.

ول قاراپايىم ۇستازدىق قىزمەتىندە جۇرگەن كەزدەن باستاپ، 60-تان اسقاندا ۇلكەن جەتىستىككە جەتەرىن ىشتەي سەزگەن ەكەن.

بحاكتيۆەدانتا سۆامي پرابحۋپادا (ءدىن)

بحاكتيۆەدانتا سۆامي پرابحۋپادا (1896-1977) ءۇندىستاندا دۇنيەگە كەلىپ، ءومىرىنىڭ جارتىسىنان كوبىن وسى ەلدە وتكىزگەن ادام. الايدا 69 جاسىندا ءومىرىن تۇبەگەيلى وزگەرتىپ، «ءۇندىستاننىڭ قاسيەتتى دانالىعىن تاراتۋ» ماقساتىندا اقش-قا كەلەدى. ول اقش-قا كەلگەن كەزدە قالتاسىندا ارتىق ءبىر تيىن اقشاسى بولماعانىن ەسكەرە كەتكەن ءجون.

الايدا ول ەڭبەكتىك ارقاسىندا ءوز قاۋىمداستىعىن قۇرىپ، الەمدى ون رەت شارلاپ شىققان. 2000 جىلداردىڭ باسىندا پرابحۋپادانىڭ كىتاپتارى 60 تىلگە اۋدارىلىپ، 500 ملن. تيراجبەن تاراعان.

ونىڭ ارتىنان ەرگەن ادامداردىڭ ارەكەتىن ءتۇسىنۋ قيىن، ارينە. ولاردى اداسقاندار دەپ تە ايتىپ جاتامىز. ءبىراق ونىڭ 69 جاسقا كەلىپ مۇمكىن ەمەس نارسەنى مۇمكىن ەتكەنىن جوققا شىعارا المايمىز.

مەري دەلاني (ونەر)

مەري دەلاني (1700-1788) – اعىلشىن سۋرەتشىسى. ول 72 جاسىندا ءوزى ويلاپ تاپقان قاعازعا تۇسىرىلگەن كوللاجداردىڭ اۆتورى. مەري وسىمدىكتەرگە وزىنشە جان ءبىتىرىپ،  كوللاج بەن اپپليكاسيالاردى زەرتتەي كەلە وسىمدىكتەردىڭ وزگەشە سۋرەتىن سالا باستادى.

ءتىپتى III گەورگ پاتشا مەن شارلوتتا پاتشايىم ۆيندزوردا ورنالاسقان كەرەمەت ءۇيدى مەريگە سىيعا تارتقان. ول سول ۇيدە ءومىرىنىڭ سوڭىنا دەيىن باقىتتى كۇندەرىن وتكىزدى.

لورا ينگلز-ۋايلدەر (ادەبيەت)

لورا ينگلز-ۋايلدەر (1867-1957) — امەريكاندىق جازۋشى. «شىركەۋدەگى شاعىن ءۇي» اتتى بالالارعا ارنالعان كىتاپتار سەرياسىنىڭ اۆتورى. ءوزىنىڭ مانساپ جولىن 65 جاسىندا باستاپ، كوپ ۋاقىت وتپەي ەسىمى تانىلا باستاعان.

ونىڭ كىتاپتارى كوپتەگەن تىلدەرگە اۋدارىلىپ، ءتۇرلى باسپالاردا جارىق كورگەن. ءتىپتى اقش-تا جازۋشىنىڭ اتىنداعى كىتاپ جۇلدەسى تاعايىندالعان.

ەستەل گەتتي (تەاتر)

ەستەل گەتتي (1923-2008) — امەريكاندىق اكتريسا. ۇزاق جىلدار بويى ونىڭ رولدەرىن ەشكىم كوزگە ىلمەي كەلگەن. الايدا ول «التىن قىزدار» اتتى تەليەۆيزيالىق سەريالدا سوفيا پەتريللونىڭ ءرولىن سومداعاننان كەيىن ونى الەم تانىدى.

ول كەزدە اكتريسانىڭ جاسى 63-تە بولاتىن.

فاۋدجا سينگح (اتلەتيكا)

فاۋدجا سينگح (1911) – ءۇندىستاندا دۇنيەگە كەلگەن، الايدا ۇلىبريتانيانىڭ ازاماتى. وتە ەرەكشە جاعداي... ويتكەنى ول ءوزىنىڭ العاشقى مارافونىن (42 شاقىرىمدىق) 89 جاسىندا جۇگىرىپ وتكەن. ەڭ قىزىعى ول وسىنداي ءىس-شارالارعا قاتىسۋىن ءالى دە توقتاتپاعان.

2011 جىلى تولىق مارافوندى جۇگىرىپ وتكەن 100 جاستاعى «ەڭ قارت مارافونشى» رەتىندە گيننەستەر رەكوردى كىتابىنا ەندى.

ءقازىر سينگحتىڭ جاسى 108-دە، الايدا ول كۇن سايىن 5-8 كم-گە جۇگىرۋدى ادەتكە اينالدىرعان. «اقتىق دەمىم قالعانشا جۇگىرۋدى توقتاتپايمىن»، - دەيدى ەڭ قارت مارافونشى.

كلارا پەللەر (پوپ-ونەر)

كلارا پەللەر (1902-1987) – امەريكاندىق اكتريسا. 81 جاسقا كەلگەندە Wendy’s مەيرامحانالار جەلىسى ءۇشىن تۇسىرىلگەن جارناماعا قاتىسقان.

جارناما روليگى وتە قاراپايىم بولسا دا كورەرمەندەردىڭ كوڭىلىنەن شىققان. ءبىرشاما جاسقا كەلگەنىنە قاراماستان، ءىرى كومپانيالاردىڭ ءبىرىنىڭ بەتكە ۇستار يميدجىنە اينالعان.

موزەس اجەي (ونەر)

موزەس اجەي (1860-1961) – امەريكاندىق اۋەسقوي-سۋرەتشى، امەريكاندىق سۋرەتتەگى ءپريميتيۆيزمنىڭ نەگىزگى وكىلدەرىنىڭ ءبىرى. ونىڭ قۇرمەتىنە شولپان جۇلدىزىنداعى كراتەر موزەس دەپ اتالادى.

اتاق پەن ابىروي وعان 78 جاسىندا كەلدى. ول ونەردىڭ ناعىز شەبەرىنە اينالدى. الايدا، مۇنىڭ بارلىعى كەزدەيسوق جاعدايدان باستالعان.

1938 جىلى تانىمال كوللەكسيونەر موزەستىڭ جۇمىستارىن بايقاپ قالىپ، نيۋ-يورك قالاسىنداعى زاماناۋي ونەر مۇراجايىنا قويۋدى شەشەدى. سودان كەيىن اجەيدىڭ جۇمىستارى پوچتا حاتتارىندا، ارناي پوستەرلەردە جانە ىدىس-اياقتاردىڭ سىرتىندا پايدا بولا باستادى.

سودان كەيىن ول تۋرالى ارنايى ءومىرباياندىق فيلم ءتۇسىرىلدى، ال 93 جاسىندا Time جۋرنالىنىڭ مۇقاباسىنا شىقتى. موزەس اجەي دۇنيە سالعاندا امەريكا مەن ەۋروپانىڭ ءبىرقاتار باسىلىمدارى ول تۋرالى جازىپ جاتتى.

گارري بەرنستاين (ادەبيەت)

گارري بەرنستاين (1910-2011) – ۇلىبريتانيادا دۇنيەگە كەلگەن امەريكاندىق جازۋشى. 93 جاسىندا ءوزىنىڭ «كورىنبەيتىن قامال: كەدەرگىلەردى جەڭگەن ماحاببات حيكاياسى» اتتى كىتابىن جازعان. كىتاپتى باسىپ شىعارۋ مۇمكىن ەمەس بولعان. ويتكەنى بارلىعى كارى شالدىڭ شيمايىنا باس قاتىرعىسى كەلمەگەن.

كۇدەرىن ۇزبەگەن قاريانىڭ ارمانى 96 جاسىندا ورىندالدى. كىتابى جارىققا شىعىپ، گارريدىڭ اتاعىن ايگىلەدى.

«پولكوۆنيك» گارلاند ساندەرس (بيزنەس)

حارلاند ديەۆيد ساندەرس (1890-1980) – الەمدەگى ەڭ ايگىلى رەستوراتور، Kentucky Fried Chicken (KFC) فاست-فۋد مەيرامحانالار جەلىسىنىڭ نەگىزىن قالاۋشى.

ءوڭى جىلى، ءجۇزى جارقىن بۇل اقساقالدى تانىمايتىن ادام جوق شىعار. ال ول ءوز كاسىبىن 65 جاسىندا باستاعان. 10 جىلدىڭ ىشىندە 600 مەيرامحانا اشىپ، جەلىدەگى ءوزىنىڭ ۇلەسىن 2 ميلليون دوللارعا ساتقان.

بۇگىندە ونىڭ بەينەسى KFCء-دىڭ فيرمالىق برەندىنە اينالعان.

ءبىز 60 جاسىندا اتاعىن اسپانداتقان تانىمال تۇلعالاردىڭ تەك وندىعىمەن عانا تانىستىردىق. قارتايعاندا جەتىستىككە جەتىپ، كارىلىكتى ىسكەرلىكپەن وتكىزىپ جاتقان ادامدار بۇدان دا كوپ. ءبىراق ءومىرىڭىزدى وزگەرتىپ، تولاعاي تابىستارعا جەتكىڭىز كەلسە، 60 جاستى ارمانداپ جاتۋدىڭ قاجەتى جوق. بۇگىننەن باستاپ ىسكە كىرىسىڭىز!

دايىنداعان: مارجان سابەت